Pilipos 4
4
Ya eped na piglong ni Pablo
1Kay manga inulug na kanak pigginawa͡an, kaliman ku galu na magkakita͡ay kitadun. To-o aku migleya kamayu, aw kamu saba ya pigpalibantug ku. Yanagaw, nyanginayuꞌ aku kamayu na gayed mayu pakasaligen ya kamayu pagpangintu-u kan Jisus.
2Aw nyanginayuꞌ aku uman kan Yodiya aw si Sintiki na magka-iyuliꞌ ya ginawa nilan kay sambuk da silan dun ni kan Kristu. 3Aw awun sambuk dun ni kamayu na un ku sekaten adti kanan na magpatengaꞌ sa duwa ya ka͡ubayan yeiy. Kay maseb du-an silan migtabang kanak dun ni pagpa-edeꞌ sa Madyaw na Ubat-ubat kan Kristu, dala uman si Kléménti aw kadég na eped ku. Kay ya kanilan ngalan alag nyakasulat adti listahan na Tyumanem sa manga utaw na pig-atagan da na ginawa na walaꞌ ya katigkasan.
4Pagleya kamu gayed asuntu na nyakasambuk da kamu kan Jisus. Salutun pa ku uman ya paglong kamayu na pagleya kamu! 5Pakadyawa mayu ya kadég na utaw. Kay malapit da ya paglikuꞌ na kanaten Matas na Pangulu na si Jisus. 6Diliꞌ magkakamang ya ginawa mayu sa pangkay unu. Manang panawagtawagi mayu baling adti Tyumanem ya kadég yeiy, aw pagsekat kamu sa tabang nan. Aw pasalamati mayu sakanan. 7Kun imo-un mayu yeiy, un atag na Tyumanem kamayu ya kalinaw. Aw ya kalinaw na lekat adti kanan diliꞌ tadun mabatug kalabetan, manang yan ya magtameng sa ginawa aw anenganeng mayu kay nyakasambuk da kamu kan Kristu Jisus.
8Na, kay manga inulug ku, yan ya gayed mayu anenganenga ya matinaw aw ya diliꞌ pagsala-en aw ya matulid. Anenganenga mayu ya malinis na walaꞌ ya daliꞌ, aw pangkay unu na to-o madyaw, aw ya umbaꞌ sayaꞌ. 9Imo-a mayu ya kadég na pigpalna-u ku kamayu. Aw silingi mayu ya kadég na kyinitaꞌ mayu adi kanak. Aw ya Tyumanem na lyekatan sa kalinaw, gayed awun ni sayid mayu.
Ya pagpasalamat ni Pablo sa pig-atag kanan na manga utaw dun ni Pilipos
10Dakulaꞌ to-o ya pagleya ku aw ya pagpasalamat ku adti Tyumanem kay kya-anenganengan aku mayu salut magi sa pigpadala mayu kanak na tabang. Kya-ede-an ku na gayed kamu mig-anenganeng kanak manang walaꞌ ya selat mayu magpadala. 11Ya piglong ku yeiy bekeꞌ na asuntu na migkapelek aku, kay kyanalaman da ku ya pangkay unu na pagpakabetang. 12Pangkay malat aw madyaw, matadeng da aku magdala sa kanak pag-eyaꞌ, pangkay dun ni manga allaw na migkapelek aku aw pangkay uman dun ni manga allaw na migsinobla ya kanak kapelekan. Kay kya-agiyan da ku ya pagkabiyag aw ya pagkagetem. 13Mabatug ku ya kadakulaꞌ magi sa tabang ni Kristu kay yan ya magpakabagseg kanakeꞌ.
14Manang madyaw beg ya tabang mayu kanaken dun ni kya-agiyan ku na manga kakalugan. 15Aw kya-ede-an da mayu, kay manga inulug ku dun ni Pilipos, idtu muna na bagu pa aku migpa-edeꞌ sa Madyaw na Ubat-ubat adti kamayu banwa, oloꞌ kamu ya tyumabang kanak sa kuwalta. Pangkay madég ya manga mangintu-uway na migkatipun nyanimba adti eped na manga banwa, manang walaꞌ ya eped na tyumabang kanak dun ni pag-indeg ku dun ni probinsiya na Macédoniya. 16Aw pangkay adtu aku ni Tésalonika, migpadeleg kamu tyumabang kanak. Diliꞌ oloꞌ minsan ya pagpadala mayu kanak sa kuwalta. 17Manang bekeꞌ na tud ku na magsekat pa uman sa tabang lekat adti kamayu. Yan baling ya kaliman ku na makadawat kamu uman sa un atag na Tyumanem asuntu sa kanimbet mayu. 18Pada ka-ede-an mayu, nyadawat da ku ya kadakulaꞌ na pigpadala mayu kanak. Nyasambat da ya kanak kapelekan aw migsobla pa baling, asuntu na dakulaꞌ ya pigpadala mayu kan Épaprodito. Ya pigtabang mayu kanak, kasiling na dugsuꞌ na manimboꞌ na pigdawat da na Tyumanem aw to-o sakanan kyatutukan. 19Aw un pa nan uman sambaten alag ya kapelekan mayu lekat adti kadég na awun ni kanan asuntu na nyakasambuk da kamu kan Kristu Jisus. 20Yanagaw naten patasen na walaꞌ ya tyamanan ya dengeg na Tyumanem na yan ya kanaten Ama. Amén.
21Pangumusta͡an kami sa kadég na manga inulug na nyangintu-u kan Kristu Jisus. Aw nyangumusta uman ya manga eped ku asini sa kadég mayu. 22Aw ya kadég na manga mangintu-uway asini Roma nyangumusta kamayu, labi la ya manga utaw na nyangintu-u la na migtalabahu adti balay na impirador.
23Ayin pa aku galu na gayed awun ni kamayu ginawa ya grasya na kanaten Matas na Pangulu na si Jisu-Kristu.
Currently Selected:
Pilipos 4: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
