Pigbukasan 4
4
Ya pagsimba adti tas na langit
1Aw pagkatigkas yan, awun pa uman pigpakitaꞌ kanaken: Adti tas na langit awun suwangan na kya-uwangan da. Aw dyengeg ku uman salut ya tingeg na kasiling na uni na trumpita, aw law nan kanak, “Panik kaw adi! Pakitaꞌ ku kanmu kun unu ya ka-ilangan ma-imoꞌ adti dumadateng pa.” 2Aw tigkan awun pigpakitaꞌ kanak na Ispiritu Santo kasiling na tagaynep. Awun pigkitaꞌ ku na trunu adti tas na langit na awun nyingkud. 3Aw ya nyingkud dun, ya lawas nan migkilangkilang kasiling na batu na haspi aw cornalina. Aw ya trunu, kyapalibedan na balangawan na ya batek nan kasiling na ésméralda. 4Awun pa uman nyakapalibed sa trunu na kaluwa͡an tag upat (24) ya ingkudanan na to-o madyaw. Aw ya manga nyan-ingkud dun, silan ya manga magdadumala͡ay. Migkadégkadég silan sa maputiꞌ, aw awun korona nilan na alag bulawan. 5Awun kilat na lyumekat adti trunu, aw kya-agadan na dadaneg aw dalakalak. Aw dun ni asdangan na trunu awun pitu ya saleng na lyumaga na yeiy ya Ispiritu Santo. 6Aw dun uman ni asdangan na trunu, awun kyinitaꞌ ku na kasiling na dagat na to-o matinaw aw migkilangkilang.
Aw awun uman nyakapalibed dun ni trunu na upat ya sangkamuluꞌ na pig-imoꞌ na Tyumanem aw awun ginawa nilan. Ya aba aw bagakwang nilan alag nyatmuꞌ na mata. 7Ya sambuk kanilan kasiling na liyon. Aw ya kadwa kasiling na tudu na baka. Aw ya katlu, ya gya nan kasiling na utaw. Aw ya kapat kasiling na malambegek na lyumupad. 8Aw ya tagsambuksambuk kanilan awun enem ya panid, aw alag nyatmuꞌ na mata ya kadakulaꞌ na lawas nilan, dala ya adti dalem na manga panid nilan. Allaw aw gabi walaꞌ silan teneng paglong, law nilan:
“Ya Tyumanem, walaꞌ ya salaꞌ dun ni kanan, aw walaꞌ ya maka-unawa kanan, aw walaꞌ ya pagsalaꞌ sa Tyumanem na migdumala sa kadég.
Kay ya Tyumanem, gayed awun sakanan pangkay adun, aw pangkay asini muna, aw pangkay sa dumadateng pa!”
9Maynan ya pagdeyen nilan sa nyingkud adti trunu asuntu sa kadyaw na pagka Tyumanem nan, aw pigbasa͡an nilan aw pigpasalamatan ya gayed awun na walaꞌ ya tyamanan. Aw sa pagdeyen nilan kanan, 10ya kaluwa͡an tag upat (24) ya magdadumala͡ay lyumuhud adti asdangan na nyingkud dun ni trunu na yan ya gayed awun na walaꞌ ya tyamanan. Aw pigsimba nilan sakanan, aw pigbetang nilan adti asdangan na trunu ya manga korona nilan. Aw alag silan migdeyen na miglong:
11“Ikaw na kanami Tyumanem aw Matas na Pangulu,
ikaw oloꞌ ya umbaꞌ patasen aw basa͡an.
Aw pigdeyen kaw nami asuntu sa dakulaꞌ na katulus mu.
Kay ikaw ya mig-imoꞌ sa kadég magi sa kanmu pagkaliman.”
Currently Selected:
Pigbukasan 4: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
