Hibriyu 12

Ya pundinganan ni Jisus na madyaw tadun dalugun

1Yanagaw, asuntu na pigpalibedan kitadun na madég to-o na utaw na nyuna kanaten nyangintu-u sa Tyumanem, botonan tadun ya manga salaꞌ aw ya kadég na nyakatagen kanaten. Aw padelegen tadun ya pagpangintu-u kasiling na utaw na mig-abay nyalaguy na migpadeleg mendaꞌ na dyumateng adti datenganan. 2Tibullukun tadun ya kanaten anenganeng adti kan Jisus. Kay yan ya lyekatan sa kanaten pagpangintu-u sa Tyumanem, aw yan uman ya maglingeb sa pagpangintu-u tadun. Aw asuntu sa pagleya na madawat nan kagaya, pigti-isan nan ya kanan pagkamatay adti krus aw walaꞌ nan pagbetangan sa ginawa ya pagmulamula kanan. Aw adun, adtu la sakanan nyingkud apit adti kalintu na trunu na Tyumanem. 3Yanagaw anenganenga mayu si Jisus na nyati-is nan ya pagdumut kanan na manga makasasalaꞌ mendaꞌ na pigpatay nilan sakanan, pada diliꞌ mayu ka-ayawan ya kamayu pagpangintu-u sa Tyumanem aw diliꞌ uman magkalumay ya ginawa mayu. 4Manang kamu, dun ni pagtibagseg mayu na degen ya salaꞌ, walaꞌ mayu apeta ya pigpatay. 5Aw kamu na manga mangayseꞌ na Tyumanem, pagaw kyalingawan da mayu ya pigpasulat nan na yan ya migpakabagseg sa kamayu ginawa:

“Kay Toꞌ na kanaken iseꞌ, diliꞌ mu pagpalipaslipasan ya pagpitul kanmu na Tyumanem, aw diliꞌ magkalat ya ginawa mu kun pagsagda kaw nan.

6 Kay pagpitulun nan saba ya manga utaw na pigginawa͡an nan, aw paglabeten nan ya kadég na pigtawag nan na kanan mangayseꞌ.”#12:5-6 Mabasa adti Probirbiyo 3:11-12.

7Yanagaw pangkay unu ya kalugan na un dumateng kamayu, ti-isa mayu kay yeiy ya pagpitul kamayu na Tyumanem. Kay mangayseꞌ kamu nan saba. Singalan kaꞌ ya iseꞌ na diliꞌ palna-uwan aw pitulun na ama nan? 8Kun diliꞌ mayu apeten ya kanan pagpitul, na, bekeꞌ kamu na tengteng mangayseꞌ nan. Kasiling kamu baling na iseꞌ adti luwaꞌ. Kay ya kadég tadun na kanan tengteng iseꞌ, ka-agiyan tadun saba ya pagpitul nan. 9Na, ya tagsambuksambuk kanaten awun ama tadun asini tas na lupaꞌ na migpitul kanaten, aw pigbasa͡an tadun silan. Yanagaw anangaꞌ diliꞌ tadun dawaten ya pagpitul na kanaten Ama na awun ni tas na langit? Kay ya pagpitul yeiy makakadyaw saba kanaten. 10Ya kanaten manga ama, diliꞌ to-o madugay ya pagpitul nilan kanaten. Yan oloꞌ ya pagpitul nilan kun unu ya adti anenganeng nilan na madyaw kanaten. Manang ya kana Tyumanem pagpitul kanaten to-o dakulaꞌ ya ma-untung, pada magkalinis kitadun kasiling nan. 11Ya pagpitul kanaten adun, masakit aw diliꞌ makapaleya kanaten. Manang ya sampetan yeiy, kun nyakapalna-u kanaten ya pagpitul yan, magkadyaw ya bet tadun aw yan ya mag-atag sa kalinaw na kanaten pag-eyaꞌ.

12Yanagaw tibagsegi mayu ya pagpadeleg pangkay migkalumay da ya manga bekten aw tyakigan da ya bukubuku mayu. 13Daluga mayu ya matulid na dalan pada ya eped mayu na malumay ya pagpangintu-u diliꞌ da magduwaduwa, manang magkabagseg baling.

Ya un ma-imoꞌ sa utaw na magpalipaslipas sa kallat na Tyumanem

14Tibagsegi na awun kalinaw mayu adti kadég na manga utaw, aw tibagsegi mayu uman na magkalinis kamu pada katutukan ya Tyumanem kamayu, kay kun walaꞌ yeiy, walaꞌ ya kumitaꞌ sa Tyumanem.

15Magpakatadeng kamu pagaw awun sambuk kamayu na tumalikud sa kallat na Tyumanem, kay ya utaw na maynan kasiling sakanan na tanem na nyunga sa to-o mapayit aw magpakabaleng. Aw ma-imoꞌ baling sakanan paglekatan sa ayil na manga mangintu-uway, aw madég ya magagad nan adti pag-imoꞌ sa salaꞌ.#12:15 Mabasa adti Déutéronomiyo 29:18.

16Magpakatadeng kamu uman na diliꞌ kamu magkasala-enen aw diliꞌ mayu pagpalipaslipasan ya Tyumanem. Diliꞌ kamu magsiling kan Isaw na walaꞌ pagbetang sa ginawa sa manga kadyawan na un atag kanan na Tyumanem sa pagkamagulang nan, manang pigliwan nan baling oloꞌ sa kakan adti mangud nan. 17Kay kya-ede-an da mayu na pagkatigkas yan kaliman nan ka-atagan uman sakanan sa manga kadyawan sa pagkamagulang nan. Manang diliꞌ da nan mabawiꞌ pangkay to-o pa nan pigsugawan.

Ya pagpalapit sa Tyumanem asini muna aw ya pagpalapit adun

18Ya kamayu pagpalapit sa Tyumanem, diliꞌ kasiling na pagpalapit na manga utaw na Isra-él adti buntud na Sinay. Migpalapit silan adti buntud yan na pigkita-an nilan sa laga na miglagablab aw sa to-o mangitngit na lyumegeb sa kadakulaꞌ na buntud, aw dyengeg nilan ya mabandes na samet. 19Aw dyumengeg silan uman sa uni na trumpita na to-o mabagseg aw sa piglong na tingeg. Aw to-o silan nyangilalat na diliꞌ da galu nilan dengegen ya tingeg yan 20kay to-o silan nyallek sa piglong nan: “Diliꞌ kamu magpalapit adti buntud. Pangkay ayep na guminaꞌ asini buntud, patayen na babintu.” 21Aw to-o silan migteneb sa pigkitaꞌ nilan. Pangkay si Moysis nyakapaglong na to-o sakanan nyallek aw tyakigan.

22Manang yan ya kanaten pigpalapitan adun ya buntud na Ziyon na yan ya bagu na Jérusalim na awun ni tas na langit. Yeiy ya pig-eya-an na Tyumanem na Gayed Awun, aw ya trunu nan kyapalibedan na matag pilammalalan ya manga anghil. Aw dun imo-a ya katipun aw to-o dakulaꞌ ya pagleya.#12:22 Mabasa adti Pigbukasan 21:1-4. 23Aw maka-iyeped da kitadun sa katipun na manga panggadan magulang na mangayseꞌ na Tyumanem na pigsulat da ya ngalan nilan adti libru na awun ni tas na langit. Ya manga utaw yeiy, walaꞌ da ya pagsalaꞌ kanilan kay pig-uman da na Tyumanem ya anenganeng nilan. Makapalapit da kitadun uman adti Tyumanem na yan ya mag-ukumay sa kadég na manga utaw. 24Maynan uman, makapalapit da kitadun kan Jisus na yan ya migpatengaꞌ kanaten adti Ama. Kay nya-imoꞌ ya bagu na pakang magi sa duguꞌ nan na miglinis kanaten, aw matas pa yeiy sa duguꞌ ni Abél na migtatawag na malitan.

25Magpakatadeng kamu na diliꞌ kamu magtimbengel sa piglong na Tyumanem adti kamayu. Diliꞌ kamu magsiling sa manga utaw asini muna na walaꞌ pangintu-u sa piglong nan kanilan, aw walaꞌ silan pakapalaguy sa pa-emel-emel na Tyumanem. Yanagaw unun tadun ya pagkapalaguy sa pa-emel-emel kun diliꞌ tadun pakanyegan ya miglong na lekat adti tas na langit? 26Asini muna sa paglong na Tyumanem dun ni buntud na Sinay, nyangka-eyeng ya lupaꞌ. Manang adun, migpakang sakanan, law nan, “Dumateng ya allaw na bekeꞌ oloꞌ na lupaꞌ ya un ku eyengen manang dala uman ya kadég na awun ni langit.”#12:26 Mabasa adti Hagiyu 2:6. 27Na, ini ya kakawasan na piglong nan: Ya kadég na pig-imoꞌ na Tyumanem alag eyengen aw kamangen. Aw ya diliꞌ ma-eyeng, yan saba oloꞌ ya masamaꞌ.

28Yanagaw pasalamatan tadun ya Tyumanem kay nyaka-akup da kitadun sa Kasakupan na Pighari-an nan na diliꞌ magka-eyeng. Simba͡en tadun na katutukan sakanan aw basa͡an na awun pagkallek. 29Kay ya Tyumanem na pigsimba tadun kasiling na laga na atulun na magpakasangab.#12:29 Mabasa adti Déutéronomiyo 4:24.

Currently Selected:

Hibriyu 12: klgv

Highlight

Copy

Compare