Hibriyu 2

Ya pagpaluwaꞌ na Tyumanem

1Asuntu sa kadég yeiy, ka-ilangan betang tadun adti kanaten anenganeng ya matinaw na palna-u na pigdengeg da tadun, pada diliꞌ kitadun makasuway. 2Kya-ede-an mayu saba ya asini muna, na magi sa manga anghil, awun pig-atag na Tyumanem na manga suguꞌ na diliꞌ kapalipaslipasan. Aw kun diliꞌ dalugun na utaw, pa-emel-emelen sakanan umbaꞌ sa salaꞌ na pig-imoꞌ nan. 3Yanagaw to-o pa dun ya pa-emel-emel kanaten kun palipaslipasan tadun ya to-o madyaw na pagpaluwaꞌ na muna pigpa-edeꞌ na kanaten Matas na Pangulu. Aw ya manga utaw na dyumengeg sa piglong nan, silan ya migmatinaw adti kanaten. 4Aw ya pagpaluwaꞌ yeiy, pigmatinaw uman na Tyumanem magi sa manga pangilala aw milagru aw manga katadeng na pig-atag na Ispiritu nan adti tagsambuksambuk kanaten magi sa kanan pagbayaꞌ.

Magi kan Jisus dyumateng ya pagpaluwaꞌ sa manga utaw

5Na, bekeꞌ na manga anghil ya pigpadumala na Tyumanem sa banwa na dumadateng pa na pigkasampetan ku, manang manga utaw saba. 6Awun pigpasulat asini muna:

“Kay Tyumanem, anangaꞌ kaꞌ na gayed mu pig-anenganeng ya manga utaw?

Anangaꞌ mu silan to-o diyaga͡an?

7 Pangkay diliꞌ to-o madugay na pigpadalem mu ya manga utaw sa manga anghil,

manang pigpatas mu ya kanilan dengeg kasiling na hariꞌ.

8 Aw pigpadumala mu kanilan ya kadég.”#2:6-8 Mabasa adti Salmo 8:4-6.

Walaꞌ ya pangkay sambuk na diliꞌ dumala͡an na utaw. Manang adun, walaꞌ pa tadun kita-a na pigdumala͡an nilan ya kadég. 9Manang kyinitaꞌ da tadun saba na si Jisus diliꞌ to-o madugay ya pagpadalem kanan na Tyumanem sa manga anghil. Aw asuntu sa kadakulaꞌ na kallat na Tyumanem sa manga utaw, nyatay si Jisus kalyu sa kadég tadun. Asuntu uman sa pagti-is nan adti kanan pagkamatay, pig-imoꞌ sakanan hariꞌ na to-o matas ya dengeg aw to-o pigbasa͡an. 10Ya Tyumanem, yan ya mig-imoꞌ sa kadég, aw pig-imoꞌ nan ya kadég yeiy pada basa͡an sakanan. Umbaꞌ saba ya kanan pagbayaꞌ na apeten ni Jisus ya manga pagti-is pada pakitaꞌ na sakanan ya umbaꞌ magpaluwaꞌ kanaten. Pig-imoꞌ yeiy na Tyumanem pada madég ya mangayseꞌ nan na madala adti tas na langit aw makasambuk dun ni kadyawan nan. 11Kay si Jisus ya miglinis sa kanaten manga salaꞌ. Aw ya kanan Ama, nya-imoꞌ da uman Ama tadun. Aw yeiy ya du-an na walaꞌ sakanan kamulamula na magtawag kanaten na kanan manga inulug. 12Kay miglong si Jisus adti Ama,

“Un ku ubat-ubat ya kanmu ngalan adti manga inulug ku,

aw dun ni katipun na manga mangintu-uway na nyanimba kanmu, deyen ta kaw magi sa dalangan.”#2:12 Mabasa adti Salmo 22:22.

13Aw miglong pa uman sakanan,

“Sumalig aku sa Tyumanem.”

Aw miglong pa uman,

“Ini aku aw ya manga mangayseꞌ na pig-atag na Tyumanem kanak.”#2:13 Mabasa adti Isayas 8:17-18.

14Asuntu na mangayseꞌ da kitadun na Tyumanem na awun lawas aw duguꞌ, yan ya du-an na migpaka-utaw uman si Jisus, pada magi sa pagkamatay nan, degen nan ya katulus ni Satanas na yan ya lyekatan sa pagkamatay. 15Aw magi uman sa pagkamatay ni Jisus, pigpaluwaꞌ nan ya manga utaw na nya-allang na kanilan kakallekan matay dun ni kadugay na pag-eyaꞌ nilan asini tas na lupaꞌ. 16Kay to-o la nyabangal na bekeꞌ na manga anghil ya pigtabangan ni Jisus, manang ya manga buwadbuwad baling ni Abraham. 17Yanagaw si Jisus nya-imoꞌ utaw kasiling tadun aw nyeyaꞌ asini kanaten. Pigka-agiyan nan ya kanaten kya-agiyan pada kallatan kitadun nan aw umbaꞌ sakanan ma-imoꞌ To-o Matas na Magdadugsu-ay adti asdangan na Tyumanem. Aw pigtumbay nan na dugsuꞌ ya kanan pagka-utawun pada lanasen ya manga salaꞌ na manga utaw. 18Aw asuntu sa manga kya-agiyan nan na pagti-is aw manga pagtandaꞌ, makatabang sakanan sa manga utaw na pigtandaꞌ uman.

Currently Selected:

Hibriyu 2: klgv

Highlight

Copy

Compare