Hibriyu 7

Ya pagkamagdadugsu-ay ni Mélkizédék

1Si Mélkizédék, yan ya hariꞌ sa banwa na Salim asini muna, aw yan uman ya magdadugsu-ay na migpatengaꞌ sa manga utaw adti Tyumanem na To-o Matas. Aw syumungun sakanan kan Abraham na nyuliꞌ da lekat adti pagtanam sa manga hariꞌ na pigdeg nan, aw miglong kan Abraham, “Pakadyawun kaw galu na Tyumanem.” 2Aw tigkas yan, nyatag si Abraham kan Mélkizédék sa kapuluꞌ lekat adti kadég na nyataban nan. Na, yan ya kakawasan na ngalan ni Mélkizédék: hariꞌ na gayed dyumalug sa pagkaliman na Tyumanem. Aw yan ya kakawasan na Salim: kalinaw. Yanagaw, si Mélkizédék, yan uman ya hariꞌ na kalinaw. 3Walaꞌ ka-ede-i kun singalan ya ama nan aw ina nan aw ya kanan manga tyugbulan. Walaꞌ uman ka-ede-i ya allaw na pagka͡utaw nan aw ya kanan pagkamatay. Manang ya pagkamagdadugsu-ay nan walaꞌ ya tyamanan, kasiling saba na pagkamagdadugsu-ay na Iseꞌ na Tyumanem.

4Anenganengen tadun ya katas na dengeg ni Mélkizédék. Pangkay ya kanaten tyugbulan na si Abraham nyatag kanan sa kapuluꞌ na nyataban nan lekat adti tanam. 5Na, ya sambuk na buwadbuwad ni Abraham, yan si Libi.#7:5 Si Moysis aw magulang nan na si Aaron, alag buwadbuwad ni Libi. Aw sa pag-atag na Tyumanem kan Moysis sa Uldin, lyumabay da ya sobla upatenggatus (400) ya umay lekat adti manga allaw ni Abraham aw si Mélkizédék. Aw dun ni Uldin na pig-atag na Tyumanem, oloꞌ buwadbuwad ni Libi ya ma-imoꞌ manga magdadugsu-ay. Aw silan ya umbaꞌ dumawat sa kapuluꞌ lekat adti manga eped nilan na utaw na Isra-él na alag uman buwadbuwad ni Abraham. 6Manang si Mélkizédék dyumawat sa kapuluꞌ ni Abraham pangkay bekeꞌ sakanan na buwadbuwad ni Libi. Aw magi sa paglong ni Mélkizédék, pig-atagan pa nan si Abraham sa manga kadyawan pangkay pigpakangan da na Tyumanem si Abraham sa manga kadyawan. 7Aw kya-ede-an tadun na matas pa ya nyatag sa manga kadyawan kay sa dyumawat. 8Aw anenganengen tadun uman ya manga magdadugsu-ay adti Tyumanem na dyumawat sa kapuluꞌ. Buwadbuwad silan ni Libi na awun kamatayen. Manang walaꞌ ya pigpasulat na Tyumanem sa pagkamatay ni Mélkizédék.

9Aw yanagaw makapaglong galu kitadun na pangkay si Libi ya dumawat sa kapuluꞌ, manang magi sa pig-imoꞌ ni Abraham kasiling na nyaka-atag da si Libi sa kapuluꞌ nan adti kan Mélkizédék. 10Kay dun ni allaw na pagkitaꞌ ni Abraham aw si Mélkizédék, walaꞌ pa si Libi ka͡utaw, kay un pa sakanan ma-imoꞌ buwadbuwad ni Abraham, manang kasiling na nyaka-atag da uman sakanan sa kapuluꞌ magi kan Abraham.

Si Jisus aw si Mélkizédék

11Na, kun nyabatug pa nyalingeb ya palpa na Tyumanem magi sa pagdugsuꞌ na manga buwadbuwad ni Libi kasiling na pigpasuguꞌ dun ni Uldin na manga Judiyu, diliꞌ da ka-ilangan na madi pa ya sambuk na magdadugsu-ay na kasiling ni Mélkizédék pada sayuwan ya pagkamagdadugsu-ay ni Aaron na buwadbuwad ni Libi. 12Aw kun sayuwan ya pagkamagdadugsu-ay, sayuwan uman ya manga suguꞌ dun ni Uldin. 13Kay ya sambuk na migpatengaꞌ na pigpa-edeꞌ dadan na Tyumanem asini muna, yan si Jisus. Walaꞌ sakanan lekat adti buwadbuwad ni Libi, manang lekat baling adti eped na buwadbuwad na walaꞌ pamalli-a na ma-imoꞌ magdadugsu-ay. 14Nyabangal da adti kadég tadun na ya kanaten Matas na Pangulu na si Jisus lyumekat baling adti manga buwadbuwad ni Juda. Aw sa paglong ni Moysis kun kanyan buwadbuwad ya ma-imoꞌ magdadugsu-ay adti Tyumanem, walaꞌ nan kasampeti ya buwadbuwad ni Juda.

15Aw to-o pa nyabangal na pigsayuwan da ya manga magdadugsu-ay lekat adti buwadbuwad ni Libi asuntu na nyadi la ya sambuk na magdadugsu-ay na kasiling ni Mélkizédék, 16aw ya pagka-imoꞌ nan magdadugsu-ay bekeꞌ na asuntu sa kanan tyugbulan na kasiling na pigsuguꞌ na Tyumanem dun ni Uldin, manang asuntu sa katulus nan kay pigdeg da nan ya kamatayen. 17Aw pigmatinaw yeiy dun ni pigpasulat asini muna:

“Ikaw ya magdadugsu-ay na magpatengaꞌ sa manga utaw adi kanak na walaꞌ ya tyamanan, kasiling na pagkamagdadugsu-ay ni Mélkizédék.”#7:17 Mabasa adti Salmo 110:4.

18Diliꞌ da saba ka-ilangan ya muna pa-agi na pagdugsuꞌ na pigsuguꞌ na Tyumanem, asuntu na diliꞌ mabatug na muna pa-agi ya paglanas sa manga salaꞌ. 19Kay diliꞌ masambat na Uldin na manga Judiyu ya pagtulid sa manga utaw. Manang dun ni bagu na pakang, awun imanen tadun na to-o pa madyaw kay yeiy ya du-an na makapalapit da kitadun adti Tyumanem.

20Aw ya bagu na pakang to-o pigpakabagseg na Tyumanem magi sa pagsapaꞌ nan pada dayaw mag-iganget. Idtu muna sa pag-imoꞌ na Tyumanem sa manga buwadbuwad ni Libi magdadugsu-ay, walaꞌ sakanan pagsapaꞌ. 21Manang si Jisus nya-imoꞌ sakanan magdadugsu-ay magi sa pagsapaꞌ. Aw si Jisus ya pigpalabet na Tyumanem dun ni pigpasulat nan asini muna:

“Migsapaꞌ ya Tyumanem,

aw ya kanan anenganeng diliꞌ ma-uman.

Aw law nan, ‘Ikaw ya magdadugsu-ay na walaꞌ ya tyamanan.’ ” #7:21 Mabasa adti Salmo 110:4.

22Aw asuntu sa sapaꞌ yeiy, dun da kabangal na magi kan Jisus, tengteng tumanen na Tyumanem ya pakang nan na to-o madyaw adti manga utaw.

23Madég ya magdadugsu-ay adti Tyumanem na magsayusayu, manang diliꞌ silan magpakapadeleg sa imo-unun nilan kay alag silan magkamatay aw pagsayuwan. 24Manang si Jisus kenneꞌ na pagkamagdadugsu-ay nan na walaꞌ ya tyamanan aw diliꞌ sakanan pagkasayuwan. 25Yanagaw, mabatug nan ya pagpaluwaꞌ sa manga utaw na magpalapit adti Tyumanem magi kanan. Aw asuntu na gayed awun sakanan na walaꞌ ya tyamanan, yan da ya manawagtawag kanaten adti Tyumanem.

26Si Jisus saba ya To-o Matas na Magdadugsu-ay na ka-ilangan tadun. Walaꞌ ya salaꞌ dun ni kanan, aw diliꞌ sakanan kasiling na kadég na utaw na makasasalaꞌ. Aw adtu la sakanan ni tas na langit aw pigbasa͡an na kadég. 27Aw diliꞌ nan ka-ilangan magdugsuꞌ kada allaw. Diliꞌ sakanan kasiling na manga magdadugsu-ay na silan ya muna magdugsuꞌ asuntu sa kanilan manga salaꞌ aw pagkatigkas yan kana manga eped da uman salaꞌ. Kay minsan da oloꞌ ya pagdugsuꞌ sa kanan pagka-utawun asuntu sa manga salaꞌ na manga utaw. 28Na, ya manga utaw na nya-imoꞌ pangulu na manga magdadugsu-ay, pigpamalliꞌ silan magi sa Uldin na manga Judiyu pangkay awun pagsalaꞌ kanilan. Manang magi sa sapaꞌ na Tyumanem na nyakamoli sa Uldin, pigtani nan ya kanan Iseꞌ na yan ya umbaꞌ ma-imoꞌ kanaten To-o Matas na Magdadugsu-ay na walaꞌ ya tyamanan.

Currently Selected:

Hibriyu 7: klgv

Highlight

Copy

Compare