Pigbukasan 5

Ya libru na paglulunun aw ya Nati na Karniro

1Pagkatigkas yan, awun kyinitaꞌ ku na libru na paglulunun na pig-awidan na kalintu na nyingkud dun ni trunu. Ya libru yeiy pigsulatan alag adti seled aw adti luwaꞌ, aw awun pitu ya silyu pada diliꞌ ma-ulad na pangkay singalan. 2Aw kyinitaꞌ ku uman ya sambuk na anghil na kesegan, aw nyusip sakanan magi sa dakulaꞌ na tingeg, law nan, “Singalan ya umbaꞌ magkamang sa manga silyu aw mag-ulad sa libru yeiy?” 3Manang walaꞌ ya pangkay sambuk na umbaꞌ mag-ulad aw magtanaw sa adti seled na libru yeiy, pangkay adti tas na langit aw asini tas na lupaꞌ aw adti dalem na lupaꞌ. 4Yanagaw to-o aku migsugaw asuntu na walaꞌ ya pangkay sambuk na umbaꞌ mag-ulad aw magtanaw sa adti seled na libru yeiy. 5Manang miglong kanak ya sambuk na lekat adti kaluwa͡an tag upat (24) ya magdadumala͡ay, law nan, “Diliꞌ kaw magsugaw! Inunuwa! Awun saba sambuk na umbaꞌ mag-ulad sa libru iyan. Pigtawag sakanan na Liyon, lekat adti pamilya ni Juda, aw yan ya pigpakang na un lumekat adti buwadbuwad ni Dabid. Aw pigdeg da nan ya kanan manga po-on. Yanagaw yan oloꞌ ya umbaꞌ magkamang sa pitu ya silyu aw mag-ulad sa libru iyan.”

6Aw kyinitaꞌ ku ya Nati na Karniro. Nyindeg sakanan malapit dun ni trunu adti tenga-tengaꞌ na upat ya sangkamuluꞌ na pig-imoꞌ na Tyumanem aw manga magdadumala͡ay. Aw ya Nati na Karniro, awun manga ulat nan asuntu sa pagpatay kanan. Awun pitu ya mata nan aw pitu uman ya suwag nan. Aw ya pitu ya mata, yan ya Ispiritu Santo na pigpadala na Tyumanem adti kadakulaꞌ na banwa. 7Aw pigkamang na Nati na Karniro ya libru lekat adti kalintu na nyingkud dun ni trunu. 8Aw sa pagkamang nan sa libru, lyumuhud adti asdangan nan ya upat ya sangkamuluꞌ na pig-imoꞌ na Tyumanem aw ya kaluwa͡an tag upat (24) ya magdadumala͡ay, aw pigsimba nilan sakanan. Aw alag silan kyatpedan na arpa, aw ya tagsambuksambuk kanilan nyawid sa lipung na bulawan na nyangkatmuꞌ na insénso. Aw ya ebel na insénso, yan ya palangad pagpanawagtawag na manga mangintu-uway kan Jisus. 9Aw migdalangan silan sa bagu na dalangan na maglong:

“Ikaw oloꞌ ya umbaꞌ magkamang sa libru na paglulunun aw magkamang sa manga silyu.

Kay dun ni pagpatay kanmu piglekat mu ya manga utaw magi sa kanmu duguꞌ, pada ma-imoꞌ silan kana Tyumanem utaw.

Lekat silan adti kadég na manga nasud, aw kadég na tribu na miglong sa madég na manga punganan na tingeg.

10Aw pig-imoꞌ mu silan kasakupan na kanmu pighari-an, aw kasiling silan na manga magdadugsu-ay na migtabang sa imo-unun na Tyumanem.

Aw maghariꞌ silan eped mu dun ni tas na lupaꞌ.”

11Aw tigkas yan, awun kyinitaꞌ ku na to-o madég na manga anghil na diliꞌ ma-iyap. Nyakapalibed silan sa trunu aw sa upat ya sangkamuluꞌ na pig-imoꞌ na Tyumanem aw sa kaluwa͡an tag upat (24) ya magdadumala͡ay. Aw dyengeg ku ya tingeg na manga anghil 12na migdengan miglong sa mabagseg na tingeg:

“Ikaw saba ya Nati na Karniro na pigpatay, yanagaw ikaw ya umbaꞌ deyen.

Dakulaꞌ ya kanmu katulus, aw ikaw ya tagtun sa kadég.

Ikaw ya to-o matadeng, aw to-o kaw kesegan.

Ikaw ya umbaꞌ patasen aw basa͡an, aw ikaw saba ya umbaꞌ dumawat sa pagdeyen na kadég.”

13Pagkatigkas yan, dyengeg ku uman ya kadég na awun ginawa na adti tas na langit, aw ya kadég na asini tas na lupaꞌ, aw ya kadég na awun ni dalem na lupaꞌ, aw ya kadég na awun ni tubig, aw alag silan migdalangan, law nilan:

“Naten deyen ya nyingkud adti trunu.

Aw deyen tadun ya Nati na Karniro.

To-o silan basa͡an asuntu sa kanilan dengeg aw kanilan katulus.

Naten silan deyen na walaꞌ ya tyamanan!”

14Aw ya upat ya sangkamuluꞌ na pig-imoꞌ na Tyumanem, miglong silan, “Amén!” Aw lyumuhud ya manga magdadumala͡ay aw pigsimba nilan ya nyingkud adti trunu aw ya Nati na Karniro.

Currently Selected:

Pigbukasan 5: klgv

Highlight

Copy

Compare