Pigbukasan 9

1Aw pig-eyep na kalima na anghil ya trumpita nan, aw awun kyinitaꞌ ku na nyanog, aw kasiling sakanan na bitun na nyolug lekat adti tas na langit. Aw yan saba ya anghil na pig-atagan na lyabi sa sab na gawang na walaꞌ ya katantanan. 2Aw pigkamang nan ya sab na gawang, aw tigkan nyullut ya to-o madakmel na ebel kasiling na bulkan na nyutu. Aw migkalabnaw ya sega aw migkangitngit ya kadakulaꞌ na banwa. 3Aw lyumekat dun ni ebel ya madég na manga dulun, aw dyumapuꞌ silan dun ni lupaꞌ. Aw pig-atagan silan na katulus magpati-is sa manga utaw kasiling na pigbangaꞌ na sangalan. 4Manang pigpigil kanilan ya pagkan sa manga sagbet aw manga kawuy, aw eped pa na manga tanem. Yan oloꞌ ya pamulayaman nilan ya manga utaw na walaꞌ ya marka na Tyumanem dun ni bayuꞌ nilan. 5Aw seled na limambulan ya pagpamulayam kanilan. Manang walaꞌ kanilan tumbayan na patayen ya manga utaw. Aw ya kasakit na pigbatiꞌ nilan kasiling na pigbangaꞌ na sangalan. 6Yanagaw ya manga utaw yeiy kaliman da nilan galu na maksay mangkamatay. Manang diliꞌ silan matay.

7Na, ya lawas na manga dulun yeiy kasiling na manga kudaꞌ na nyakatagilan da sa dakulaꞌ na tanam. Awun pigtulung nilan na kasiling na korona na bulawan. Aw ya gya nilan liwan na gya na utaw. 8Aw ya lugay nilan kasiling na lugay na ka͡ubayan. Aw ya untu nilan kasiling na untu na liyon. 9Aw awun nyakatampeng sa aba nilan, kasiling na imbis na alag putaw. Aw ya kagabkab na manga panid nilan, kasiling na kagalkal na madég na kalisa na pyangguyud na manga kudaꞌ na migpasinan da adti dakulaꞌ na tanam. 10Aw ya ikug nilan, kasiling na ikug na sangalan na awun tinga, aw pigtumbay adti ikug nilan na mamulayam sa manga utaw seled na limambulan. 11Aw awun hariꞌ na migdumala kanilan, na yan ya sambuk na anghil na pigkalabusu na Tyumanem asini muna dun ni gawang na walaꞌ ya katantanan. Ya ngalan nan adti tingeg na Hibriyu: Abadon. Aw adti tingeg na Grigo: Apolyon.

12Pagkatigkas da na tagnaꞌ na pyagamak na to-o kallekanan, awun pa uman duwa ya pagamak na dumadateng pa.

13Pagkatigkas yan, pig-eyep na ka͡enem na anghil ya trumpita nan. Aw awun dyengeg ku na tingeg na lyumekat adti upat ya suwag na awun ni sunuganan na insénso na alag bulawan na nyakabetang adti asdangan na Tyumanem. 14Aw miglong ya tingeg adti ka͡enem na anghil, “Buliyi la ya upat ya anghil na pig-eketan ku awun ni dakulaꞌ na gangaꞌ na tubig na Yupratis.” 15Yanagaw pigbuliyan da ya upat ya anghil na pigtagilan da dadan na yan na udas pamatayen nilan ya katluwan tag tulu (33) ka porsinto ya manga utaw. 16Aw pig-ubat kanak na ya kadég na manga sundalu nilan na nyampangudaꞌ duwanggatus ka milyon (200,000,000). 17Aw maynini ya pigpakitaꞌ kanak sa manga kudaꞌ aw sa manga nyansakay: Ya manga sundalu na syumakay, pigtampeng ya aba nilan na putaw na kasiling na imbis na awun tulu ya batek: mapula kasiling na atulun, aw malunaw kasiling na tubig na danaw, aw malalag. Aw ya ulu na manga kudaꞌ nilan, kasiling na ulu na liyon, aw awun lyumuwaꞌ lekat adti bakaꞌ nilan na laga aw ebel aw asupri. 18Yanagaw magi sa laga aw ebel aw asupri, nyangkamatay ya katluwan tag tulu (33) ka porsinto ya manga utaw. 19Kay pigtumbay adti manga kudaꞌ ya pagpati-is sa manga utaw magi sa kanilan bakaꞌ aw sa kanilan ikug na kasiling na kamugung.

20Manang ya nyasamaꞌ na manga utaw na walaꞌ kamatay asuntu sa tulu ya pyagamak yeiy, kenneꞌ na walaꞌ silan pagselsel sa manga pigpan-imoꞌ nilan. Migpadeleg silan baling migsimba sa manga busaw aw sa manga inutaw na pig-imoꞌ lekat adti bulawan, aw bulawan na maputiꞌ, aw bronsi, aw batu, aw kawuy, pangkay ya manga inutaw yeiy diliꞌ magkitaꞌ aw diliꞌ magpakadengeg aw diliꞌ magpakapanaw. 21Aw walaꞌ silan pagselsel sa pagpatay nilan sa utaw aw sa pagkatalagamutan nilan, aw sa pagkasala-enen, aw sa kanilan pagtakawunun.

Currently Selected:

Pigbukasan 9: klgv

Highlight

Copy

Compare