Colosas 1

1Aku si Pablo ya migsulat adti kamayu. Nya-imoꞌ aku apostol ni Kristu Jisus kay yan saba ya pagbayaꞌ na Tyumanem. Kami si Timotiyo na kanaten inulug ya migpadala sa sulat ini 2adti kamayu na manga mangintu-uway dun ni Colosas na nyatibulluk dyumalug kan Kristu.

Padatengen galu adti kamayu ya grasya aw kalinaw na lyumekat adti Tyumanem na yan ya Ama tadun.

Ya pagpanawagtawag ni Pablo adti Tyumanem pada sa manga mangintu-uway

3Dun ni kanami pagpanawagtawag pada kamayu, gayed nami pigpasalamatan ya Tyumanem na yan ya Ama na kanaten Matas na Pangulu na si Jisu-Kristu, 4kay dyengeg nami ya pagpangintu-u mayu kan Kristu Jisus aw ya pagginawa mayu sa kadég na mangintu-uway. 5Nya-imoꞌ mayu ya maynan asuntu na pig-iman mayu na awun pigtagilan kamayu na Tyumanem adti tas na langit. Pigdengeg da mayu idtu muna ya matinaw na yan ya Madyaw na Ubat-ubat kan Kristu 6na dyumateng adti kamayu. Aw ya ubat-ubat yeiy pigpa-edeꞌ uman adti kadakulaꞌ na banwa aw madég ya manga utaw na nyabagu la ya anenganeng nilan. Maynan uman ya nya-imoꞌ adti kamayu lekat dun ni allaw na bagu pa kamu nyakadengeg sa ubat-ubat kan Kristu aw sa kallat na Tyumanem aw kyalabetan mayu na yan ya tengteng matinaw. 7Yeiy ya pigpalna-u kamayu ni Épapras na kanaten pigginawa͡an na sugu-anen ni Kristu eped nami dun ni imo-unun na Tyumanem. Pigpakawun nami sakanan dun ni kamayu na un sumayu kanami asuntu na kasaligan sakanan. 8Aw yan ya mig-ubat-ubat kanami sa kamayu paggaginawa͡ay na pig-atag na Ispiritu Santo.

9Yanagaw lekat na allaw na dyengeg nami ya kamayu pagpangintu-u, walaꞌ kami teneng sa pagpanawagtawag kamayu adti Tyumanem. Gayed nami pigsekat na atagan kamu na katadeng na lyumekat adti Ispiritu Santo na un mayu kalabetan kun unu ya pagkaliman na Tyumanem, 10pada ya bet mayu umbaꞌ sa utaw na nyangintu-u sa Tyumanem, aw makatutuk kamu kanan, aw magkadakulaꞌ ya bunga na imo-unun mayu na madyaw, aw kadugangan pa ya kya-ede-an mayu sa kana Tyumanem. 11Pigsekat nami uman na to-o kamu nan pakabagsegen magi sa kanan katulus, pada pangkay unu ya dumateng, mabatug mayu ya pagpadeleg sa kamayu pagpangintu-u na awun pagleya. 12Padelega mayu ya pagpasalamat sa kanaten Ama na yan ya Tyumanem, kay yan ya mig-imoꞌ kamayu umbaꞌ na makatagtun sa pigtagilan da nan sa mangintu-uway na awun da ni kalalamdag. 13Kay pigpaluwaꞌ da kitadun nan lekat adti kangitngitan na pigdumala͡an ni Satanas, aw dayaw nan pigpaligenaꞌ adti Kasakupan na kanan Iseꞌ na si Jisu-Kristu na to-o nan pigginawa͡an. 14Magi sa Iseꞌ nan, piglekat da kitadun aw piglanas da nan ya manga salaꞌ tadun.

Ya pagka Tyumanem ni Kristu aw ya pigpan-imoꞌ nan

15Na, diliꞌ pagkita-en ya Tyumanem, manang dun ni kanan Iseꞌ na si Kristu ka-ede-i ya bet nan. Sa walaꞌ pa imo-a na Tyumanem ya kadakulaꞌ na banwa, dun da si Kristu aw yan ya to-o matas kay sa kadég na pig-imoꞌ na Tyumanem. 16Kay magi saba kanan pig-imoꞌ ya kadég na awun ni langit aw ya asini tas na lupaꞌ, dala ya manga pagkita-en aw ya diliꞌ pagkita-en, pangkay ya manga anghil aw ya manga kasakupan nilan aw manga migdumala dun ni kanilan, alag pig-imoꞌ ni Kristu, yanagaw deyen sakanan na kadég. 17Sa walaꞌ pa imo-a ya kadég, dun da dadan si Kristu. Aw magi kanan dayaw nyapaligenaꞌ ya kadég, yanagaw migpadeleg taman adun. 18Si Kristu ya palangad ulu sa kadég na manga mangintu-uway, aw silan ya palangad lawas nan. Si Kristu ya lyekatan sa bagu na ginawa tadun kay yan ya muna nyataw lekat adti nyangkamatay, pada ka-ede-an na yan ya matas sa kadég. 19Kay kaliman na Tyumanem na dun ni kan Kristu kita-a ya kadakulaꞌ na pagka Tyumanem nan, 20aw magi kan Kristu pigpalikuꞌ na Tyumanem adti kanan ya kadég, pangkay adti langit aw pangkay asini tas na lupaꞌ. Pig-imoꞌ nan yeiy magi sa duguꞌ ni Kristu dun ni pagkamatay nan adti krus.

21Idtu muna mawat kamu adti Tyumanem, kay malatay ya anenganeng mayu aw ya manga pigpan-imoꞌ mayu, aw yan ya nyakapa-imoꞌ kamayu po-on nan. 22Manang adun, pigpalikuꞌ da kamu na Tyumanem adti kanan magi sa pagkamatay na Iseꞌ nan, pada mabatug da mayu ya pagpalapit adti kanan na walaꞌ ya salaꞌ, aw malinis dun ni asdangan nan, aw walaꞌ ya pagsalaꞌ. 23Manang ka-ilangan magpadeleg kamu dun ni kasalig na kamayu pagpangintu-u na diliꞌ ma-inang-inang, aw diliꞌ mayu pag-ayawan ya pag-iman na nyadawat mayu lekat na pagdengeg mayu idtu muna sa Madyaw na Ubat-ubat kan Kristu. Pigpa-edeꞌ da saba yeiy adti kadég na manga utaw. Aw aku si Pablo ya sambuk na pigtaliguwan na Tyumanem na magpa-edeꞌ adti kanilan.

Ya imo-unun ni Pablo dun ni manga mangintu-uway

24Na, migleya aku pangkay madég ya manga kalugan na kya-agiyan ku dun ni pagpa-edeꞌ ku kan Kristu adti kadég mayu, kay kya-untungan kamu. Aw magi dun ni pagti-is ku, malingeb ya manga pagpamulayam kan Kristu, pada ka-untungan ya kadég na manga mangintu-uway na yan ya palangad lawas nan. 25Nya-imoꞌ aku sugu-anen adti kadég mayu na manga mangintu-uway kay yan ya pigtaligu kanak na Tyumanem pada malingeb ku ya pagpa-edeꞌ adti kamayu sa kanan tingeg. 26Kay ya palpa nan pigtaguꞌ lekat pa asini muna, manang adun, pigbukasan da nan adti manga mangintu-uway. 27Kaliman nan na ka-ede-an nilan ya kanan palpa na pigtagilan nan adti manga Héntil. Ya palpa nan yeiy na pigtaguꞌ na to-o madyaw, yan si Kristu na awun da ni kamayu. Aw asuntu na awun da kamu ni kan Kristu, pig-iman da mayu na makasambuk kamu adti kadakulaꞌ na kadyawan na Tyumanem. 28Yanagaw si Kristu ya pig-ubat-ubat nami adti kadég na utaw. Gayed nami silan piglongan aw pigpalna-uwan magi sa katadeng na pig-atag kanami pada pa-indegen nami silan adti asdangan na Tyumanem na nyalingeb da ya kanilan pagpangintu-u. 29Yeiy ya du-an na nyapagud aku dun ni pagtibagseg ku na matuman ya manga imo-unun yeiy magi sa katulus ni Kristu na nyeyaꞌ asini kanak aw yan ya migpakabagseg sa ginawa ku.

Currently Selected:

Colosas 1: klgv

Highlight

Copy

Compare