Hibriyu 3

Matas pa si Jisu-Kristu kan Moysis

1Kay manga inulug ku na pigtani la na Tyumanem, pigtawag da kamu nan na un makasambuk sa kadég na awun ni tas na langit. Yanagaw anenganengen tadun si Jisus na yan ya pigpadala na Tyumanem aw nya-imoꞌ To-o Matas na Magdadugsu-ay na kanaten pigpangintu-uwan. 2Asuntu na kasaligan sakanan, pigtuman nan ya kadég na pigsuguꞌ kanan na Tyumanem, kasiling ni Moysis na pigtuman nan ya pigsuguꞌ kanan na Tyumanem na yan ya paggagad sa manga utaw nan. 3Manang si Jisus ya umbaꞌ deyen kay matas pa sakanan kan Moysis. Kasiling na utaw na migtulluk sa balay, matas pa ya dengeg nan kay sa balay na pigtulluk nan. 4Kay kya-ede-an tadun na ya kadég na balay awun saba migtulluk. Manang ya mig-imoꞌ sa kadég, yan ya Tyumanem. 5Na, si Moysis kasaligan na sugu-anen dun ni paggagad nan sa manga utaw na Tyumanem. Aw ya pig-imoꞌ nan, yan ya alung sa dumadateng na un pa-edeꞌ na Tyumanem. 6Manang si Kristu to-o pa matas asuntu na Iseꞌ sakanan na Tyumanem aw kasaligan sakanan dun ni pagdumala sa manga utaw na Tyumanem. Aw kitadun ya kasakupan nan kun diliꞌ tadun botonan ya kanaten pagpangintu-u aw ya pag-iman mendaꞌ adti katigkasan.

Ya lagdenganan na manga utaw na Tyumanem

7Yanagaw, kasiling na piglong na Ispiritu Santo asini muna:

“Adun na allaw, kun dengegen mayu ya piglong na Tyumanem,

8 diliꞌ mayu pagpakategelen ya kamayu anenganeng kasiling na pig-imoꞌ na manga mangkatikadeng mayu asini muna.

Kay adtu ni kaligbinan, nyatu silan sa Tyumanem.

9 Aw miglong ya Tyumanem: ‘Pigtandaꞌ baling nilan kun ayin taman ya kanak pasinsiya,

pangkay pigkitaꞌ nilan ya madég na pigpan-imoꞌ ku seled na kapatan (40) ka umay.

10 Yanagaw to-o aku nyadaman kanilan,

aw miglong aku: Gayed nyakasuway ya kanilan anenganeng,

aw walaꞌ nilan daluga ya pigpalna-u ku kanilan.

11 Aw dun ni kanak pagkadaman,

migsapaꞌ aku na diliꞌ silan makadateng adti banwa na un ku kanilan galu palagdengan.’ ”#3:7-11 Mabasa adti Salmo 95:7d-11.

12Kay manga inulug, magpakatadeng kamu na walaꞌ galu ya adti kamayu na mag-anenganeng sa malatay na yan ya makapalumay sa kamayu pagpangintu-u, aw yeiy ya makapasuway kamayu lekat adti Tyumanem na Gayed Awun. 13Manang ya kadég mayu magpakabagsegay sa ginawa kada allaw talana awun pa selat, pada diliꞌ kamu makasuway asuntu sa manga salaꞌ na yan ya makapategel kamayu. 14Kun padelegen tadun ya pagpangintu-u kan Kristu kasiling na idtu muna taman adti katigkasan, magpadeleg uman ya pagpakasambuk tadun kanan. 15Kasiling na pigpasulat da saba:

“Adun na allaw, kun dengegen mayu ya piglong na Tyumanem,

diliꞌ mayu pagpakategelen ya kamayu anenganeng kasiling na pig-imoꞌ na manga mangkatikadeng mayu dun ni pag-atu nilan kanan.”#3:15 Mabasa adti Salmo 95:7d-9a.

16Singalan kaꞌ manga utawa ya nyakadengeg sa piglong na Tyumanem manang nyatu baling silan kanan? Yeiy saba ya manga utaw na piggagad ni Moysis lekat adti nasud na Ihiptu. 17Aw singalan kaꞌ uman ya to-o pigkadamanan na Tyumanem seled na kapatan (40) ka umay? Yeiy saba ya manga utaw na nyampakasalaꞌ, aw ya syampetan nilan, nyangkamatay silan dun ni kaligbinan. 18Aw singalan uman manga utawa ya pigsapa-an na Tyumanem na diliꞌ silan makasambuk adti lagdenganan na lekat adti kanan? Yeiy ya manga utaw na walaꞌ dalug sa manga suguꞌ nan. 19Yanagaw to-o nyabangal adti kanaten na walaꞌ silan pakaseled adti lagdenganan na pigtagilan na Tyumanem kanilan asuntu na walaꞌ silan pangintu-u kanan.

Currently Selected:

Hibriyu 3: klgv

Highlight

Copy

Compare