Pigbukasan 6

Ya pagkamang sa manga silyu

1Aw kyinitaꞌ ku ya Nati na Karniro na migkamang sa tagnaꞌ na silyu na libru na paglulunun. Aw dyengeg ku ya piglong na sambuk na lekat adti upat na sangkamuluꞌ na pig-imoꞌ na Tyumanem, aw ya tingeg nan kasiling na dalakalak. Aw law nan, “Kaksay kaw kadi!” 2Aw tigkan awun kyinitaꞌ ku na kudaꞌ na maputiꞌ, aw ya syumakay nyawid sa busug aw papanaꞌ. Pigkoronahan sakanan kay yan ya pangilala na awun katundanan nan. Aw maksay nan pigpapalaguy ya kudaꞌ nan kay un da nan degen ya kanan manga po-on.

3Aw sa pagkamang na Nati na Karniro sa kadwa na silyu na libru, dyengeg ku ya tingeg na kadwa na sangkamuluꞌ na pig-imoꞌ na Tyumanem, law nan, “Kaksay kaw uman kadi!” 4Aw tigkan awun kyinitaꞌ ku na kudaꞌ na mapula. Aw ya syumakay pig-atagan na dakulaꞌ na kampilan, aw pigtumbay adti kanan na kamangen ya kalinaw lekat adti kadakulaꞌ na banwa pada magpapatayay ya manga utaw aw magkapnasen silan.

5Aw sa pagkamang na Nati na Karniro sa katlu na silyu na libru, dyengeg ku ya tingeg na katlu na sangkamuluꞌ na pig-imoꞌ na Tyumanem, law nan, “Kaksay kaw uman kadi!” Aw tigkan awun kyinitaꞌ ku na kudaꞌ na maytem. Aw ya syumakay awun pig-awidan nan na timbangan. 6Aw awun dyengeg ku na iman mu tingeg na lekat dun ni tengaꞌ na upat ya sangkamuluꞌ na pig-imoꞌ na Tyumanem, aw law na tingeg, “Un dumateng ya dakulaꞌ na getem. Aw ya duwangka supa ya harina na trigu, sangka dinariyo ya alagaꞌ.#6:6a Ya kuwalta na sangka dinariyo, yan ya tandan sa utaw na sangallaw nan talabahuwan. Aw ya sangka gantang ya harina na sibada, sangka dinariyo ya alagaꞌ. Manang yan oloꞌ ya diliꞌ mu pag-ilabetan ya manga kawuy na olibo aw ya manga paras!”#6:6b Ya kaliman na Tyumanem na mataw pa ya manga utaw pada magselsel pa silan. Yanagaw walaꞌ pakalatan na Tyumanem ya manga kawuy na olibo na pagkamangan sa mantikaꞌ aw lana, aw ya manga parasan na pagkamangan sa bino aw babulung.

7Aw sa pagkamang na Nati na Karniro sa kapat na silyu na libru, dyengeg ku ya tingeg na kapat na lekat adti manga sangkamuluꞌ na pig-imoꞌ na Tyumanem, law nan, “Kaksay kaw kadi!” 8Aw tigkan awun kyinitaꞌ ku na kudaꞌ na malalaglalag. Aw ya ngalan na syumakay, yan si Kamatayen. Aw ya dyumalug kanan si Kaludukan. Aw pigtumbay kanilan na dumala sa manga kagamakan adti kaluwa͡an tag lima (25) ka porsinto na kadég na awun ginawa asini tas na lupaꞌ pada matay silan asuntu sa dakulaꞌ na tanam, aw getem, aw manga magkedel, aw asuntu uman sa manga mangkabulut na mannanap.

Ya awun ni dalem na sunuganan sa insénso

9Aw sa pagkamang na Nati na Karniro sa kalima na silyu na libru, awun kyinitaꞌ ku na sunuganan. Aw dun ni dalem na sunuganan yeiy, kyinitaꞌ ku ya manga kalaluwa na manga mangintu-uway na pigpatay asuntu sa pagdalug nilan sa tingeg na Tyumanem aw sa pagpa-edeꞌ nilan adti manga utaw kan Jisus. 10Aw migtatawag silan sa Tyumanem magi sa dakulaꞌ na tingeg, law nilan, “We…kay Matas na Pangulu na tyumakmag sa kadég, walaꞌ ya salaꞌ dun ni kanmu aw matinaw ya kanmu pagbayaꞌ. Kinunu mu ukumi aw pa-emel-emela ya manga utaw na diliꞌ malim mangintu-u kanmu? Aw kinunu mu uman maliti ya kanami duguꞌ asuntu sa pagpatay nilan kanami?” 11Aw tigkas yan, pig-atagan ya tagsambuksambuk kanilan na mangkatas na kadégkadég na maputiꞌ. Aw piglongan silan na maglagdeng aw magtagad pa silan dagawdagaw, mendaꞌ sa allaw na malingeb da ya pagpamatay sa kadég na manga eped nilan na sugu-anen na Tyumanem na un pa pamatayen kasiling nilan.

Ya manga pangilala adti langit aw asini lupaꞌ

12Sa pagkamang na Nati na Karniro sa ka͡enem na silyu na libru, tigkan awun linug na to-o mabagseg. Aw migkaytem ya sega kasiling na téla na to-o maytem, aw migkapula ya bulan kasiling na duguꞌ. 13Aw ya manga bitun adti langit nyangkolug kasiling na bunga na igira na nyangkataktak na pig-eyeng na mabandes na samet. 14Aw ya langit nyatengaꞌ aw dayaw migsuway. Aw ya kadég na manga buntud, nyangka-alin lekat adti kyabetangan nilan. Aw maynan uman ya manga puluꞌ. 15Aw to-o nyangkallek ya kadég na manga utaw, pangkay ya manga hariꞌ, aw manga magdadumala͡ay, aw manga hénéral, aw manga mayaman, aw manga mangkatas na migdumala. Aw ya kadég na utaw pangkay allang aw bekeꞌ na allang, alag silan nyan-ebeng adti manga ilib aw dun ni mangkabaklaꞌ na batu adti buntud. 16Aw pigtawag nilan ya manga buntud aw mangkabaklaꞌ na batu, law nilan, “Gettani kami! Tabuni kami pada diliꞌ da kumitaꞌ kanami ya nyingkud adti trunu. Aw diliꞌ kami uman malim na lemenen ya kadaman na Nati na Karniro. 17Kay dyumateng da ya allaw na to-o kallekanan na yan ya pagpa-emel-emel nilan. Singalan kaꞌ ya makati-is seiy?”

Currently Selected:

Pigbukasan 6: klgv

Highlight

Copy

Compare