Roma 11

Ya kallat na Tyumanem adti manga utaw na Isra-él

1Unu, kyele͡an na Tyumanem ya kanan manga utaw na yan ya Isra-él? Walaꞌ saba! Diliꞌ mayu pagkalingawan na aku utaw uman na Isra-él. Si Abraham uman ya kanak tyugbulan aw sambuk aku na lyumekat adti buwadbuwad ni Bénjamin. 2Walaꞌ saba kele ya Tyumanem sa kanan manga utaw na dadan da nan pyamalliꞌ lekat pa asini muna. Anenganenga mayu ya pigpasulat na Tyumanem sa pagpakabetang ni Éliyas. Migdiklamu sakanan adti Tyumanem sa manga utaw na Isra-él, law nan, 3“Kay Tyumanem, pigpamatay da nilan ya manga propita mu. Aw pigkalat da nilan ya manga dugsu-anan adti kanmu. Aw dakman aku oloꞌ ya nyasamaꞌ na nyangintu-u kanmu. Aw un aku nilan galu uman patayen!”#11:3 Mabasa adti 1 Hariꞌ 19:10,14. 4Manang ini saba ya tubag na Tyumanem kan Éliyas: “Awun pa pitummalalan (7,000) ya nyasamaꞌ na nyangintu-u kanak na walaꞌ pagsimba sa inutaw ni Ba-al.”#11:4 Mabasa adti 1 Hariꞌ 19:18. 5Aw maynan uman adun, awun pa nyasamaꞌ na manga utaw na Isra-él na pigpamalliꞌ na Tyumanem magi sa kanan kallat.

6Ya pagdawat nan kanilan, bekeꞌ na asuntu sa manga imo-unun nilan, manang magi saba sa kallat na Tyumanem. Kay kun pigpaluwaꞌ nan ya manga utaw asuntu oloꞌ sa pigpan-imoꞌ nilan, ya kallat nan bekeꞌ yan na tengteng kallat. 7Na, unu ya mapaglong tadun adun? Ya manga buwadbuwad ni Isra-él pangkay nyaninaw silan sa agiyanan na un silan dawaten na Tyumanem manang walaꞌ nilan kita-a. Kay awun eped kanilan na pigpangkebbelan da ya anenganeng. Manang awun uman manga eped kanilan na pigpamalliꞌ na Tyumanem kay nyangintu-u la silan kan Kristu. 8Pigpasulat na Tyumanem asini muna:

“Pig-imo-an silan na Tyumanem na anenganeng na kasiling na utaw na to-o nyakatulug.

Awun mata nilan manang diliꞌ silan kumitaꞌ aw awun talinga nilan manang diliꞌ silan dumengeg

taman adun na manga allaw yeiy.”#11:8 Mabasa adti Déutéronomiyo 29:4 aw Isayas 29:10.

9Aw miglong si Dabid adti Tyumanem:

“Dun ni pagtambung nilan sa kanilan pista, kalitagan galu silan dun,

aw yan ya du-an na pagsungkul silan aw pa-emel-emelen asuntu sa pig-imoꞌ nilan.

10 Tumbayan na magkangitngit ya pag-inunu nilan pada diliꞌ silan kumitaꞌ.

Aw gayed silan pakabegati na manga kalugan.”#11:9-10 Mabasa adti Salmo 69:22-23.

11Aw musip aku: Sa pagpakasungkul na manga Judiyu, unu, diliꞌ da silan makalikuꞌ adti Tyumanem? Mabatug pa saba! Manang asuntu na piglakadan nilan ya manga suguꞌ na Tyumanem, nyakaselat baling ya manga Héntil migpakanyeg, yanagaw ya eped kanilan nyakaluwaꞌ da lekat adti pa-emel-emel na Tyumanem. Aw ya un sampetan yeiy, magkadaway ya manga Judiyu. 12Manang kun magi dun ni paglakad nilan ka-untungan ya kadég na utaw asini tas na lupaꞌ, aw kun magi dun ni pagkele nilan sa pagpaluwaꞌ na Tyumanem ka-untungan ya manga Héntil, na, to-o pa dun madyaw kun malingeb da ya kadég na Judiyu na mangintu-u.

Ya pagpaluwaꞌ sa manga Héntil

13Na, ini ya un ku paglongun kamayu na manga Héntil: Pigsuguꞌ aku na Tyumanem na ma-imoꞌ apostol adti kamayu pada pa-edeꞌ ya kanan tingeg, aw to-o ku pigbetang sa ginawa ya imo-unun na pigtaligu nan kanak. 14Pig-imoꞌ ku yeiy pada magkadaway ya manga kadégan ku na manga Judiyu, aw magi dun ni pagkadaway nilan makaluwaꞌ baling ya eped kanilan. 15Asuntu na pigpabaya-an silan na Tyumanem, ya eped na manga utaw nyakaselat baling migpalapit adti kanan. Yanagaw to-o pa madyaw kun dawaten salut na Tyumanem ya manga Judiyu, kay ya sampetan nan masiling silan na utaw na nyataw lekat adti pagkamatay.

16Ya manga Judiyu pigpa-unawa sa harina na pigmasa. Kun taniyen adti Tyumanem ya sallapid na muna piglutuꞌ, ya kadakulaꞌ na nyasamaꞌ alag da kana Tyumanem. Aw kasiling silan uman na kawuy, kun ya manga dalid pigtani la adti Tyumanem, ya manga sanga pigtani la uman adti Tyumanem.#11:16 Ya pyalabet ni Pablo asini birsikulu yeiy: Kun si Abraham aw si Isa-ak aw si Jakub pigpamalliꞌ da na Tyumanem, ya manga buwadbuwad nilan pigpamalliꞌ da uman na Tyumanem.

17Na, ya manga Judiyu pigpa-unawa uman sa kawuy na olibo na pig-utudan sa manga sanga. Aw kamu na manga Héntil kasiling kamu na manga sanga na olibo adti magalet na pigsugpat adti kawuy na pig-utudan. Yanagaw makasambuk da kamu adti manga Judiyu sa manga grasya na pig-atag na Tyumanem adti kanilan. 18Manang kamu na manga Héntil, diliꞌ mayu pag-anenganengen na to-o pa kamu madyaw sa manga Judiyu. Anenganenga ya manga sanga, diliꞌ mataw kun walaꞌ ya dalid. Ya manga dalid yan baling ya du-an na nyataw ya manga sanga. Yanagaw ya manga utaw na Isra-él, silan ya palangad manga dalid na yan ya agiyanan adti Tyumanem, aw bekeꞌ mayu na manga Héntil.

19Pagaw awun dun ni kamayu na maglong, “Awun eped na manga sanga na pig-utud pada sugpat kami na manga Héntil.” 20Matinaw saba ya piglong mu. Manang yan ya du-an na pig-utud silan kay walaꞌ nilan pangintu-uwi si Jisus. Aw dun ni pagpangintu-u mayu kanan, kasiling kamu na manga sanga na kawuy na pigsugpat. Yanagaw diliꞌ kamu magpalibantug manang kalleki mayu baling ya Tyumanem. 21Kay kun walaꞌ kallati na Tyumanem ya manga utaw na Isra-él na palangad manga sanga, diliꞌ kamu nan uman kallatan na palangad manga sanga na pigsugpat dun ni punu-an. 22Anenganenga mayu ya kallat na Tyumanem aw ya pa-emel-emel nan. Adti manga utaw na walaꞌ pangintu-u kan Kristu, pa-emel-emelen nan silan, manang adti manga nyangintu-u kanan, pigpakitaꞌ nan ya kanan kallat kun magpadeleg silan dun ni kanilan pagpangintu-u. Manang kun kamu na manga Héntil diliꞌ magpadeleg dun ni pagpangintu-u mayu kanan, utudun kamu nan uman. 23Aw ya manga utaw na Isra-él kun mangintu-u la silan kan Kristu, un silan uman likuꞌ sugpat na Tyumanem adti kawuy na pig-utudan da sa manga sanga nan idtu muna. Kay mabatug saba na Tyumanem ya pag-uliꞌ kanilan. 24Yanagaw idtu muna, kamu na manga Héntil, kasiling kamu na manga sanga na pig-utud lekat adti kawuy na olibo na adti magalet. Manang asuntu na nyangintu-u la kamu kan Kristu, kasiling na pigsugpat da kamu dun ni punu-an na kawuy na olibo na pigtanem. Aw to-o pa dun mabatug ya pagpalikuꞌ sa manga utaw na Isra-él kasiling na manga sanga na un likuꞌ sugpat adti kawuy na pig-utudan.

Ya kallat na Tyumanem sa kadég na manga utaw

25Kay manga inulug ku na nyangintu-u la, kaliman ku na to-o mayu kalabetan ya tengteng palpa na Tyumanem na pigtaguꞌ idtu muna pada diliꞌ kamu magpalibantug sa kamayu pagka-utawun. Ya kategelan na manga utaw na Isra-él taman oloꞌ na malingeb da ya kadég na manga Héntil na mangintu-u kan Kristu. 26Aw tigkas yan, paliku-un nan adti kanan ya kadég na manga utaw na Isra-él. Kay pigpasulat na Tyumanem asini muna:

“Awun Magpaluwa-ay na dumateng lekat adti Ziyon.

Aw un nan patenengen adti buwadbuwad ni Jakub ya kadakulaꞌ na malatay.

27 Kay yan ya kanak pakang adti kanilan

na lanasen ku ya manga salaꞌ nilan.”#11:26-27 Mabasa adti Isayas 59:20-21.

28Asuntu na pigkele͡an na manga utaw na Isra-él ya Madyaw na Ubat-ubat kan Kristu, nya-imoꞌ silan baling po-on na Tyumanem, aw kamu na manga Héntil ya kya-untungan. Manang asuntu na pigpamalliꞌ na Tyumanem ya manga utaw na Isra-él, kenneꞌ nan pigginawa͡an silan kay pigpakangan nan ya manga tyugbulan nilan. 29Kay diliꞌ saba ma-uman ya anenganeng na Tyumanem sa manga utaw na pigtawag nan aw pig-atagan nan sa grasya. 30Idtu muna, kamu na manga Héntil, walaꞌ kamu dalug sa Tyumanem. Manang kyallatan da kamu nan asuntu na walaꞌ dalug ya manga utaw na Isra-él. 31Maynan uman, pigtumbay na Tyumanem na diliꞌ silan adun dumalug sa manga suguꞌ nan pada dumateng ya allaw na pakitaꞌ nan ya kanan kallat kanilan kasiling na pagkallat nan kamayu. 32Awun saba tud na Tyumanem dun ni pagtumbay nan sa kadég na utaw na ma-allang silan na salaꞌ, pada pakitaꞌ nan kanilan ya kanan kallat.

Ya Tyumanem yan oloꞌ ya umbaꞌ deyen

33To-o dakulaꞌ ya kadyaw na Tyumanem! Diliꞌ ka͡apetan ya kanan katadeng aw ya kya-ede-an nan. Diliꞌ tadun kalabetan ya kanan manga pagbayaꞌ, aw diliꞌ tadun uman kalabetan ya kanan pa-agi, aw ya kanan manga pigpan-imoꞌ. 34Kay pigpasulat nan asini muna:

“Singalan ya nyaka-edeꞌ sa anenganeng na Tyumanem?

Aw singalan uman ya makapalna-u kanan kun unu ya un nan imo-un?”#11:34 Mabasa adti Isayas 40:13.

35 “Singalan ya nyuna nyatag kanan na un nan uliꞌ adti mig-atag?” #11:35 Mabasa adti Job 41:11.

36Kay ya Tyumanem, yan ya lyekatan sa kadakulaꞌ. Yan ya migdumala sa kadég, aw pig-imoꞌ nan silan na un magdeyen kanan. Aw yan oloꞌ ya deyen na walaꞌ ya tyamanan. Amén.

Currently Selected:

Roma 11: klgv

Highlight

Compare

Copy