Hibriyu 13
13
Ya imo-unun na makatutuk sa Tyumanem
1Kay manga inulug na nyangintu-u kan Kristu, padelega ya paggaginawa͡ay mayu.
2Diliꞌ mayu pagkalingawan ya pagpamasa sa manga utaw na maka-ibwang dun ni kamayu. Kay awun utaw na nyamasa sa manga nyaka-ibwang kanilan aw walaꞌ nilan ka-ede-i na ya nyibwang kanilan manga anghil kadiꞌ na Tyumanem.#13:2 Mabasa adti Génésis 18:1-8 aw 19:1-3.
3Aw diliꞌ mayu pagkalingawan ya manga eped mayu na mangintu-uway na kenneꞌ nyakalabusu. Tabangi mayu silan kasiling na kamu uman ya nyakalabusu. Aw tabangi uman ya manga eped mayu na pigpamulayaman kasiling na kamu uman ya pigpamulayaman. Bati-en mayu galu ya kasiling na pigbatiꞌ nilan.
4Ya kadég mayu magbabasa͡ay sa kapangugnanay mayu. Aw diliꞌ kamu maglakadenen. Kay ya manga maglakadenen aw manga magkasala-enen, pa-emel-emelen saba na Tyumanem.
5Aw diliꞌ mayu pagginawa͡an ya kuwalta. Umbaꞌ da saba kun unu ya nyatagtun mayu. Kay pigpasulat na Tyumanem asini muna, “Diliꞌ ta kamu pabaya-an, aw diliꞌ ta kamu uman ayawan.” #13:5 Mabasa adti Déutéronomiyo 31:6 aw Joswé 1:5. 6Yanagaw diliꞌ kitadun magduwaduwa maglong:
“Ya Tyumanem yan ya magtabang kanaken,
yanagaw walaꞌ ya un ku kallekan.
Unu kaꞌ ya mabatug na utaw imo-un kanaken?”#13:6 Mabasa adti Salmo 118:6.
7Diliꞌ mayu pagkalingawan ya manga utaw idtu muna na migpalna-u kamayu sa tingeg na Tyumanem. Anenganenga mayu ya syampetan na kadyaw na manga imo-unun nilan taman na pagkamatay nilan. Aw imo-a mayu pundinganan ya kanilan pagpangintu-u.
8Si Jisu-Kristu walaꞌ ya pagka-uman, lekat pa asini muna taman adun, aw pangkay adti manga allaw na dumadateng pa na walaꞌ ya tyamanan.
9Diliꞌ kamu magka-agad-agad sa pangkay unu na sangkamuluꞌ na palna-u. Madyaw pa na pakabagsegen tadun ya kanaten pagpangintu-u magi sa kallat na Tyumanem aw bekeꞌ na manga katanem sa pagkan. Walaꞌ ya un ma-untung na manga utaw na dumalug sa manga katanem yeiy. 10Yanagaw, ya manga migtibagseg dyumalug sa katanem na manga Judiyu sa pagdugsuꞌ adti kanilan dugsu-anan, diliꞌ nilan baling matagtun ya kadakulaꞌ na nya-untung tadun adti pagdugsuꞌ ni Jisus dun ni krus. 11Dun ni muna pakang, ya pangulu na magdadugsu-ay dumala sa duguꞌ na ayep adti seled na Tambiꞌ na Pigtani adti Tyumanem, kay yan ya pagtabun sa salaꞌ na manga utaw. Aw ya lawas na manga ayep na pigkamangan sa duguꞌ, pigdala adti luwaꞌ na kampu aw adtu nilan sangaba. 12Maynan uman ya nya-imoꞌ kan Jisus dun ni pagpati-is kanan adti luwaꞌ na syudad na Jérusalim, pada magi sa duguꞌ nan mabatug da linisan ya manga utaw sa salaꞌ nilan. 13Yanagaw ayawan tadun ya pagdalug sa manga katanem na manga Judiyu dun ni muna pakang. Aw sumambuk kitadun kan Jisus adti pagkamulamula na pagti-is nan dun ni pagdugsuꞌ sa kanan lawas adti luwaꞌ na syudad. 14Kay asini tas na lupaꞌ walaꞌ ya tengteng syudad tadun, manang migtagad pa kitadun sa bagu na syudad na dumateng na yan ya un tadun eya-an na walaꞌ ya tyamanan. 15Yanagaw magi kan Jisus, naten padelegen ya pagdeyen sa Tyumanem, kay yan ya kanaten pagdugsuꞌ. Aw dun ni paglong tadun, gayed naten pa-edeꞌ ya kanan ngalan adti kadég na utaw.
16Diliꞌ mayu uman pagkalingawan ya pag-imoꞌ sa madyaw, aw pagtatabangay kamu. Kay yeiy alag ya palangad dugsuꞌ na makatutuk sa Tyumanem.
17Pagka͡agadan aw pagbasa͡an mayu ya manga miggagad kamayu. Kay gayed kamu nilan pigpakatanawan pada diliꞌ kamu makasuway lekat adti kamayu pagpangintu-u. Nya-edeꞌ silan na dumateng ya allaw na awun tubagenen nilan adti Tyumanem sa paggagad nilan kamayu. Kun ka͡agadan aw basa͡an mayu silan, magkaga͡an ya ginawa nilan maggagad kamayu. Manang kun diliꞌ mayu silan ka͡agadan, magkabegat ya ginawa nilan aw walaꞌ ya ma-untung mayu dun.
18Panawagtawagi kami adti Tyumanem, kay nya-edeꞌ kami na malinis ya kanami anenganeng aw gayed nami pigtibagsegan na diliꞌ kami pagsala-en dun ni kanami manga imo-unun. 19Aw to-o aku nyanginayuꞌ na panawagtawagan mayu na maksay aku makalikuꞌ dun ni kamayu.
Ya katigkasan na sulat
20Pigpanawagtawagan ta kamu adti Tyumanem na lyekatan sa kalinaw na yan ya migmataw sa kanaten Matas na Pangulu na si Jisus. Si Jisus ya magdadiyaga͡ay kanaten na palangad karniro nan. Aw asuntu sa duguꞌ ni Jisus, pigpa-iganget nan ya bagu na pakang na walaꞌ ya tyamanan. 21Tagilanen galu na Tyumanem ya kamayu anenganeng pada ma-imoꞌ mayu ya pagkaliman nan. Aw tabangan kamu ni Jisus sa pag-imoꞌ sa makatutuk sa Tyumanem. Yanagaw umbaꞌ atag adti kan Jisu-Kristu ya dengeg aw pagdeyen na walaꞌ ya tyamanan. Amén.
22Kay manga inulug ku na nyangintu-u, nyanginayuꞌ aku na to-o mayu pakanyegan ya pigpalna-u ku asini sulat ini, kay diliꞌ to-o matas ya sulat ku adti kamayu.
23Aw kaliman ku uman na ka-ede-an mayu na ya inulug tadun na si Timotiyo, pigpaluwaꞌ da lekat adti kalabusuwanan. Yanagaw kun maksay sakanan dumateng adi tampid ku, pa-agad ku sakanan dun ni kamayu.
24Pangumusta͡an aku mayu adti kadég na manga maggagaday aw sa kadég na mangintu-uway dun ni kamayu. Aw ya manga inulug tadun idi na taga probinsiya na Italiya, nyangumusta silan uman kamayu.
25Ayin pa aku galu na ya grasya na Tyumanem gayed magad sa kadég mayu. Amén.
Currently Selected:
Hibriyu 13: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
