Hibriyu 8
8
Si Jisus ya To-o Matas na Magdadugsu-ay na pigpakang na Tyumanem
1Na, ini ya tengteng puntu na piglong nami kamayu: Awun saba To-o Matas na Magdadugsu-ay na migpatengaꞌ kanaten na adtu la ni tas na langit. Nyingkud sakanan apit adti kalintu na trunu na Ama na yan ya Tyumanem na To-o Pagdeyen. 2Aw pig-imoꞌ nan ya kanan manga imo-unun dun ni tengteng pagsimba͡an sa Tyumanem. Aw ya pagsimba͡an yeiy, walaꞌ na manga utaw imo-a manang Tyumanem ya mig-imoꞌ.
3Asini tas na lupaꞌ, ya pigpamalliꞌ na ma-imoꞌ pangulu na manga magdadugsu-ay, yan ya mag-atag sa manga dugsuꞌ adti Tyumanem. Yanagaw ya kanaten uman To-o Matas na Magdadugsu-ay, ka-ilangan na awun uman kanan atag na dugsuꞌ. 4Na, kun kenneꞌ ni Jisus asini tas na lupaꞌ, diliꞌ sakanan ma-imoꞌ magdadugsu-ay kay awun da manga magdadugsu-ay na dyumalug sa Uldin na Tyumanem.#8:4 Dun ni manga allaw ni Jisus, kenneꞌ pa na manga magdadugsu-ay migdugsuꞌ adti Témplo dun ni Jérusalim. Pangkay mig-imoꞌ ya Tyumanem sa bagu na pakang magi kan Jisus, manang lekat na pagkamatay ni Jisus, kapatan (40) ya umay na migpadeleg silan migdugsuꞌ, mendaꞌ na pigkalat na manga sundalu na Roma ya Témplo. 5Aw ya pagsimba͡an nilan sa Tyumanem, oloꞌ yeiy alung sa adti tas na langit. Kya-ede-an tadun kay piglongan na Tyumanem si Moysis, “Sa pag-imoꞌ mayu sa un pagsimba͡an kanak, magpakatadeng kaw na dayaw mu madalug ya kadég na pigpakitaꞌ ku kanmu adti buntud.” #8:5 Mabasa adti Éxudo 25:40. 6Manang to-o pa madyaw ya imo-unun ni Jisus na migpatengaꞌ adun kay sa manga magdadugsu-ay na migpatengaꞌ adti Témplo. Kay to-o pa madyaw ya bagu na pakang na Tyumanem, asuntu na pigpaligenaꞌ nan dun ni kanan manga pigpakang na to-o pa madyaw.
7Kun nyalingeb pa na muna pakang ya palpa na Tyumanem, diliꞌ da ka-ilangan ya bagu. 8Manang kyinitaꞌ na Tyumanem na awun pa pagsalaꞌ sa pagdalug na manga utaw na Isra-él sa muna pakang. Yanagaw miglong ya Tyumanem:
“Dumateng ya allaw na mag-imoꞌ aku sa bagu na pakang adti manga utaw na Isra-él aw sa manga utaw na Juda.
9 Aw diliꞌ da kasiling na tagnaꞌ na pakang ku idtu muna na pig-imoꞌ ku adti manga tyugbulan nilan, dun ni pag-agak ku kanilan lekat adti nasud na Ihiptu.
Walaꞌ nilan padelega ya pagdalug sa manga suguꞌ ku,
yanagaw pigpabaya-an da ku silan.
10 Manang ini ya bagu na pakang na un ku imo-un sa manga buwadbuwad ni Isra-él sa manga allaw na dumadateng pa:
Betang ku ya kanak manga suguꞌ dun ni anenganeng nilan aw dayaw ku tanemen adti seled nilan.
Ma-imoꞌ aku Tyumanem nilan, aw silan uman ma-imoꞌ kanak manga utaw.
11 Aw diliꞌ da nilan ka-ilangan palna-uwan ya kanilan manga eped kun singalan aku,
kay alag da silan maka-edeꞌ kanak, pangkay ya manga tagituꞌ aw manga utaw na dengganen.
12 Kay kallatan ku silan, aw kalingawan da ku ya manga malatay na imo-unun nilan, aw diliꞌ da ku anenganengen ya manga salaꞌ nilan.” #8:8-12 Mabasa adti Jérémiyas 31:31-34.
13Yanagaw, sa paglong na Tyumanem na awun bagu na pakang, dun da nan pa-ede-an na walaꞌ da ya katukanan sa muna pakang, aw diliꞌ madugay malagak da.
Currently Selected:
Hibriyu 8: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
