Hibriyu 5

1Na, ya pangulu na manga magdadugsu-ay dun ni manga utaw na Isra-él, pigpamalliꞌ sakanan lekat adti manga eped nan#5:1 Ya manga magdadugsu-ay alag buwadbuwad ni Aaron. pada magpatengaꞌ sa manga utaw adti Tyumanem magi sa pagdugsuꞌ sa manga dyala nilan asuntu sa kanilan manga salaꞌ. 2Aw ya pangulu na manga magdadugsu-ay to-o nan pagkallatan ya manga utaw na nyakasuway na walaꞌ paka-edeꞌ sa pig-imoꞌ nilan na salaꞌ, kay magpaka-imoꞌ uman sakanan sa salaꞌ. 3Asuntu seiy ka-ilangan uman sakanan magdugsuꞌ pada sa manga salaꞌ nan aw bekeꞌ oloꞌ na manga salaꞌ na eped na utaw. 4Walaꞌ ya utaw na ma-imoꞌ pangulu na manga magdadugsu-ay asuntu sa kanan pagbayaꞌ pada pagbasa͡an sakanan. Tyumanem oloꞌ ya nyamalliꞌ kanan kasiling ni Aaron na pigpamalliꞌ nan na un ma-imoꞌ magdadugsu-ay asini muna. 5Maynan uman si Kristu, bekeꞌ nan ya migbayaꞌ na un ma-imoꞌ To-o Matas na Magdadugsu-ay adti Tyumanem, manang pigpatas sakanan baling na Ama na miglong kanan:

“Ikaw ya kanak Iseꞌ.

Adun na allaw, pakitaꞌ ku na aku ya kanmu Ama.”#5:5 Mabasa adti Salmo 2:7.

6Aw awun pa uman piglong na Tyumanem adti eped na pigpasulat nan:

“Ikaw ya magdadugsu-ay na magpatengaꞌ sa manga utaw adi kanak na walaꞌ ya tyamanan, kasiling na pagkamagdadugsu-ay ni Mélkizédék.”#5:6 Ya sulat yeiy lekat adti Salmo 110:4. Aw mabasa uman adti Génésis 14:17-20 kun singalan si Mélkizédék.

7Na, sa asini pa si Jisus ni tas na lupaꞌ, nyanawagtawag sakanan adti kanan Ama, aw migsugaw na nyangilalat sa mabagseg na tingeg kay yan oloꞌ ya makapaluwaꞌ kanan adti pagkamatay. Aw asuntu na migpadalem sakanan aw pig-imoꞌ nan ya pagkaliman na Ama nan, yanagaw dyengeg ya kanan pagpanawagtawag. 8Aw pangkay tengteng sakanan Iseꞌ na Tyumanem, kyapalna-uwan sakanan adti pagdalug sa pagkaliman na kanan Ama magi dun ni manga pagti-is nan. 9Aw asuntu na dayaw nan pigtuman ya pagkaliman na Ama, nya-imoꞌ sakanan agiyanan sa pagpakaluwaꞌ na manga utaw na mangintu-u kanan pada matagtun nilan ya ginawa na walaꞌ ya katigkasan. 10Aw magi sa pagbayaꞌ na Tyumanem, si Jisus nya-imoꞌ To-o Matas na Magdadugsu-ay sa manga utaw adti kanan Ama, kasiling na pagkamagdadugsu-ay ni Mélkizédék asini muna.

Ya pagpakadalid na pagpangintu-u tadun

11Na, madég pa galu ya un nami paglongun asini sulat ini, manang diliꞌ nami adun bangalen kamayu asuntu na malug ya pagpalabet. 12Madugay da kamu nyangintu-u kan Kristu, yanagaw makapalna-u la galu kamu sa manga eped, manang mendaꞌ adun ka-ilangan pa kamu palna-uwan sa manga tagnaꞌ na palna-u na lekat adti Tyumanem. Kasiling kamu na tagbiꞌ na iseꞌ na magsusu pa na diliꞌ pa magpakakan sa mabagseg. 13Kay ya utaw na maynan, walaꞌ pa ya kya-ede-an nan kun unu ya madyaw aw kun unu uman ya malatay. 14Manang ya utaw na unud da ya pagpangintu-u, kasiling sakanan na utaw na magpakakan da sa mabagseg. Pignalam nan ya kanan anenganeng sa pagka-edeꞌ kun unu ya madyaw aw kun unu ya malatay.

Currently Selected:

Hibriyu 5: klgv

Highlight

Copy

Compare