Pigbukasan 10

Ya tagbiꞌ na libru na paglulunun

1Pagkatigkas yan, awun kyinitaꞌ ku uman na anghil na to-o kesegan na nyanog lekat adti tas na langit. Nyaputus sakanan na labun aw awun balangawan adti tas na ulu nan. Aw ya kalalamdag na gya nan kasiling na sega. Aw ya manga siki nan, kasiling na laga na atulun. 2Aw awun pig-awidan nan na tagbiꞌ na libru na paglulunun na dadan da pig-ulad. Sa pagdateng nan asini tas na lupaꞌ, pigginaꞌ nan ya kalintu na siki nan adti dagat, aw ya kawala pigginaꞌ nan uman adti lupaꞌ. 3Aw migtatawag sakanan sa dakulaꞌ na tingeg, aw ya tingeg nan kasiling na tulangeb na liyon. Aw pigtubag na pitu ya dalakalak. 4Aw sa un da ku galu sulaten ya tubag nilan, awun dyengeg ku na tingeg na lekat adti tas na langit na miglong, “Ya-i pagsulata ya pigtubag na pitu ya dalakalak, aw diliꞌ mu uman pag-ubat-ubat adti eped na utaw.”

5Pagkatigkas yan, ya idtu na gyuminaꞌ adti dagat aw adti magdang na lupaꞌ, pigbitil nan ya kalintu na bekten nan adti langit. 6Aw migsapaꞌ sakanan dun ni ngalan na Tyumanem na walaꞌ ya tyamanan na yan ya mig-imoꞌ sa langit aw lupaꞌ aw dagat aw ya kadég na tagbanwa nilan. Aw ini ya sapaꞌ nan: “Diliꞌ da tagenan ya un dumateng! 7Kay ya palpa na Tyumanem pigpa-edeꞌ da nan dadan adti manga sugu-anen nan na manga propita, manang walaꞌ pa kabangal adti kadég na utaw mendaꞌ adun. Manang pagdateng na allaw na eyepen da na kapitu na anghil ya kanan trumpita, dun da katuman ya kadég na pigpalpa dadan na Tyumanem.”

8Pagkatigkas yan, dyengeg pa ku uman salut ya tingeg na lyumekat adti tas na langit, law nan, “Kadtuwi ya gyuminaꞌ adti dagat aw adti lupaꞌ, aw kamanga adti tulluꞌ nan ya libru na dadan da pig-ulad.” 9Yanagaw kyadtuwan ku sakanan aw pigsekat ku ya tagbiꞌ na libru na paglulunun. Aw piglongan aku nan, “Kamanga ya libru ini aw kana. Sa pagkan mu seiy, matamis kasiling na degaꞌ manang pagdateng da adti seled na buntit mu magkapayit.” 10Aw pigkamang ku ya tagbiꞌ na libru dun ni tulluꞌ na anghil aw maksay ku pigkan. Aw matinaw saba ya piglong nan. Matamis ya libru kasiling na degaꞌ, manang pagdateng da adti seled na buntit ku, migkapayit da.

11Aw awun miglong kanak, “Ka-ilangan na padelegen mu ya pagpa-edeꞌ sa un dumateng adti kadég na manga utaw pangkay unu nasuda ya pig-eya-an nilan, aw kun unu ya punganan na tingeg nilan, aw dala uman ya manga hariꞌ na migdumala kanilan.”

Currently Selected:

Pigbukasan 10: klgv

Highlight

Copy

Compare