Roma 3

1Pagaw awun utaw na musip, law nan, “Kun maynan, unu ya ma-untung sa pagka Judiyu ku? Aw unu uman ya ma-untung sa kanak pagpatuliꞌ?” 2Ya tubag ku kanan, “Madég ya ma-untung sa kanaten pagka Judiyu. Ya tagnaꞌ, pigtaligu na Tyumanem adti manga tyugbulan tadun ya kanan manga tingeg aw ya kadég na pigpakang nan.” 3Pagaw awun pa musip, “Kun awun manga Judiyu na walaꞌ pagtuman seiy, unu, diliꞌ uman na Tyumanem tumanen ya manga pakang nan?” 4Ya tubag ku, “Diliꞌ saba na maynan! Ya Tyumanem pagtumanen nan ya manga pigpakang nan, pangkay ya kadég na utaw alag maggaluꞌ. Kasiling na pigsulat ni Dabid asini muna:

‘Dun ni kanmu paglong, kay Tyumanem, ka-ede-an na matinaw ya pagbayaꞌ mu sa manga utaw.

Aw degen mu ya manga miglong na bekeꞌ na matinaw ya pag-ukum mu.’ ”#3:4 Mabasa adti Salmo 51:4.

5Manang pagaw awun maglong: “Kun magi sa kanami imo-unun na malatay mabangal na matinaw ya pag-ukum na Tyumanem, yanagaw diliꞌ umbaꞌ na pa-emel-emelen kami na Tyumanem!” Ya piglong yeiy, oloꞌ lyumekat adti anenganeng na utaw. 6Diliꞌ kitadun mag-anenganeng sa maynan! Kay kun diliꞌ matinaw ya pag-ukum na Tyumanem kanaten, na, unun nan ya pag-ukum sa kadég na manga utaw asini tas na lupaꞌ?

7Pagaw awun pa utaw na maglong, “Anangaꞌ pa aku pa-emel-emelen sa pig-imoꞌ ku na malatay? Kay dun saba ni kanak paggaluꞌ, kita-en na pagtumanen na Tyumanem ya kanan pigpakang aw yan baling ya du-an na madeyen sakanan. 8Yanagaw kun maynan, naten baling imo-un ya malat pada kita-en na manga utaw ya kadyaw na Tyumanem, aw deyen sakanan.” Yeiy ya piglong na manga eped na utaw na yan kunu ya kanami pigpalna-u. Ya manga utaw yeiy, umbaꞌ silan pa-emel-emelen na Tyumanem.

Ya pag-allang na salaꞌ sa kadég na utaw

9Na, kun awun manga Judiyu na musip, “Unu, to-o madyaw ya kanaten asuntu na pigpakadyaw kitadun na Tyumanem?” Aw tubagen ku silan, “Bekeꞌ saba!” Kay pigpa-edeꞌ da ku kamayu na un pa-emel-emelen na Tyumanem ya kadég na manga utaw pangkay Judiyu silan aw pangkay Héntil, kay alag kitadun pig-allang na salaꞌ. 10Pigpasulat na Tyumanem, law nan:

“Walaꞌ ya pangkay sambuk na utaw na adti anenanganeng na Tyumanem walaꞌ ya salaꞌ.

11 Aw walaꞌ ya sambuk na nyakalabet sa Tyumanem, aw walaꞌ ya malim maka-edeꞌ kanan.

12 Ya kadég na manga utaw, alag tyumalikud kanan, yanagaw walaꞌ alag ya ma-untung kanilan.

Walaꞌ ya pangkay sambuk na mig-imoꞌ sa madyaw.”#3:10-12 Mabasa adti Salmo 14:1-3 aw 53:1-3.

13 “Ya tingeg nilan to-o malipaꞌ kasiling na lebeng na pig-uwangan na to-o maluꞌ.”

“Aw ya paglong nilan, alag galuꞌ kasiling na bisa na kamugung.”#3:13 Mabasa adti Salmo 5:9 aw 140:3.

14 “Yan ya gayed magluwaꞌ adti manga bakaꞌ nilan ya pagpanullun sa manga eped, aw gayed silan maglong sa malatay adti eped na utaw.”#3:14 Mabasa adti Salmo 10:7.

15 “Pangkay tagbiꞌ da ya du-an, maksay silan magpatay.

16 Aw pangkay ayin silan kadtu, pigkalat nilan ya madyaw na pagpakabetang na manga eped, aw kaliman nilan na gayed magti-is ya kanilan manga eped.

17 Walaꞌ ya kya-ede-an nilan sa pag-isambuk sa ginawa adti manga eped.”#3:15-17 Mabasa adti Isayas 59:7-8.

18 “Aw walaꞌ ya pagkallek nilan sa Tyumanem.”#3:18 Mabasa adti Salmo 36:1.

19Na, kya-ede-an da tadun na ya kadakulaꞌ na pigpasulat dun ni Uldin, pig-atag adti manga Judiyu na yan ya un nilan dalugun. Yanagaw walaꞌ ya utaw asini tas na lupaꞌ na makapaglong na diliꞌ sakanan ukuman na Tyumanem. 20Kay bekeꞌ na pagtuman sa Uldin ya du-an na dawaten kitadun na Tyumanem kasiling na walaꞌ da ya salaꞌ. Kay magi saba sa Uldin, dun ka-ede-i na ya kadég tadun alag nyakasalaꞌ.

Ya paglanas na Tyumanem sa salaꞌ na utaw magi oloꞌ sa kanan pagpangintu-u

21Manang adun, pigpakitaꞌ da na Tyumanem ya bagu na pa-agi na dawaten nan ya manga utaw kasiling na walaꞌ da ya salaꞌ. Aw bekeꞌ yeiy na pagdalug sa Uldin. Manang pigmatinaw yeiy na Uldin aw manga pigsulat na manga propita. 22Dun ni bagu na pa-agi, mabatug da dawaten na Tyumanem ya pangkay singalan na utaw kasiling na walaꞌ da ya salaꞌ magi sa pagpangintu-u nan kan Jisu-Kristu, pangkay Judiyu silan aw pangkay Héntil. Kay adti Tyumanem, ya kadég alag da mig-unawa. 23Asuntu na nyakasalaꞌ ya kadég, diliꞌ na manga utaw ka͡apetan ya kadyawan na Tyumanem. 24Manang asuntu sa kallat nan kanaten na walaꞌ ya bayad, pigdawat nan kitadun kasiling na walaꞌ da ya salaꞌ magi sa pagkamatay ni Kristu Jisus. Aw dun da nan lekata ya kadég tadun lekat adti pag-allang na salaꞌ. 25Kay pigpadala sakanan na Tyumanem na un ma-imoꞌ kalyu kanaten. Aw magi sa duguꞌ ni Jisus malanas ya kanaten manga salaꞌ kun mangintu-u kitadun kanan, aw dun pakita͡an na Tyumanem na matinaw ya kanan pagbayaꞌ sa manga utaw na nyakasalaꞌ. Asini muna, asuntu na magpakatagen ya Tyumanem sa kadaman nan, pigpalabay pa nan ya salaꞌ na manga utaw. 26Manang adun pigpakitaꞌ da nan kanaten na matinaw ya kanan pagbayaꞌ, kay walaꞌ nan pabaya-i ya manga salaꞌ tadun. Magi dun ni pagkamatay ni Jisus, piglekat nan kitadun. Aw pangkay singalan ya mangintu-u kan Jisus, dawaten sakanan na Tyumanem kasiling na walaꞌ da ya salaꞌ.

27Yanagaw, unu, mabatug nami na manga Judiyu ya magpalibantug asuntu na dyumalug kami sa Uldin? Diliꞌ saba! Aw unu, awun indeganan na magpalibantug kami? Walaꞌ saba! Kay ya pagdawat na Tyumanem kanaten, magi oloꞌ sa pagpangintu-u tadun kan Kristu aw bekeꞌ na imo-unun tadun na madyaw. 28Kay kya-ede-an da naten na pigdawat nan kitadun kasiling na walaꞌ da ya salaꞌ magi sa pagpangintu-u tadun kan Kristu Jisus, aw bekeꞌ na asuntu na pagtuman tadun sa kadég na suguꞌ na awun ni Uldin.

29Na, pagaw iman mayu aw yan oloꞌ ya dawaten na Tyumanem ya manga Judiyu. Bekeꞌ saba na maynan, kay dawaten nan uman ya manga Héntil kay yan uman ya kanilan Tyumanem. 30Kay sambuk da oloꞌ ya Tyumanem. Aw pangkay Judiyu silan aw pangkay Héntil, kun mangintu-u silan kan Jisus, dawaten silan na Tyumanem kasiling na walaꞌ da ya salaꞌ.

31Aw kun awun musip kanak, “Unu, walaꞌ da ya katukanan sa manga suguꞌ dun ni Uldin asuntu na awun da pagpangintu-u tadun kan Jisus?” Ya tubag ku kanan, “Bekeꞌ na maynan! Dun ni kanaten baling pagpangintu-u, tengteng tadun pigtuman ya Uldin.”

Currently Selected:

Roma 3: klgv

Highlight

Compare

Copy