Hibriyu 9

Ya pagsimba na manga utaw na Isra-él

1Na, ya muna pakang na Tyumanem adti kanan manga utaw na Isra-él, awun manga suguꞌ sa pag-imoꞌ sa un pagsimba͡an kanan aw manga pa-agi sa pagsimba. 2Adti seled, awun duwa ya tambiꞌ na alag pigtani adti Tyumanem. Aw dun ni tagnaꞌ na tambiꞌ, awun pigpa-indeg na saleng na pitu ya sulu-anan, aw awun uman lamisa na pagbetangan sa sampuluꞌ tag duwa (12) kalapid ya pan na pagdugsuꞌ adti Tyumanem. 3Aw adti tadtu na tagnaꞌ na tambiꞌ, awun uman Tambiꞌ na Pigtani adti Tyumanem na pigsalibenan na to-o madakmel na téla. 4Dun ni Tambiꞌ na Pigtani adti Tyumanem, awun sunuganan sa insénso. Aw dun uman ya kaban na pigbetangan sa duwa ya lapidan na batu na pigsulatan sa sampuluꞌ ya suguꞌ. Adti seled uman na kaban ya kulun na pigdayawan sa mana.#9:4 Ya mana, yan ya pagkanen asini muna na pigpadala na Tyumanem lekat adti langit sa manga utaw na Isra-él talana nilan migpasinan adti banwa na Canaan. Aw dun uman ni seled ya bangkaꞌ ni Aaron na nyanalingsing. Ya sunuganan aw ya kaban aw ya kulun alag yeiy pigtapli-an na bulawan. 5Aw adti tas na sab na kaban awun duwa ya inutaw na kasiling na gya na anghil na pigtawag na kérubim, aw yeiy ya pangilala na awun ya Tyumanem. Pigsalindungan na manga panid nilan ya “Ingkudanan na Kallat na Tyumanem.” Manang ya kadég yeiy, diliꞌ mabus mapalabet adun.

6Yanagaw sa abus da katagilan ya kadég yeiy, kada allaw sumeled da ya manga magdadugsu-ay adti tagnaꞌ na tambiꞌ pada imo-un nilan ya kanilan imo-unun. 7Manang ya Tambiꞌ na Pigtani adti Tyumanem, minsan oloꞌ kada umay makaseled ya pangulu na manga magdadugsu-ay pada magpatengaꞌ sa manga utaw adti Tyumanem. Diliꞌ makaseled sakanan kun walaꞌ ya dala͡en nan na duguꞌ na ayep na abus da nan dugsu-an asuntu sa kanan manga salaꞌ aw dala uman ya salaꞌ na manga utaw na walaꞌ nilan ka-ede-i na salaꞌ ya nya-imoꞌ nilan. 8Aw pigbangal na Ispiritu Santo na diliꞌ makaseled ya manga utaw adti Tambiꞌ na Pigtani adti Tyumanem, yanagaw diliꞌ pa silan makapalapit adti asdangan nan talana na dun pa ya muna pa-agi na pagdugsuꞌ. 9Alag yeiy pundinganan kanaten. Dun ni muna pa-agi, ya manga dugsuꞌ adti Tyumanem diliꞌ makalinis sa anenganeng na manga utaw. Gayed pa silan piglinggal na kanilan anenganeng. 10Pangkay pigdalug nilan ya manga suguꞌ dun ni Uldin sa pagkan aw pag-inem, aw manga katanem sa paglinis sa lawas, manang walaꞌ kalinisi ya kanilan anenganeng mendaꞌ sa allaw na dyumateng ya bagu na pa-agi.

Si Kristu ya bagu na agiyanan

11Manang adun, nyadi la si Jisu-Kristu na yan ya nya-imoꞌ To-o Matas na Magdadugsu-ay na migpatengaꞌ sa manga utaw adti Tyumanem, aw madég ya manga kadyawan adti kanaten asuntu sa bagu na pakang. Aw pigpadeleg nan ya kanan imo-unun adti pagsimba͡an na to-o pa madyaw na walaꞌ imo-a na manga utaw aw walaꞌ yeiy asini tas na lupaꞌ manang adti tas na langit. 12Si Jisus minsan da seled dun ni pagsimba͡an na awun ni tas na langit. Aw magi sa kanan duguꞌ, pigpaluwaꞌ nan ya manga utaw lekat adti pag-allang na manga salaꞌ nilan, pada makatagtun kitadun sa ginawa na walaꞌ ya katigkasan. Kay kanan duguꞌ saba ya pigdugsuꞌ aw bekeꞌ na duguꞌ na manga kambing aw tudu na baka kasiling na muna pa-agi. 13Adti Uldin, kun ya utaw kalipa-an, kalinisan sakanan magi sa duguꞌ na manga kambing aw tudu na baka. Aw kun awun utaw na kalipa-an asuntu sa pag-awid nan sa lawas na utaw na nyatay, magsunug silan sa bubay na nati na baka, aw ya abu pagsabug nilan adti utaw na kyalipa-an. 14Manang to-o pa dun dakulaꞌ ya mabatug na duguꞌ ni Kristu. Kay magi sa Ispiritu Santo na walaꞌ ya tyamanan, pigtumbay ni Kristu ya kanan pagka-utawun na walaꞌ ya se-ey adti Tyumanem pada ma-imoꞌ dugsuꞌ kalyu sa salaꞌ na manga utaw. Aw asuntu sa pig-imoꞌ nan yeiy, kalinisan da ya kanaten anenganeng lekat adti manga imo-unun na malatay, aw mabatug da tadun ya pag-imoꞌ sa imo-unun na Tyumanem na Gayed Awun.

15Yanagaw yeiy ya du-an na si Kristu ya migpatengaꞌ kanaten adti Tyumanem dun ni bagu na pakang. Magi sa pagkamatay nan adti krus, piglekat nan ya manga utaw na lyumakad sa manga suguꞌ dun ni Uldin adti muna pakang. Aw ya kadég na pigtawag na Tyumanem, makadawat da sa pigpakang nan na walaꞌ ya tyamanan.

16-17Kasiling na utaw na mig-imoꞌ sa pakang sa kanan ayawanan. Diliꞌ matagtun na un ayawan kun utaw pa ya mig-imoꞌ sa pakang. Manang kun kapulba͡an na nyatay da ya mig-imoꞌ sa pakang, na, matagtun da na utaw na pig-atagan sa ayawanan. 18Maynan uman ya muna pakang na Tyumanem, pagpa-iligen ya duguꞌ na pigdugsuꞌ aw dun da pag-iganget ya pakang. 19Kay pagkatigkas ni Moysis magpalna-u sa kadég na manga suguꞌ dun ni Uldin na pig-atag na Tyumanem adti manga utaw, pigkamang nan ya duguꞌ na manga tudu na baka aw manga kambing, aw pigdali-an nan na tubig. Tigkas yan, migkamang sakanan sa manga sanga na isopo aw pigbangget dun ya bulbul na karniro, aw pig-elem nan adti duguꞌ, aw pigpisikan nan ya libru na piglulun na pigsulatan sa manga suguꞌ dun ni Uldin, aw pigpisikan nan uman ya kadég na utaw dun. 20Aw miglong si Moysis kanilan, “Ya duguꞌ yeiy, yan ya migpakasalig sa pakang na Tyumanem na pigsuguꞌ nan na un mayu dalugun.” 21Aw pigpisikan uman ni Moysis na duguꞌ ya kadakulaꞌ na pagsimba͡an sa Tyumanem dala ya manga pagkanaꞌ na paggamiten na manga magdadugsu-ay sa pagsimba. 22Dun ni Uldin na manga Judiyu, magi sa duguꞌ, mabus galu kalinisan ya kadég.

Aw kun walaꞌ ya pagpa-ilig sa duguꞌ lekat adti pigdugsuꞌ, diliꞌ malanas ya manga salaꞌ na manga utaw.

To-o pa madyaw ya dugsuꞌ ni Jisus

23Ya pagsimba͡an na manga utaw na Isra-él sa Tyumanem, oloꞌ yeiy alung na pagsimba͡an na awun ni tas na langit. Yanagaw, ya pagsimba͡an na manga utaw na Isra-él sa Tyumanem, dala ya manga pagkanaꞌ dun ni seled, ka-ilangan alag linisan magi sa duguꞌ lekat adti ayep na pigdugsuꞌ. Manang ya pagsimba͡an na awun ni tas na langit, ka-ilangan na to-o pa madyaw ya dugsuꞌ dun. 24Kay si Kristu walaꞌ seled adti Tambiꞌ na Pigtani adti Tyumanem na pig-imoꞌ na manga utaw, kay oloꞌ yeiy alung sa tengteng pagsimba͡an. Manang syumeled sakanan baling adti tengteng pagsimba͡an na awun ni tas na langit aw adtu la sakanan migpatengaꞌ kanaten adti asdangan na Tyumanem. 25Aw walaꞌ sakanan kasiling na pangulu na manga magdadugsu-ay na kada umay minsan magseled adti Tambiꞌ na Pigtani adti Tyumanem na magdala sa duguꞌ na ayep na pigdugsuꞌ da. 26Kay kun salutsalutun pa ni Kristu ya pagdugsuꞌ sa pagka-utawun nan, na, masalutsalut galu ya kanan pagti-is asuntu sa salaꞌ na manga utaw lekat pa na pag-imoꞌ sa kadakulaꞌ na banwa. Manang minsan da oloꞌ ya pagkadi nan adun na manga kamoliyan na allaw na yan ya paglanas sa manga salaꞌ na manga utaw magi sa pagdugsuꞌ nan sa kanan pagka-utawun.

27Na, minsan da oloꞌ ya pagkamatay na utaw, aw pagkatigkas yan, ukuman da sakanan na Tyumanem. 28Aw si Kristu uman, minsan da ya kanan pagdugsuꞌ na yan ya kanan pagkamatay adti krus pada malanas ya manga salaꞌ na kadég na manga utaw. Aw sa paglikuꞌ nan salut asini tas na lupaꞌ, diliꞌ da magdugsuꞌ na un maglanas sa manga salaꞌ, manang dayaw nan lingeben ya pagpaluwaꞌ sa kadég na tyumagad kanan.

Currently Selected:

Hibriyu 9: klgv

Highlight

Copy

Compare