Hibriyu 10

1Kay ya Uldin na pig-atag na Tyumanem adti manga utaw na Isra-él, oloꞌ yeiy alung sa manga kadyawan na dumadateng pa. Yanagaw pangkay gayed silan migdugsuꞌ kada umay adti Tyumanem, manang diliꞌ pa yeiy umbaꞌ kanilan maka-imoꞌ na walaꞌ ya pagsalaꞌ kanilan adti asdangan na Tyumanem. 2Kun nyabatug pa na manga migsimba adti Tyumanem ya paglinis sa kanilan manga salaꞌ magi sa pagdugsuꞌ nilan, diliꞌ da galu malinggal ya anenganeng nilan, aw diliꞌ da silan salut magdugsuꞌ. 3Manang dun ni kanilan pagdugsuꞌ kada umay, oloꞌ yeiy baling magpa-anenganeng sa manga salaꞌ nilan. 4Kay ya duguꞌ na manga tudu na baka aw manga kambing diliꞌ makalanas sa manga salaꞌ na utaw. 5Yanagaw idtu na pagkadi ni Kristu asini tas na lupaꞌ, miglong sakanan adti Ama,

“Walaꞌ kaw katutuki sa pagdugsuꞌ nilan sa ayep aw sa eped pa na pigdugsuꞌ nilan.

Yanagaw pigtagilanan aku mu sa lawas na yeiy ya umbaꞌ pagdugsuꞌ.

6 Walaꞌ kaw pagleya sa kadég na dugsuꞌ na pagsunugun adti dugsu-anan, aw manga eped pa na pigpandugsuꞌ pada kalinisan galu silan sa kanilan manga salaꞌ.

7 Yanagaw miglong aku kanmu, ‘Ini aku na un magtuman sa kanmu pagkaliman, kasiling na pigpasulat mu asini muna.’ ”#10:5-7 Mabasa adti Salmo 40:6-8.

8Dun ni tagnaꞌ na piglong ni Kristu, pangkay madég ya punganan na pagdugsuꞌ dun ni Uldin na manga Judiyu, dala ya pagsunug sa lawas na ayep pada makamang ya manga salaꞌ na utaw, manang walaꞌ katutuki ya Tyumanem sa maynan na pagdugsuꞌ. 9Aw tigkas yan, miglong pa si Jisus adti Ama, “Ini aku na un magtuman sa kanmu pagkaliman, kasiling na pigpasulat mu asini muna.” Yanagaw pigsayuwan na Tyumanem ya muna pa-agi na pagdugsuꞌ. 10Aw asuntu na pigtuman ni Jisu-Kristu ya pagkaliman na Tyumanem, kyalinisan kitadun sa kanaten manga salaꞌ. Minsan da nan oloꞌ imo-a magi dun ni pagdugsuꞌ nan sa kanan lawas.

11Dun ni muna pa-agi, ya manga magdadugsu-ay kada allaw awun silan gayed ni kanilan imo-unun pada magdugsuꞌ adti Tyumanem. Aw pangkay gayed pigsalutsalut ya manga imo-unun yeiy, manang walaꞌ kalanas ya salaꞌ na manga utaw. 12Manang minsan da si Jisus pagdugsuꞌ sa kanan pagka-utawun asuntu sa manga salaꞌ tadun, aw yan da oloꞌ ya umbaꞌ aw diliꞌ da salutsalutun. Aw tigkas yan, nyingkud sakanan apit adti kalintu na Tyumanem. 13Aw adun, adtu la sakanan tyumagad mendaꞌ na mabus degen ya kadég na manga po-on nan aw alag nan silan betang adti salad na kanan siki.#10:13 Mabasa adti Salmo 110:1. 14Magi sa sambuk na dugsuꞌ, dayaw nan piglanas ya manga salaꞌ tadun aw kyalinisan da kitadun na walaꞌ ya tyamanan.

15Aw ya Ispiritu Santo, yan ya migmatinaw adi kanaten sa piglong na Tyumanem asini muna:

16 “Ini ya bagu na pakang na un ku imo-un kanilan sa manga allaw na dumadateng pa:

‘Betang ku ya kanak manga suguꞌ dun ni anenganeng nilan aw dayaw ku tanemen adti seled nilan.’ ”

17Aw miglong pa sakanan,

“Diliꞌ da ku anenganengen ya manga salaꞌ nilan,

aw kalingawan da ku ya manga malatay na imo-unun nilan.”#10:16-17 Mabasa adti Jérémiyas 31:33-34.

18Kun piglanas da ya salaꞌ na manga utaw, diliꞌ da ka-ilangan na magdugsuꞌ pa kitadun sa manga ayep.

Ya pagpalapit tadun adti Tyumanem

19Yanagaw, kay manga inulug ku na nyangintu-u, asuntu sa duguꞌ ni Jisus mabatug da tadun ya pagseled adti asdangan na Tyumanem. 20Kay dun ni pagdugsuꞌ nan sa kanan lawas, kasiling saba na pagkakisay na madakmel na téla na pigsaliben sa Tambiꞌ na Pigtani adti Tyumanem. Aw ya syampetan yeiy, pig-uwangan nan kanaten ya bagu na agiyanan pada makaseled da kitadun aw maka-indeg adti asdangan na Tyumanem. Aw ya agiyanan yeiy, yan ya maggagad kanaten adti ginawa na walaꞌ ya katigkasan. 21Aw asuntu na awun kanaten To-o Matas na Magdadugsu-ay na migdumala sa kasakupan na Tyumanem, 22yanagaw diliꞌ kitadun mabekenbeken magpalapit adti Tyumanem, asuntu sa tengteng na pagpangintu-u tadun kanan. Kay kya-ede-an da tadun na magi sa duguꞌ ni Kristu, kyalinisan da ya kanaten anenganeng aw kya-ugasan da kitadun sa tubig na to-o matinaw. 23Diliꞌ naten botonan ya pag-iman sa kanaten pigpangintu-uwan aw diliꞌ kitadun magduwaduwa, kay ya migpakang kanaten kasaligan saba sakanan. 24Aw gayed kitadun magpakabagsegay sa ginawa pada magpadeleg ya paggaginawa͡ay tadun aw ya pag-imoꞌ sa manga imo-unun na madyaw. 25Aw diliꞌ tadun pagpatenengen ya pagkatipun na kanaten kyanalaman, kasiling na pig-imoꞌ na eped na manga mangintu-uway. Manang magpakabagsegay kitadun baling sa ginawa, labi la na kya-ede-an tadun na malapit da ya allaw na paglikuꞌ ni Jisus.

26Kay kun pigdawat da tadun ya tengteng matinaw na palna-u manang kenneꞌ tadun magpadeleg magpakasalaꞌ, na, walaꞌ da ya eped na pagdugsuꞌ na kasiling na pig-imoꞌ ni Jisus pada lanasen ya manga salaꞌ. 27Yan dakman ya tyagadan na utaw na gayed migpakasalaꞌ ya to-o kallekanan na pag-agbel na Tyumanem sa manga po-on nan adti atulun na miglagablab dun ni allaw na pag-ukum. 28Asini muna, kun lyumakad ya utaw sa Uldin na pig-atag na Tyumanem kan Moysis, aw kun matinawun na duwa aw kun tulu ya utaw, patayen saba sakanan na walaꞌ ya kallat. 29Aw to-o pa dun malatay ya pa-emel-emel sa utaw na maggina-ginaꞌ sa Iseꞌ na Tyumanem aw ya walaꞌ pamasa sa duguꞌ nan na dayaw migpa-iganget sa pakang na Tyumanem. Kay magi sa duguꞌ nan, kyalinisan ya utaw sa manga salaꞌ nilan. Aw to-o pa uman dun malatay ya pa-emel-emel sa migsupla sa Ispiritu Santo na yan ya agiyanan adti kallat na Tyumanem. 30Kya-ede-an tadun saba na Tyumanem ya miglong seiy: “Aku ya magmalit, aw aku ya magpa-emel-emel.” Miglong pa uman sakanan: “Aku ya mag-ukum sa kanak manga utaw.” #10:30 Mabasa adti Déutéronomiyo 32:35-36. 31Aw to-o kallekanan ya Tyumanem na Gayed Awun kun yan ya magpa-emel-emel.

32Na, diliꞌ mayu pagkalingawan ya manga allaw na bagu pa kya-ilawan na matinaw na palna-u ya anenganeng mayu. Aw pangkay madég ya kalugan na kya-agiyan mayu manang nyati-is mayu, aw walaꞌ kamu pag-ayaw sa kamayu pagpangintu-u. 33Pigpamulayaman kamu dun ni asdangan na madég na utaw aw pigpati-is aw pigmulamula kamu nilan. Aw pangkay kun eped mayu ya pig-imo-an sa maynan, manang kasiling na kamu ya pigpati-is, asuntu na pigkallatan aw pigtabangan mayu silan. 34Aw to-o kamu nyallat sa manga eped mayu na mangintu-uway na nyakalabusu. Aw pangkay pigpangamang ya kamayu ka-unan aw kuwalta, manang pigdawat mayu na awun pagleya. Kay kya-ede-an da mayu na to-o pa madyaw ya nyatagtun mayu adti tas na langit na diliꞌ magkalagak. 35Yanagaw diliꞌ mayu pagbotonan ya kamayu pagpangintu-u sa Tyumanem, kay dakulaꞌ saba ya un mayu madawat kagaya. 36Ka-ilangan padelegen mayu ya pag-imoꞌ sa pagkaliman na Tyumanem pangkay unu ya pagti-is na un dumateng. Aw madawat mayu ya kadég na pigpakang nan. 37Kay pigpasulat nan asini muna:

“Agpet da dumateng ya utaw na pigpakang ku aw diliꞌ da madugay ya pagdateng nan.

38 Aw ya utaw na pigdawat da na Tyumanem kasiling na walaꞌ da ya salaꞌ,

matagtun nan ya tengteng ginawa na walaꞌ ya katigkasan asuntu na pyangintu-uwan aku nan.

Manang kun ayawan nan ya pagpangintu-u nan kanak, diliꞌ aku katutukan kanan.” #10:37-38 Mabasa adti Habakuk 2:3-4.

39Diliꞌ kitadun kasiling na manga utaw na tyumalikud sa pagpangintu-u nilan. To-o malatay ya kanilan datengan. Manang kitadun na migpadeleg nyangintu-u, makaluwaꞌ saba.

Currently Selected:

Hibriyu 10: klgv

Highlight

Copy

Compare