Pilipos 3

Si Kristu ya pag-imanen na manga mangintu-uway

1Na, kay manga inulug ku, pagleya kamu asuntu na nyakasambuk da kamu sa kanaten Matas na Pangulu na si Kristu. Walaꞌ aku ilab na salutun ya palna-u yeiy adti pagsulat ku kamayu. Yeiy saba ya un magtameng sa kamayu pagpangintu-u, pada diliꞌ kamu makasuway lekat adti manga matulid na palna-u.

2Magpakatadeng kamu kay awun eped na manga Judiyu na nyangintu-u la kan Kristu manang gyumelgel pa sa palna-u nilan na diliꞌ kunu dawaten na Tyumanem ya utaw kun walaꞌ una tuli-a.#3:2 Ya pagtuliꞌ yan ya katanem na manga utaw na Judiyu kay yan ya suguꞌ na Tyumanem kan Abraham asini muna. Mabasa adti Génésis 17:10-14. Ya manga utaw yeiy, kasiling silan na manga iduꞌ na mabulut. Malatay ya pigpan-imoꞌ nilan. 3Kay kitadun ya pigdawat na Tyumanem, asuntu na nyangintu-u la kitadun kan Kristu Jisus. Pigsimba tadun ya Tyumanem magi sa Ispiritu nan aw pigpalibantug tadun si Kristu Jisus, aw walaꞌ kitadun salig sa madyaw na imo-unun dala ya pagpatuliꞌ dun ni kanaten lawas pada makaluwaꞌ kitadun. 4Matinaw saba na awun indeganan ku maglong na aku tengteng Judiyu. Kun awun utaw na migsalig na nyakaluwaꞌ da sakanan asuntu sa pagka Judiyu nan, to-o pa aku dun sa kanak. 5Kay dun ni kawalu na allaw lekat na pagka͡utaw ku, pigtuliꞌ da aku. Aw aku ya sambuk na utaw na Isra-él na buwadbuwad ni Bénjamin, tengteng aku na utaw na Judiyu. Parisiyo aku aw dayaw ku pigdalug ya Uldin na manga Judiyu. 6Aw asuntu na pigtuman ku ya kadég yeiy, yan ya du-an na pyamulayaman ku idtu muna ya manga mangintu-uway kan Kristu. Adti kanak anenganeng, walaꞌ ya un pagsalaꞌ kanakeꞌ kay nyatibulluk aku sa pagdalug sa manga suguꞌ dun ni Uldin. 7Ya kadég yeiy pig-anenganeng ku idtu muna na dakulaꞌ ya ma-untung, manang adun kya-ede-an da ku na walaꞌ kadiꞌ ya guna, kay si Kristu la oloꞌ ya pigsaligan ku. 8Aw yeiy saba ya matinaw. Ya matas na dengeg ku idtu muna, walaꞌ da ku yan anenganenga. Yan baling ya dakulaꞌ na ma-untung ku adun ya pagka-edeꞌ ku kan Kristu Jisus na kanak Matas na Pangulu. Asuntu kanan, pig-ayawan da ku ya kadég na idtu muna na walaꞌ ya ma-untung pada madalug ku si Kristu 9aw makasambuk aku kanan. Walaꞌ da ku saligi ya manga imo-unun ku na matulid aw ya pagdalug ku sa Uldin na manga Judiyu. Manang syumalig da aku adun kan Kristu. Aw ya pagpangintu-u ku kanan, yan ya du-an na pigdawat da aku na Tyumanem kasiling na walaꞌ da ya salaꞌ. 10Yan ya kaliman ku na to-o ku ka-ede-an si Kristu aw ya katulus na pagkataw nan lekat adti pagkamatay. Aw kaliman ku agiyan ya pagti-is na kya-agiyan ni Kristu, aw masiling kanan dun ni pagkamatay nan. 11Kay yan ya pig-iman ku na matawun aku na Tyumanem adti kamoliyan na allaw.

Ya pagpadeleg sa pagpangintu-u kan Kristu

12Walaꞌ aku paglong na nyatagtun da ku ya kadég yeiy. Manang pigtibagsegan ku na alag ku yeiy matagtun, kay pigtagtun da aku ni Kristu. 13Kay manga inulug ku, walaꞌ aku pag-anenganeng na pigdatengan da ku ya kadég yeiy. Manang pigkalingawan da ku ya manga kya-agiyan ku idtu muna aw pigtibulluk da ku ya kanak anenganeng adti datenganan. 14Yanagaw to-o ku pigbetang adti kanak ginawa na tagtunun ya manga pigpakang da kanak na Tyumanem idtu na pagtawag nan kanak aw pagpakasambuk da ku kan Kristu Jisus. Bekeꞌ oloꞌ na adun manang adtu pa uman kagaya ni tas na langit. 15Maynan galu ya anenganeng na kadég tadun na nyakadalid da ya pagpangintu-u. Aw kun awun utaw na diliꞌ maynan ya anenganeng nilan, bukasan saba kanilan na Tyumanem ya pagpakalabet kun unu ya matinaw. 16Manang padelegen tadun ya pagdalug sa katinawan na kya-ede-an da tadun sa Tyumanem.

17Kay manga inulug ku, pagsiling kamu kanak aw silingi mayu uman ya manga eped na utaw na dyumalug sa pigpan-imoꞌ nami. 18Malikit aku miglong kamayu na awun madég na sallong kunu dyumalug kan Kristu, manang magi sa kanilan pigpan-imoꞌ, kya-ede-an da tadun na pigkele͡an nilan ya pagkamatay ni Kristu adti krus. Migsugaw pa aku beg kun pagka-anenganengan ku silan. 19Ya datengan na manga utaw yeiy, yan ya pa-emel-emelen na walaꞌ ya tyamanan, kay pigpaka tyumanem nilan ya pagkaliman na pagka-utawun nilan. Pigpalibantug nilan ya manga makamulamula kanilan, aw yan oloꞌ ya pigbetang nilan sa ginawa ya asini tas na lupaꞌ. 20Manang kitadun ya sakup na Tyumanem, aw yan ya tengteng eya-anan tadun ya adti tas na langit. Aw lekat adti tas na langit un saba dumateng ya kanaten Magpaluwa-ay na yan ya Matas na Pangulu tadun na si Jisu-Kristu. Aw yan ya to-o tadun pigtagadan. 21Aw magi sa katulus nan, un nan baguwun ya lawas tadun kasiling na kanan lawas na umbaꞌ meyaꞌ adti tas na langit. Kay to-o saba dakulaꞌ ya kanan katulus na un ka͡agadan na kadég.

Currently Selected:

Pilipos 3: klgv

Highlight

Copy

Compare