Roma 2

Ya Tyumanem ya mag-ukum sa kadég na manga utaw

1Walaꞌ ya du-an na mag-ukum kaw sa kanmu eped asuntu sa pig-imoꞌ nilan na malatay. Dun ni pag-ukum mu kanilan, pig-ukuman mu uman ya kanmu pagka-utawun. Kay mig-imoꞌ kaw uman sa manga malatay kasiling na maynan! 2Kya-ede-an da tadun na matinaw ya pagbayaꞌ na Tyumanem sa pag-ukum nan sa manga utaw na mig-imoꞌ sa malatay. 3Kun mag-ukum kaw sa kanmu eped asuntu sa pig-imoꞌ nilan, manang mig-imoꞌ kaw uman sa kasiling na pig-imoꞌ nilan, diliꞌ kaw saba makapalaguy sa pag-ukum na Tyumanem. 4Pagaw mig-anenganeng kaw na to-o matas ya pasinsiya na Tyumanem aw diliꞌ maksay magkadaman, yanagaw migpadeleg pa kaw dun ni pagpakasalaꞌ. Ya tengteng matinaw dakulaꞌ saba ya kanan kallat, aw pigtagadan kaw nan na magselsel sa manga salaꞌ mu. 5Manang asuntu na mategel ya kanmu anenganeng, walaꞌ ya kalim mu magselsel. Yanagaw pigdugangan mu baling ya kadaman na Tyumanem adti kanmu. Aw dun ni allaw na pag-ukum, bukasan nan ya kanan pagbayaꞌ, aw ka-ede-an na manga utaw na matinaw ya kana Tyumanem pagbayaꞌ adti manga utaw na nyakasalaꞌ. 6Kay tandanan nan ya tagsambuksambuk na utaw sa umbaꞌ na pigpan-imoꞌ nilan pangkay madyaw aw pangkay malat. 7Awun manga utaw na un nan tandanan sa ginawa na walaꞌ ya katigkasan. Kay dun ni pag-eyaꞌ nilan asini tas na lupaꞌ, migpadeleg silan migtibagseg mig-imoꞌ sa pangkay unu ya makatutuk sa Tyumanem pada sayaꞌ nan silan aw atagan na dengeg kagaya, kay kaliman nilan ya tengteng ginawa na walaꞌ ya katigkasan. 8Manang ya manga eped, pag-una͡en nilan ya kanilan pagka-utawun, aw kyumele sa matinaw na pigdengeg nilan sa Tyumanem, aw dyumalug sa mangkalatay, yeiy ya manga utaw na un nilan lemenen ya kadaman aw pa-emel-emel na Tyumanem. 9Aw dakulaꞌ to-o ya pagti-is aw kalugan na un nilan ka-agiyan asuntu sa manga pigpan-imoꞌ nilan na malatay. Ya tagnaꞌ na pa-emel-emelen yan ya manga Judiyu, aw dala uman ya manga Héntil. 10Manang adti manga utaw na mig-imoꞌ sa madyaw, awun tandan kanilan na kadyawan aw dengeg aw kalinaw. Ya tagnaꞌ na dumawat yan ya manga Judiyu, aw dala uman ya manga Héntil. 11Kay walaꞌ ya pigkibang na Tyumanem.

Ya pag-ukum sa manga Héntil bekeꞌ na magi sa Uldin na manga Judiyu

12Na, ya kadég na manga Héntil na nyakasalaꞌ, pa-emel-emelen saba silan na walaꞌ ya tyamanan, pangkay walaꞌ nilan ka-ede-i ya Uldin na pig-atag na Tyumanem. Aw ya manga Judiyu, pangkay silan oloꞌ ya pig-atagan na Tyumanem sa Uldin na un nilan dalugun, manang walaꞌ nilan kabatug tumana ya kadég na manga suguꞌ dun, yanagaw ukuman silan magi sa Uldin. 13Kay ya manga utaw na dyumengeg sa Uldin manang walaꞌ nilan daluga, diliꞌ silan dawaten na Tyumanem kasiling na walaꞌ da ya salaꞌ. Manang ya manga migtuman sa Uldin, silan ya dawaten na Tyumanem. 14Ya manga Héntil, pangkay walaꞌ silan atagi na Uldin na Tyumanem, manang kun pig-imoꞌ nilan ya awun ni Uldin, dun kita-a na kya-ede-an nilan ya madyaw aw malat. 15Yanagaw, dun ka-ede-i na nyasulat adti anenganeng nilan ya manga suguꞌ na awun ni Uldin. Aw pigmatinaw na kanilan anenganeng kun madyaw ya pig-imoꞌ nilan aw kun malatay. 16Aw dumateng saba ya allaw na bukasan na Tyumanem ya kadég na manga pig-anenganeng nilan na tagu-taguꞌ. Aw magi kan Jisu-Kristu, ukuman nan ya kadég na utaw kasiling na pigpa-edeꞌ da ku dun ni Madyaw na Ubat-ubat.

Ya manga Judiyu aw ya Uldin

17Na, kamu na manga kadégan ku na Judiyu, awun kaliman ku paglongun kamayu. Maglong kamu, “Judiyu kami,” aw pigsaligan mayu ya Uldin pada paluwa-en kamu, aw pigpalibantug mayu na utaw kamu na Tyumanem. 18Aw kya-ede-an da mayu ya pagkaliman nan. Aw tyumandeꞌ kamu kun unu ya to-o madyaw kay pigpalna-uwan da kamu sa pigsulat adti Uldin. 19Iman mayu aw umbaꞌ da kamu mag-agak sa manga buta aw ma-imoꞌ saleng na maka-ilaw sa anenganeng na manga utaw na kenneꞌ pa dun ni kangitngitan. 20Aw iman mayu uman aw mabatug mayu tuliden ya manga utaw na walaꞌ ya bet aw mabatug palna-uwan ya manga utaw na tagbiꞌ ya kya-ede-an sa Tyumanem. Aw iman mayu aw matadeng kamu maggagad kanilan adti katinawan asuntu na pig-atagan kamu na Uldin. 21Na, kun mabatug mayu alag yan, anangaꞌ diliꞌ mayu dalugun ya Uldin na pigpalna-u mayu kanilan? Pigpalna-uwan mayu silan na “Diliꞌ kamu magpanakaw,” manang kamu tyumakaw baling! 22Aw piglongan mayu silan na “Diliꞌ kamu maglakadenen,” manang miglakadenen kamu. Aw pigpalna-uwan mayu silan na dumutan nilan ya manga inutaw na pigsimba na manga Héntil, manang pyanakaw mayu baling ya pigdugsuꞌ nilan dun ni kanilan manga témplo! 23Migpalibantug kamu na awun ni kamayu ya Uldin manang walaꞌ mayu baling basabasayi ya dengeg na Tyumanem kay gayed mayu piglakadan ya manga suguꞌ nan. 24Pigpasulat na Tyumanem asini muna, law nan, “Asuntu kamayu, piglongan baling na manga Héntil ya Tyumanem sa malatay.”#2:24 Mabasa adti Isayas 52:5b aw Ézékiyél 36:20-22.

Ya katanem na pagpatuliꞌ na pagdalugun

25Na, kamu na manga Judiyu, awun ma-untung dun ni pagpatuliꞌ mayu kun dalugun mayu ya manga suguꞌ dun ni Uldin. Manang kun lakadan mayu ya manga suguꞌ dun, walaꞌ ya ma-untung na kamayu pagpatuliꞌ aw kasiling kamu baling na manga Héntil na walaꞌ tuli-a. 26Maynan uman ya manga Héntil, pangkay walaꞌ silan tuli-a manang kun dalugun nilan ya manga suguꞌ dun ni Uldin, dawaten saba silan na Tyumanem. 27Yanagaw ya manga utaw na walaꞌ tuli-a manang dyumalug sa manga suguꞌ dun ni Uldin, kita-en dun ni kanilan bet na kamu na manga Judiyu umbaꞌ saba pa-emel-emelen asuntu na walaꞌ mayu daluga ya manga suguꞌ dun ni Uldin pangkay pigtuliꞌ da kamu. 28Adti Tyumanem, ya tengteng pagka Judiyu walaꞌ dun ni pagdalug sa katanem aw ya pagtuliꞌ kanilan. 29Manang yan baling ya tengteng Judiyu, ya utaw na pigbagu la na Ispiritu Santo aw bekeꞌ na asuntu na pigtuliꞌ sakanan. Aw pangkay walaꞌ sakanan saya-an na manga utaw, manang sayaꞌ sakanan na Tyumanem.

Currently Selected:

Roma 2: klgv

Highlight

Compare

Copy