Hibriyu 4

Ya paglagdeng na pigpakang na Tyumanem adti manga utaw nan

1Yanagaw, pangkay kenneꞌ pa na pigpakang na Tyumanem na paglagdeng, manang magpakatadeng kitadun pagaw awun eped kanaten na diliꞌ makaseled adti un nan kanaten palagdengan. 2Nyakadengeg kitadun saba sa Madyaw na Ubat-ubat na lekat adti Tyumanem kasiling na tyugbulan tadun asini muna. Manang sa pagpakadengeg nilan, walaꞌ ya nya-untung adti kanilan kay walaꞌ nilan pangintu-uwi ya kanilan pigdengeg. 3Kay kitadun na nyangintu-u kanan ya makasambuk kagaya dun ni banwa na paglagdengan. Kasiling na piglong na Tyumanem asini muna:

“Dun ni kanaken kadaman, migsapaꞌ aku na diliꞌ silan makadateng adti banwa na un ku galu kanilan palagdengan.”#4:3 Mabasa adti Salmo 95:11.

Piglong yeiy na Tyumanem pangkay pigtagilan da nan dadan ya lagdenganan lekat pa asini muna sa pag-imoꞌ nan sa kadakulaꞌ na banwa. 4Kay pigpasulat nan uman asini muna:

“Pagdateng na kapitu na allaw, miglagdeng ya Tyumanem adti kadég na manga imo-unun nan.”#4:4 Mabasa adti Génésis 2:2.

5Manang pigkasampetan uman na Tyumanem ya manga utaw na walaꞌ pangintu-u:

“Diliꞌ silan makadateng adti banwa na un ku galu kanilan palagdengan.”#4:5 Mabasa adti Salmo 95:11b.

6Yanagaw to-o nyabangal adti kanaten na awun pa manga utaw na kaliman na Tyumanem na makaseled adti banwa na paglagdengan, manang ya manga utaw asini muna na kya-ubat-ubatan sa paglagdengan, walaꞌ silan pakaseled asuntu na walaꞌ nilan daluga ya manga suguꞌ nan. 7Yanagaw mig-atag pa ya Tyumanem sa selat, aw adun da saba ya selat yeiy. Kay idtu muna, sa paglabay da na madég na umay, miglong ya Tyumanem magi kan Dabid kasiling na piglong da:

“Adun na allaw, kun dengegen mayu ya kanaken piglong,

diliꞌ mayu pagpakategelen ya kamayu anenganeng.”#4:7 Mabasa adti Salmo 95:7d-8.

8Ya banwa na paglagdengan yeiy, bekeꞌ na banwa na Canaan na pigkadtuwan ni Joswé asini muna dun ni paggagad nan sa manga buwadbuwad ni Isra-él. Kay kun si Joswé nyatag pa sa manga utaw na Isra-él sa tengteng paglagdengan, na, diliꞌ da galu ya Tyumanem maglong sa sambuk na allaw na un paglagdengan na manga utaw. 9Yanagaw awun pa paglagdeng na pigtagilan na Tyumanem sa manga utaw nan, kasiling na paglagdeng nan adti kapitu na allaw pagkatigkas na pag-imoꞌ nan sa kadég. 10Aw dun ni allaw yan, pangkay singalan ya nyakasambuk da adti paglagdengan yan, makalagdeng sakanan adti kanan manga imo-unun, kasiling na pig-imoꞌ na Tyumanem. 11Yanagaw tibagsegan tadun na makaseled adti paglagdengan yan, pada diliꞌ kitadun makasuway kasiling na manga mangkatikadeng tadun asini muna na walaꞌ dalug sa manga suguꞌ na Tyumanem.

12Kay to-o matulus ya tingeg na Tyumanem, aw to-o pa matalem kay sa lipang. Mabatug nan kelegan ya anenganeng na manga utaw kasiling na lipang na pigtibas na matengaꞌ nan ya pigkita͡an na pesaꞌ, aw dayaw uman datengen ya utuk na pesaꞌ. Aw mabatug na kanan tingeg bukasan ya awun ni anenganeng na utaw pangkay ya pigtaguꞌ nan dala ya manga palpa aw pagkaliman nan. 13Aw walaꞌ ya pangkay unu na pigtaguꞌ na diliꞌ ka-ede-an na Tyumanem. Kyinitaꞌ nan alag, aw nyabangal adti kanan ya kadég. Aw tubagenen tadun adti kanan ya kadég na kanaten pigpan-imoꞌ.

Si Jisus ya kanaten To-o Matas na Magdadugsu-ay

14Yanagaw, pakasaligen tadun ya kanaten pagpangintu-u. Kay awun da kanaten To-o Matas na Magdadugsu-ay na yan si Jisus na Iseꞌ na Tyumanem na adtu la ni tas na langit. 15Aw kya-ede-an nan ya kadég na pagtandaꞌ kanaten kay kya-agiyan nan saba uman. Manang walaꞌ sakanan pakasalaꞌ. 16Yanagaw diliꞌ kitadun mabekenbeken magpalapit adti trunu na Tyumanem na to-o magkallat, pada kallatan kitadun nan aw tabangan nan dun ni allaw na manganday kitadun kanan.

Currently Selected:

Hibriyu 4: klgv

Highlight

Copy

Compare