Pigbukasan 8

Ya pagkamang sa kapitu na silyu

1Na, sa pagkamang na Nati na Karniro sa kapitu na silyu na libru, awun katinep dun ni tas na langit seled na tengaꞌ ya udas. 2Aw kyinitaꞌ ku ya pitu ya manga anghil na gayed nyan-indeg dun ni asdangan na Tyumanem. Aw pig-atagan ya tagsambuksambuk kanilan na trumpita.

3Aw dyumulud uman ya sambuk na anghil aw nyindeg adti sunuganan sa insénso na awun ni asdangan na trunu. Aw dyumala sakanan sa pa-ebelanan na alag bulawan. Aw pig-atag kanan ya madég na insénso aw pigsunug nan dun ni sunuganan na alag uman bulawan, pada pa-eped sa manga pagpanawagtawag na kadég na manga mangintu-uway kan Jisu-Kristu. 4Aw nyullut ya ebel lekat adti pig-awidan na anghil na pa-ebelanan, eped na pagpanawagtawag nilan dun ni asdangan na Tyumanem. 5Pagkatigkas yan, pigkamang na anghil ya pa-ebelanan aw pigbetangan nan na manga baga lekat adti sunuganan. Aw pig-agbel nan adti tas na lupaꞌ. Aw nyangkalablab ya kilat aw kya-agadan na dadaneg aw dalakalak, aw linug.

Ya manga trumpita

6Na, migtagilan ya pitu ya manga anghil sa trumpita na un da nilan eyepen. 7Aw sa pag-eyep na tagnaꞌ na anghil sa trumpita nan, nyulan na ayis asini tas na lupaꞌ aw atulun na kya-agadan na duguꞌ. Aw nyangkasunug ya katluwan tag tulu (33) ka porsinto ya lupaꞌ na magdang dala ya manga kawuy. Aw nyabus nyangkasunug ya malunaw na sagbet.

8Sa pag-eyep na kadwa na anghil sa trumpita nan, awun nyolug adti dagat na liwan na to-o dakulaꞌ na buntud na lyumaga. 9Aw ya katluwan tag tulu (33) ka porsinto ya dagat migbaluy duguꞌ, aw nyangkamatay ya katluwan tag tulu (33) ka porsinto ya tagbanwa na dagat, aw migkalat uman ya katluwan tag tulu (33) ka porsinto ya manga barko aw balangay dun.

10Pagkatigkas yan, pig-eyep na katlu na anghil ya trumpita nan, aw awun uman nyolug lekat adti langit na to-o dakulaꞌ na bitun pasinan adti magdang na lupaꞌ. Aw kyolugan nan ya katluwan tag tulu (33) ka porsinto ya manga mangkabaklaꞌ na gangaꞌ aw manga tyugbulan na tubig. 11Aw ya ngalan na bitun yeiy, Mapayit. Aw nyangkabaleng ya kadég na nyaka-inem sa tubig yan. Aw madég ya manga utaw na nyangkamatay asuntu sa pag-inem nilan.

12Pagkatigkas yan, pig-eyep na kapat na anghil ya trumpita nan, aw migkangitngit ya katluwan tag tulu (33) ka porsinto ya silat na sega, aw maynan uman ya bulan aw manga bitun. Yanagaw kun allaw, katluwan tag tulu (33) ka porsinto ya magkangitngit, aw kun gabi maynan uman ya nya-imoꞌ sa bulan aw manga bitun.

13Pagkatigkas yan, awun kyinitaꞌ ku na malambegek na lyumupad adti dalem na langit, aw dyengeg ku ya dakulaꞌ na tingeg nan na miglong, “Dakman tulu ya manga anghil na walaꞌ pa pag-eyep sa trumpita nilan. Aw sa pag-eyep nilan, to-o malatay ya un datengan na manga nyeyaꞌ dun ni kadakulaꞌ na banwa!”

Currently Selected:

Pigbukasan 8: klgv

Highlight

Copy

Compare