Roma 10
10
1Kay manga inulug ku na nyangintu-u la, ya tengteng na kaliman ku aw ya gayed ku pyanawagtawagan adti Tyumanem na paluwa-en galu ya manga kadégan ku na Isra-él adti manga salaꞌ nilan. 2Makamatinaw aku na nyatibulluk silan dyumalug sa Tyumanem, manang walaꞌ nilan kalabeti ya imo-unun na tengteng makatutuk sa Tyumanem. 3Asuntu na migtibagseg silan mig-imoꞌ sa pa-agi na dawaten silan galu na Tyumanem, yanagaw walaꞌ nilan daluga ya pa-agi na Tyumanem kun unun nan ya pagdawat kanilan kasiling na walaꞌ da ya salaꞌ. 4Manang si Kristu yan ya miglingeb sa kadakulaꞌ na tud dun ni Uldin kay magi kanan dawaten na Tyumanem ya pangkay singalan na mangintu-u kanan.
Ya kadég na utaw mabatug da paluwa-en
5Na, kya-ede-an da tadun ya piglong ni Moysis asini muna kun unu ya pa-agi na dawaten na Tyumanem ya utaw. Aw yeiy ya pagtuman sa kadakulaꞌ na Uldin. Pigsulat ni Moysis: “Ya utaw na makatuman sa kadég na manga suguꞌ dun ni Uldin, yan ya utaw na makatagtun sa ginawa na walaꞌ ya katigkasan.”#10:5 Mabasa adti Libitiko 18:5.
6Manang ya manga utaw na pigdawat na Tyumanem kasiling na walaꞌ da ya salaꞌ magi sa pagpangintu-u nilan, diliꞌ silan maka-usip sa maynini: “Singalan ya un manik adti tas na langit?” (Ya kakawasan: un mangay kan Kristu aw papanogun asini tas na lupaꞌ.) 7Aw “Singalan uman ya un manog adti banwa na Kaludukan?” (Ya kakawasan: un angayen si Kristu lekat adti manga nyangkamatay.) 8Manang awun pigpasulat asini muna:
“Ya tingeg na Tyumanem malapit dun ni kanmu,
aw awun da ni anenganeng mu aw molas da mu paglongun.”#10:8 Mabasa adti Déutéronomiyo 30:14.
Aw ya tingeg na Tyumanem yeiy, gayed nami pigpa-edeꞌ adti madég na utaw pada mangintu-u silan kan Kristu. 9Kay kun ubat-ubat mu adti eped na utaw na si Jisus ya Matas na Pangulu aw kun mangintu-u kaw na pigmataw sakanan na Tyumanem lekat adti pagkamatay, na, paluwa-en kaw saba. 10Kay dawaten saba na Tyumanem ya utaw kasiling na walaꞌ da ya salaꞌ kun mangintu-u sakanan dun ni kadakulaꞌ na anenganeng nan. Aw kun ubat-ubat nan ya kanan pagpangintu-u, paluwa-en sakanan na Tyumanem. 11Kay pigpasulat na Tyumanem asini muna: “Ya kadég na nyangintu-u kanan, diliꞌ silan kabullugan.”#10:11 Mabasa adti Isayas 28:16. 12Yanagaw, adti Tyumanem mig-unawa la ya manga Judiyu aw ya manga Héntil. Kay ya Tyumanem yan ya Matas na Pangulu sa kadég, aw yan ya matag sa grasya adti kadég na mangintu-u kanan. 13Kay pigpasulat na Tyumanem asini muna: “Pangkay singalan ya magtawag adti Tyumanem, paluwa-en nan saba.”#10:13 Mabasa adti Joél 2:32.
14Manang unun nilan ya pagtawag kanan kun walaꞌ pa silan pangintu-u? Aw unun nilan uman ya pagpangintu-u kanan kun walaꞌ pa nilan dengega ya Madyaw na Ubat-ubat kan Kristu? Aw unun nilan ya pagpakadengeg sa Madyaw na Ubat-ubat kun walaꞌ ya mag-ubat-ubatay dun ni kanilan? 15Aw unun nilan ya pagpanaw na un mag-ubat-ubat kun walaꞌ ya migpadala kanilan? Kasiling na pigpasulat na Tyumanem: “To-o madyaw kun awun utaw na dumateng na un magpa-edeꞌ sa madyaw na ubat-ubat.”#10:15 Mabasa adti Isayas 52:7. 16Manang tabay oloꞌ ya dyumalug sa Madyaw na Ubat-ubat. Kasiling na piglong ni Isayas asini muna, law nan, “Kay Tyumanem, singalan ya nyangintu-u sa pig-ubat-ubat nami?”#10:16 Mabasa adti Isayas 53:1. 17Pangkay maynan ya nya-imoꞌ, manang adun, makapaglong kita na mabatug da saba na manga utaw ya pagpangintu-u kun dengegen nilan ya Madyaw na Ubat-ubat kan Kristu. Aw dengegen nilan yeiy kun awun utaw na magpa-edeꞌ kanilan.
18Pagaw awun utaw na musip, law nan, “Unu kaꞌ, walaꞌ pa dengega na manga utaw na Isra-él ya Madyaw na Ubat-ubat kan Kristu?” Ya tubag ku kanan, “Dyengeg da saba nilan! Kasiling na pigpasulat na Tyumanem kan Dabid:
‘Ya piglong nilan, nyabekkal da saba adti kadakulaꞌ na banwa
aw dyengeg da na kadég na utaw asini tas na lupaꞌ.’ ”#10:18 Mabasa adti Salmo 19:4.
19Pagaw awun pa uman utaw na maglong, “Basi walaꞌ na manga utaw na Isra-él kalabeti ya kakawasan na Madyaw na Ubat-ubat kan Kristu.” Ya tubag ku kanan, “Kyalabetan da saba nilan. Pangkay dun ni manga allaw ni Moysis, miglong ya Tyumanem kanilan:
‘Pakadawayen ku kamu sa eped na manga utaw na walaꞌ pa pakasambuk kanak.
Aw pakadamanen ku kamu asuntu na pakadyawun ku ya manga utaw na walaꞌ pa paka-edeꞌ kanak.’ ”#10:19 Déutéronomiyo 32:21.
20Aw walaꞌ ni Isayas tagu-tagu-a ya piglong na Tyumanem adti manga utaw:
“Kyinitaꞌ aku na manga utaw na Héntil, pangkay walaꞌ silan paninaw kanaken.
Aw migpakilala aku kanilan, pangkay walaꞌ silan usip kun singalan aku.”#10:20 Mabasa adti Isayas 65:1.
21Manang maynini ya pagkasampet na Tyumanem sa manga utaw na Isra-él:
“Gayed aku tyumagad kanilan na lumikuꞌ adi kanaken,
manang walaꞌ ya kalim nilan dumalug sa manga suguꞌ ku,
aw kenneꞌ na pangkategelan na anenganeng nilan.”#10:21 Mabasa adti Isayas 65:2.
Currently Selected:
Roma 10: klgv
Highlight
Share
Compare
Copy
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
