Hibriyu 1

Matas pa si Jisu-Kristu kay sa manga propita

1Asini muna, madég ya manga allaw na miglong ya Tyumanem adti kanaten mangkabaklegay magi sa manga propita nan, aw madég ya pa-agi na paglong nan kanilan. 2Manang adun na manga kamoliyan na allaw, miglong ya Tyumanem kanaten magi sa kanan Iseꞌ. Kay magi sa kanan Iseꞌ pig-imoꞌ nan ya kadakulaꞌ na banwa, aw yan ya pigpatagtun nan sa kadég. 3Dun ni kanan, pagkita-en ya kalalamdag na katulus na Tyumanem. Aw kun unu ya Ama, maynan uman ya Iseꞌ. Aw magi sa katulus na kanan tingeg, ya kadég na pig-imoꞌ nan asini muna, kenneꞌ nan migpadeleg taman adun. Aw awun pa pig-imoꞌ nan pada kalinisan ya manga utaw sa manga salaꞌ nilan, aw tigkas yan nyingkud sakanan adti kalintu na trunu na Tyumanem na awun ni tas na langit.

Matas pa si Jisu-Kristu kay sa manga anghil

4Aw to-o matas ya Iseꞌ na Tyumanem kay sa manga anghil. Aw ya pig-atag kanan na ngalan to-o pa dengganen kay sa manga anghil. 5Kay walaꞌ ya sambuk na anghil na piglongan na Tyumanem:

“Ikaw ya kanak Iseꞌ,

aw adun, pigpakitaꞌ ku na aku ya kanmu Ama.”#1:5a Mabasa adti Salmo 2:7.

Aw dun ni kanan paglong, bekeꞌ na anghil ya pigkasampetan nan sa maynini:

“Aku ya Ama nan, aw sakanan ya kanak Iseꞌ.”#1:5b Mabasa adti 2 Samwél 7:14 aw 1 Kronikas 17:13.

6Aw sa pagpadala na Tyumanem sa kanan tamisa na Iseꞌ asini tas na lupaꞌ, miglong sakanan:

“Kamu na manga anghil, pagsimba͡en mayu sakanan.”#1:6 Mabasa adti Déutéronomiyo 32:43.

7Aw ini pa uman ya piglong nan:

“Ya kanak manga sugu-anen na anghil, mabatug ku silan imo-un kasiling na samet, aw kasiling na atulun.”#1:7 Mabasa adti Salmo 104:4.

8Manang miglong ya Tyumanem adti kanan Iseꞌ,

“Ya trunu na kanmu pagka Tyumanem, walaꞌ ya katigkasan.

Aw ya bangkaꞌ na gayed mu pig-awidan, yan ya pangilala sa paghariꞌ mu sa kanmu kasakupan.

Aw matinaw ya kanmu pagdumala.

9 To-o kaw pagkatutukan sa mangkadyaw na imo-unun,

manang diliꞌ mu pagkaliman ya mangkalatay na imo-unun.

Yanagaw, aku na Tyumanem mu ya migpatas kanmu aw pig-atagan ta kaw na pagleya na walaꞌ ya maka-unawa,

aw to-o pa dakulaꞌ ya kanmu pagleya kay sa kanmu manga eped.”#1:8-9 Mabasa adti Salmo 45:6-7.

10Aw awun uman pigpasulat na Tyumanem na maglong adti Iseꞌ nan:

“Kay Matas na Pangulu, asini muna pagkalekat, ikaw ya mig-imoꞌ sa kadakulaꞌ na banwa,

aw ya langit pig-imoꞌ na kanmu tulluꞌ.

11 Dumateng ya allaw na malagak ya kadég nilan, manang ikaw, kenneꞌ mu awun.

Ya kadég nilan alag magkadadan kasiling na kadégkadég na magkalugnas.

12 Aw kasiling uman na kadégkadég na malawig, lulunun mu silan aw dayaw mu silan sayuwan.

Manang ikaw, kenneꞌ mu na diliꞌ ma-uman aw walaꞌ ya katigkasan.”#1:10-12 Mabasa adti Salmo 102:25-27.

13Aw walaꞌ ya anghil na piglongan na Tyumanem sa kasiling na piglong nan sa Iseꞌ nan:

“Ingkud kaw apit asini kalintu na trunu ku,

mendaꞌ na mabus ku degen ya manga po-on mu aw betang ku silan adti salad na siki mu.”#1:13 Mabasa adti Salmo 110:1.

14Yanagaw unu kadiꞌ ya manga anghil? Oloꞌ saba silan manga sugu-anen na Tyumanem. Pangkay kun diliꞌ silan pagkita-en manang pigpadala nan silan pada tumabang sa manga utaw na un paluwa-en na Tyumanem.

Currently Selected:

Hibriyu 1: klgv

Highlight

Copy

Compare