Roma 12

Ya manga imo-unun na utaw na nyangintu-u la

1Yanagaw, kay manga inulug, asuntu sa kadakulaꞌ na kallat na Tyumanem, manginayuꞌ aku na imo-un mayu ya kamayu pagka-utawun kasiling na dugsuꞌ na yan ya tengteng pagsimba sa Tyumanem. Walaꞌ aku paglong na patayen mayu ya kamayu pagka-utawun, manang tumbayan mayu baling adti kanan ya kadakulaꞌ na kamayu pagka-utawun pada taniyen na un makatutuk kanan. 2Diliꞌ mayu pagsilingan ya bet na manga utaw na walaꞌ pangintu-u sa Tyumanem. Manang pabaguwan baling sa Tyumanem ya kamayu anenganeng pada ka-ede-an mayu ya tengteng pagkaliman nan, aw kalabetan mayu kun unu ya madyaw aw ya makatutuk kanan, aw kun unu ya umbaꞌ imo-un.

3Na, asuntu sa katundanan na pig-atag kanak na Tyumanem, paglongun ku ya kadég mayu: Diliꞌ kamu mag-anenganeng na to-o pa kaw madyaw kay sa eped mayu. Manang anenganengen mayu baling na ya tagsambuksambuk kamayu awun katadeng na pig-atag na Tyumanem na umbaꞌ sa kanan pagpangintu-u. 4Kay kasiling na lawas na utaw, awun madég na punganan aw walaꞌ pag-unawa ya manga imo-unun nilan. 5Maynan uman kitadun na manga mangintu-uway, pangkay madég kitadun, manang sambuk da kitadun na lawas dun ni pagpakasambuk tadun kan Kristu. 6Aw asuntu sa kallat na Tyumanem, pig-atagan da nan ya tagsambuksambuk kanaten sa punganan na katadeng na walaꞌ pag-unawa. Yanagaw gamiten tadun ya pig-atag nan. Kun pig-atagan kaw nan sa pag-ubat-ubat sa un nan pa-edeꞌ, imo-a yan magi sa kanmu pagpangintu-u. 7Aw kun pig-atagan kaw nan sa pagtabang sa manga eped na utaw, pakadyawa ya pagtabang kanilan. Aw kun pig-atagan kaw nan sa katadeng magpalna-u sa tingeg nan, pakadyawa ya pagpalna-u sa manga utaw. 8Kun pig-atagan kaw nan sa katadeng magpakabagseg sa ginawa na manga eped, pakadyawa ya pagpakabagseg kanilan. Aw kun pig-atagan kaw nan sa bet na mag-atag adti manga utaw na tagituꞌ, pagkanimbet kaw kanilan na walaꞌ ya eped na tud. Aw kun pig-atagan kaw nan sa paggagad sa eped na manga mangintu-uway, kasebi ya pigtaligu kanmu na Tyumanem. Kun pig-atagan kaw nan sa pagkallat sa manga utaw na makalalat, imo-a yeiy na awun pagleya.

9Diliꞌ kamu magtallalingu dun ni kamayu paggaginawa͡ay. Kele͡an mayu ya malatay. Aw gayed tibulluka ya pag-imoꞌ sa madyaw. 10Maggaginawa͡ay ya kadég mayu kay mangkaylug kamu saba dun ni kan Kristu. Diliꞌ mayu pag-olo-un ya kamayu pagka-utawun, manang pagbabasa͡ay kamu baling. 11Diliꞌ kamu magkataka. Pagkaseb kamu aw tibulluka ya kamayu anenganeng dun ni imo-unun na Tyumanem. 12Pagleya kamu talana mayu tyumagad sa kadég na pigpalpa na Tyumanem kamayu. Ti-isa mayu ya manga kalugan na dumateng kamayu. Aw panawagtawag kamu gayed adti Tyumanem. 13Kun awun kapelek na manga mangintu-uway, kamu ya magtabang kanilan. Aw kun awun maka-ibwang adti kamayu, sanggila-a mayu silan.

14Panawagtawag kamu sa Tyumanem na pakadyawun nan ya manga utaw na nyamulayam kamayu, aw diliꞌ mayu pagpanawagtawagan na tullunun nan silan. 15Kun awun eped mayu na migleya, agad kamu sa pagleya nilan. Kun awun eped mayu na migkalat ya ginawa, agad kamu uman dun ni pagkalat na ginawa nilan. 16Pagsambuka ya anenganeng mayu. Diliꞌ kamu magpatastas sa kamayu pagka-utawun manang pagpa-iyeped kamu baling sa manga utaw na madalem ya pagpakabetang. Diliꞌ kamu mag-anenganeng na matas pa ya kamayu katadeng kay sa kamayu eped. 17Kun awun utaw na mag-imoꞌ sa malatay adti kamayu, diliꞌ kamu magbalus kanilan. Aw pangkay unu ya madyaw na imo-unun na diliꞌ pagsala-en, yan ya imo-a mayu. 18Taman na mabatug mayu, tibagsegi na awun kalinaw mayu adti kadég na manga utaw.

19Kay manga inulug ku na kanak pigginawa͡an, diliꞌ kamu magmalit sa utaw na migpakalat kamayu. Manang tumbayan mayu baling silan adti kadaman na Tyumanem. Kay awun pigpasulat na Tyumanem asini muna, law nan:

“Aku ya magmalit.

Aku ya magpa-emel-emel sa manga utaw na migpakalat kamayu.”#12:19 Mabasa adti Déutéronomiyo 32:35.

20Manang ini baling ya madyaw mayu imo-un:

“Kun magetem ya po-on mu, pakana sakanan.

Kun talaynemen, pa-inema sakanan.

Aw magi sa pig-imoꞌ mu,

kamulamula͡an nan ya pig-imoꞌ nan na malatay kanmu.”#12:20 Mabasa adti Probirbiyo 25:21-22.

21Diliꞌ mayu paggagaden ya ginawa mayu adti pagmalit na yan ya dumeg kamayu, manang pakadyawa mayu baling ya utaw na migpakalat kamayu pada degen mayu ya malatay.

Currently Selected:

Roma 12: klgv

Highlight

Compare

Copy