Roma 1

1Aku si Pablo ya migsulat adti kamayu. Sugu-anen aku ni Kristu Jisus aw pigpamalliꞌ aku na Tyumanem na ma-imoꞌ apostol, aw pigtani aku nan na un magpa-edeꞌ adti manga utaw sa Madyaw na Ubat-ubat na lekat adti kanan 2na dadan nan pigpakang magi sa kanan manga propita dun ni pigpasulat kanilan asini muna. 3Ya Madyaw na Ubat-ubat yeiy, yan si Jisu-Kristu na Iseꞌ na Tyumanem. Dun ni pagka-utaw nan, buwadbuwad sakanan ni Hariꞌ Dabid.#1:3 Pigpa-edeꞌ da dadan na Tyumanem na dumateng ya Kristu na lumekat adti buwadbuwad ni Hariꞌ Dabid. 4Aw dun ni pagkataw ni Jisus lekat adti pagkamatay magi sa kadakulaꞌ na katulus na Ispiritu Santo, pigmatinaw na Iseꞌ sakanan na Tyumanem aw yan ya kanaten Matas na Pangulu. 5Yanagaw magi kanan, pig-atagan kami na Tyumanem na grasya aw pigtawag kami nan na ma-imoꞌ manga apostolés na un magpa-edeꞌ sa Madyaw na Ubat-ubat kan Kristu adti kadég na manga Héntil pada mangintu-u silan aw dumalug kanan.

6Aw kamu uman pigtawag da na Tyumanem na un maka-akup adti kan Jisu-Kristu. 7Yanagaw pigsulatan ku ya kadég mayu na nyangintu-u kanan dun ni syudad na Roma. Alag kamu pigginawa͡an na Tyumanem, aw pigtawag da kamu nan na un ma-imoꞌ kanan manga utaw.

Padatengen galu kamayu ya grasya aw kalinaw na lyumekat adti Tyumanem na yan ya Ama tadun aw adti kan Jisu-Kristu na kanaten Matas na Pangulu.

Ya kaliman ni Pablo na mawun adti syudad na Roma

8Na, ini ya muna ku paglongun adti kamayu: Pigpasalamatan ku ya Tyumanem magi kan Jisu-Kristu sa kadég mayu, kay pigdengeg da ya pagpangintu-u mayu adti kadakulaꞌ na banwa.

9Aw ya Tyumanem, yan ya migmatinaw na gayed ta kamu pigpanawagtawagan adti kanan. Nyatibulluk ya kanak anenganeng dun ni manga imo-unun na pigtaligu nan kanak na yan ya pagpa-edeꞌ adti manga utaw sa Madyaw na Ubat-ubat sa Iseꞌ nan. Aw dun ni kanak pagpanawagtawag, 10gayed aku migsekat adti kanan na tumbay nan galu na makakawun aku adti kamayu, 11kay kaliman ku na kumitaꞌ kamayu pada ka-atagan kamu sa grasya na lekat adti Tyumanem na yan ya makapasalig sa kamayu pagpangintu-u. 12Ya pyalabet ku na ya tagsambuksambuk kanaten magpakabagsegay kitadun sa kanaten ginawa dun ni pagpangintu-u tadun kan Kristu Jisus.

13Na, kay manga inulug ku na nyangintu-u kan Kristu, kaliman ku na ka-ede-an mayu na malikit aku migpalpa na mawun adti kamayu manang gayed aku nyasalang taman adun. Kay kaliman ku magpalna-u dun ni kamayu pada kadugangan pa ya manga mangintu-uway kan Kristu adti kamayu, kasiling na pig-imoꞌ ku adti manga eped na banwa na pig-eya-an na manga Héntil. 14Pigtaliguwan aku na Tyumanem na un magpa-edeꞌ sa Madyaw na Ubat-ubat adti kadég na manga utaw, pangkay ayin silan lekat na banwa, aw pangkay adti manga nyaka-iskwila aw adti manga walaꞌ paka-iskwila. 15Yanagaw to-o ku kaliman na makakawun dun ni kamayu, aw adti kadég na nyeyaꞌ dun ni syudad na Roma, pada mapa-edeꞌ ku kanilan ya Madyaw na Ubat-ubat kan Kristu Jisus.

Ya katulus na Madyaw na Ubat-ubat kan Kristu

16Diliꞌ aku mamulamula magpa-edeꞌ sa Madyaw na Ubat-ubat kan Kristu. Kay ya ubat-ubat yeiy, yan ya katulus na Tyumanem magpaluwaꞌ sa pangkay singalan ya mangintu-u. Pigdengeg yeiy una na manga Judiyu, aw tigkas yan adtu la uman ni manga Héntil.#1:16 Ya manga utaw na Judiyu, silan ya manga pigpamalliꞌ na Tyumanem asini muna. Aw ya manga Héntil, silan uman ya manga utaw na bekeꞌ na Judiyu. 17Kay dun ni Madyaw na Ubat-ubat, pigbukasan na Tyumanem adti manga utaw kun unun nan ya pagdawat kanilan kasiling na walaꞌ da ya salaꞌ, magi saba oloꞌ sa kanilan pagpangintu-u kan Kristu. Pigmatinaw yeiy dun ni pigpasulat nan asini muna sa sambuk na propita, law nan, “Ya utaw na mangintu-u kanak, yan ya dawaten ku kasiling na walaꞌ da ya salaꞌ, aw matagtun nan ya tengteng ginawa na walaꞌ ya katigkasan.” #1:17 Mabasa adti Habakuk 2:4.

Ya kadaman na Tyumanem adti manga utaw na walaꞌ pangintu-u

18Na, ya Tyumanem na awun ni tas na langit, pigbukasan nan ya kanan kadaman adti manga utaw na walaꞌ ya pagkallek kanan aw mig-imoꞌ sa malatay. Aw magi sa imo-unun nilan, gayed nilan pig-ampangan ya katinawan na lekat adti Tyumanem. 19Mabatug saba nilan ya pagka-edeꞌ sa bet na Tyumanem kay pigbangal da nan adti kanilan aw walaꞌ ya pigtaguꞌ nan kanilan. 20Ya Tyumanem diliꞌ sakanan pagkita-en, manang lekat na pag-imoꞌ nan sa kadakulaꞌ na banwa, dun kita-a ya katulus nan na walaꞌ ya tyamanan aw ya pagka Tyumanem nan. Yanagaw, walaꞌ ya indeganan nilan maglong, “Walaꞌ nami ka-ede-i kun singalan ya Tyumanem.” 21Pangkay kya-ede-an da nilan na awun Tyumanem, manang walaꞌ nilan baling sakanan basabasayi, aw walaꞌ nilan uman sakanan pasalamati sa kadég na pig-atag nan kanilan. Kyangitngitan ya kanilan anenganeng aw nya-imoꞌ baling na walaꞌ ya guna. 22Aw migpalibantug silan, law nilan, “Dakulaꞌ ya kanami katadeng,” manang ya tengteng matinaw walaꞌ ya kya-ede-an nilan. 23Aw pangkay kya-ede-an da nilan ya kadyaw na Tyumanem na diliꞌ magkamatay, manang mig-imoꞌ silan baling sa manga inutaw kasiling na utaw na magkamatay aw kasiling na langgam, aw manga ayep, aw manga ayep na iyalas, aw manga magpananap, aw alag yeiy nilan pigsimba!

24Yanagaw pigtumbay da silan na Tyumanem adti pagdalug sa pagkaliman na pagka-utawun nilan dun ni manga imo-unun na malatay. Mig-imo-imo-ay silan sa manga imo-unun na alag makamulamula kanilan. 25Pigsayuwan nilan na galuꞌ ya kadakulaꞌ na matinaw sa kana Tyumanem. Pigsimba nilan baling ya manga pig-imoꞌ nan, manang walaꞌ nilan simba͡a ya tengteng Tyumanem na mig-imoꞌ sa kadakulaꞌ na banwa na yan saba oloꞌ ya umbaꞌ deyen na walaꞌ ya tyamanan. Amén.

26Asuntu sa pigpan-imoꞌ nilan na malatay, pigpabaya-an da silan na Tyumanem na dalugun nilan ya pagkaliman na pagka-utawun nilan na makamulamula͡ay. Aw ya syampetan na pig-imoꞌ nilan, pigtalikudan da baling na manga ka͡ubayan ya katanem sa pagkalim sa eseg, aw migkakalimay da ya alag ka͡ubayan. 27Aw maynan uman ya manga eseg. Walaꞌ da baling nilan daluga ya katanem sa pagkalim sa ka͡ubayan, manang migkakalimay da ya alag eseg, aw mig-imo-imo-ay silan sa makamulamula͡ay adti kanilan lawas. Yanagaw pa-emel-emelen silan na Tyumanem umbaꞌ sa pig-imoꞌ nilan na malatay.

28Aw asuntu na walaꞌ nilan kalimi ya pagka-edeꞌ sa Tyumanem, pigpabaya-an nan silan adti baluk na anenganeng nilan aw ya pagdalug sa kanilan pagkaliman dun ni imo-unun na malatay. 29Nyatmuꞌ ya anenganeng nilan sa madég na punganan na malatay, kasiling na maynini: Gayed nilan pig-imoꞌ ya to-o malatay. Kaliman nilan tagtunun ya ka-unan aw pametang na manga eped nilan. Gayed nilan pig-anenganeng kun unu ya ma-imoꞌ na malatay adti manga eped na utaw. Mati-inga-ay silan, aw magpatay, aw mati-ayil aw matigawayay silan. Pigbetang nilan adti kanilan anenganeng ya pagkalat sa eped na utaw. Gayed silan magsugpaten sa manga tingeg. 30Aw pagkaliman nilan ya pagkalat sa dengeg na eped. Pigkalatan nilan na ginawa ya Tyumanem. Walaꞌ ya pagpamasa nilan sa kanilan manga eped. Magpatastas silan. Magpalibantug silan sa kanilan pagpakabetang. Gayed silan mig-imo-imoꞌ sa bagu na imo-unun na malatay. Mati-atu silan sa kanilan mangkatikadeng. 31Pyangkebbelan da ya anenganeng nilan, aw diliꞌ silan kasaligan. Walaꞌ ya pagginawa nilan sa kanilan eped, aw walaꞌ ya pagkallat nilan sa eped na utaw. 32Kya-ede-an da nilan ya piglong na Tyumanem na kun singalan ya mig-imoꞌ sa maynan, umbaꞌ saba sakanan pa-emel-emelen na walaꞌ ya tyamanan. Manang kenneꞌ baling nilan mig-imoꞌ sa manga salaꞌ. Aw bekeꞌ oloꞌ na maynan, pagleya͡an nilan uman ya manga eped na mag-imoꞌ sa kasiling na kanilan pig-imoꞌ na malatay.

Currently Selected:

Roma 1: klgv

Highlight

Compare

Copy