Hibriyu 11

Ya pagpangintu-u sa Tyumanem

1Na, unu ya kakawasan na pagpangintu-u sa Tyumanem? Ya pagpangintu-u, yan ya pagsalig tadun sa kanaten pig-iman. Pangkay walaꞌ pa tadun kita-a ya kadég na pigpakang na Tyumanem manang kenneꞌ tadun sakanan pigpangintu-uwan. 2Magi sa pagpangintu-u na kanaten manga mangkatikadeng asini muna, kyatutukan ya Tyumanem kanilan.

3Asuntu sa pagpangintu-u sa Tyumanem, kya-ede-an tadun na pig-imoꞌ nan ya kadakulaꞌ na banwa magi sa paglong nan. Yanagaw ya kadég na pig-imoꞌ nan na pagkita-en, alag yeiy pig-imoꞌ lekat adti diliꞌ pagkita-en.

4Asuntu sa pagpangintu-u ni Abél, migdugsuꞌ sakanan adti Tyumanem, aw to-o pa madyaw ya kanan dugsuꞌ kay sa kan Cain. Aw asuntu sa pagpangintu-u nan, matulid da sakanan adti Tyumanem, aw pigmatinaw yeiy magi dun ni pagdawat na Tyumanem sa dugsuꞌ ni Abél. Yanagaw pangkay nyatay da si Abél, manang ya pig-imoꞌ nan kenneꞌ na nyakapalna-u kanaten.

5Aw asuntu uman sa pagpangintu-u ni Inuk, pigkamang sakanan na Tyumanem pada diliꞌ nan apeten ya pagkamatay asini tas na lupaꞌ, aw walaꞌ da sakanan kita-a. Kay idtu muna sa walaꞌ pa sakanan kamanga, pigmatinaw da dadan na kyatutukan ya Tyumanem kanan. 6Kun walaꞌ ya pagpangintu-u na utaw sa Tyumanem, diliꞌ nan mabatug ya pagpakatutuk kanan. Kay kun ya utaw malim magpalapit adti kanan, ka-ilangan nan pangintu-uwan na awun Tyumanem, aw pangintu-uwan nan uman na awun atag nan adti manga utaw na malim maka-edeꞌ kanan.

7Aw asuntu uman sa pagpangintu-u ni Nuwi, pigpakanyegan nan ya piglong na Tyumanem sa un dumateng asini tas na lupaꞌ pangkay walaꞌ pa nan kita-a. Yanagaw mig-imoꞌ sakanan sa arka pada makaluwaꞌ sakanan lekat adti lenep dala ya kanan pamilya. Aw asuntu sa pagpangintu-u ni Nuwi, dun da ka-ede-i na makasasalaꞌ ya kadég na utaw manang pigdawat sakanan na Tyumanem kasiling na walaꞌ ya salaꞌ.

8Aw asuntu sa pagpangintu-u ni Abraham, pigtuman nan ya piglong kanan na Tyumanem na madtu ni banwa na pigpakang kanan na Tyumanem na un patagtun kanan. Yanagaw pig-indegan nan ya kanan banwa aw nyanaw pangkay walaꞌ nan ka-ede-i kun ayin ya banwa na un nan kadtuwan. 9Asuntu sa pagpangintu-u nan, nyeyaꞌ sakanan dun ni banwa na pigpakang kanan kasiling na dumadayu. Ya kanilan pig-eya-an yan ya layaglayag na inabelan, aw maynan uman ya iseꞌ nan na si Isa-ak aw ya umpu nan na si Jakub. Manang nya-edeꞌ silan na matagtun nilan ya pigpakang kanilan na Tyumanem. 10Kay ya tengteng na pigtagadan ni Abraham, yan ya syudad na walaꞌ ya tyamanan na dadan pigtagilan aw pig-imoꞌ na Tyumanem.

11Aw asuntu uman sa pagpangintu-u, nyaka-iseꞌ ya ka͡ubayan ni Abraham na si Sara pangkay diliꞌ sakanan magpaka-iseꞌ aw to-o la buyag, kay syumalig sakanan na tumanen na Tyumanem ya pigpakang nan kanilan. 12Yanagaw lekat adti kan Abraham ya to-o madég na buwadbuwad, pangkay walaꞌ da ya pag-iman nan na maka-iseꞌ pa. Aw ya kadég na buwadbuwad nan kasiling na kadég na bitun adti langit aw pantad na dagat na diliꞌ ma-iyap.

13Ya kadég na manga utaw yeiy na awun pagpangintu-u, walaꞌ pa nilan kadawat ya manga pigpakang na Tyumanem idtu na utaw pa silan. Manang kya-ede-an nilan na tumanen na Tyumanem ya manga pigpakang nan kanilan. Aw migleya silan, kay kasiling na kyinitaꞌ da nilan adti ma-una ya un dumateng. Aw piglong nilan ya tengteng matinaw na oloꞌ silan dumadayu asini tas na lupaꞌ. 14Aw ya manga utaw na miglong seiy, dun da kabangal na awun pa pyaninaw nilan na banwa na tengteng kanilan eya-anan. 15Kay kun gayed pa nilan pig-anenganeng ya banwa na pig-indegan nilan, mabatug pa nilan ya paglikuꞌ dun. 16Manang yan baling ya to-o nilan pigkaliman na eya-an ya syudad na pigtagilan kanilan na adti tas na langit. Yanagaw walaꞌ kamulamula ya Tyumanem na tawagen sakanan na Tyumanem nilan.

17Na, kaliman na Tyumanem tanda-en ya pagpangintu-u ni Abraham. Aw asuntu sa pagpangintu-u nan, pigtuman nan ya suguꞌ na Tyumanem aw pigdugsuꞌ nan galu ya kanan iseꞌ na tamisa na si Isa-ak, pangkay dun ni kan Isa-ak katuman ya manga pigpakang na Tyumanem kanan, 18law nan, “Magi kan Isa-ak, ma-imoꞌ kaw tyugbulan sa kadég na manga buwadbuwad na pigpakang ku kanmu.” #11:18 Mabasa adti Génésis 21:12 aw Roma 9:7. 19Kay syumalig si Abraham na mabatug saba na Tyumanem matawun si Isa-ak lekat adti pagkamatay. Yanagaw kasiling na nyataw si Isa-ak lekat adti pagkamatay aw nyakalikuꞌ adti ama nan.

20Aw asuntu sa pagpangintu-u ni Isa-ak, pig-atagan nan na manga kadyawan ya mangayseꞌ nan na si Jakub aw si Isaw magi sa paglong nan. Piglongan nan silan sa un dumateng kanilan adti moli pa na allaw.#11:20 Mabasa adti Génésis 27:27-40.

21Aw asuntu uman sa pagpangintu-u ni Jakub, sa un da sakanan matay, pig-atagan nan sa manga kadyawan ya duwa ya umpu nan na mangayseꞌ ni José. Aw dyumukduk dun ni kanan bangkaꞌ na migsimba sa Tyumanem.#11:21 Mabasa adti Génésis 48:1-20.

22Aw asuntu sa pagpangintu-u ni José, nyamalintugun sakanan sa manga inulug nan na miglong: “Pagdateng da na allaw na mindeg ya manga utaw na Isra-él lekat asini banwa na Ihiptu, dala͡en nilan ya pesaꞌ ku aw lebeng adti banwa na Canaan.”#11:22 Mabasa adti Génésis 50:24-26.

23Aw asuntu uman sa pagpangintu-u na mangkatikadeng ni Moysis, walaꞌ silan kallek sa suguꞌ na para-un na yan ya hariꞌ sa Ihiptu.#11:23 Mabasa adti Éxudo 1:22 aw 2:2. Sa pagkitaꞌ nilan na to-o madyaw ya kanilan iseꞌ na bagu nya͡utaw, yanagaw pigtaguꞌ nilan sakanan aw walaꞌ nilan pakita͡an seled na tulumbulan.

24Aw asuntu sa pagpangintu-u ni Moysis, sa pagkadakulaꞌ da nan, diliꞌ malim sakanan tawagen na iseꞌ na biyaꞌ na para-un. 25Yan baling ya pigkaliman nan ya sumambuk dun ni pagti-is na manga utaw na Tyumanem kay sa sumambuk dun ni pagleya sa pag-imoꞌ sa salaꞌ na oloꞌ magpaka-agi. 26Kay pangkay dakulaꞌ to-o ya ka-unan na matagtun nan galu dun ni Ihiptu, manang pigkele͡an nan yeiy. Pigkaliman nan baling ti-isen ya pagpamulayam asuntu sa Misiyas na un pa padala na Tyumanem. Aw pigtibulluk nan ya kanan anenganeng adti dakulaꞌ na un pa nan madawat adti Tyumanem.

27Aw asuntu uman sa pagpangintu-u ni Moysis, pig-indegan nan ya banwa na Ihiptu aw walaꞌ kallek sa kadaman na hariꞌ. Aw migpadeleg adti pigpa-imoꞌ kanan na Tyumanem pangkay awun manga kalugan, kay liwan na pigkitaꞌ da nan ya Tyumanem na diliꞌ pagkita-en. 28Aw asuntu sa pagpangintu-u nan, piglongan nan ya kadég na manga utaw na Isra-él na galisan nilan na duguꞌ na karniro ya lindeg aw balabag na suwangan na balay nilan, pada diliꞌ pamatayen na anghil ya kamagulangan na iseꞌ nilan. Aw dun ni piglong nan, dun da nan imo-a kada umay ya Pista na Paglabay na Anghil na Tyumanem.#11:28 Mabasa adti Éxudo 12:21-30.

29Asuntu uman sa pagpangintu-u na manga utaw na Isra-él, tyumalipag silan sa Dagat na Mapula kasiling na nyanaw silan dun ni lupaꞌ na magdang. Manang ya manga Ihiptuwanen na dyumalug kanilan, nyabus nyangkalemes.#11:29 Mabasa adti Éxudo 14:21-31.

30Asuntu uman sa pagpangintu-u na manga utaw na Isra-él, nyagettan ya matas na inalad na batu na syudad na Jériko pagkatigkas nilan libedlibedan seled na pitungallaw.

31Aw asuntu sa pagpangintu-u, si Rahab na miggalin sa pagkaka͡ubayan nan, pigpa-ebeng nan ya duwa ya utaw na pigsuguꞌ ni Joswé na manilib sa syudad na Jériko. Yanagaw walaꞌ sakanan paka-eped dun ni pagkamatay na manga utaw na walaꞌ pangintu-u sa Tyumanem.#11:31 Mabasa adti Joswé 2:1-21 aw 6:22-25.

32Madég pa galu ya un ku dandanen sa manga eped na nyangintu-u sa Tyumanem. Manang diliꞌ mabus kasampetan ya kan Gidyon, aw kan Barak, aw kan Samson, aw kan Jépta, aw kan Dabid, aw kan Samwél aw manga eped na propita asini muna. 33Asuntu sa kanilan pagpangintu-u, ya eped kanilan pigdeg nilan ya madég na hariꞌ. Aw ya manga eped matinaw ya kanilan pagdumala. Aw ya eped pa uman kanilan nyakadawat sa manga pigpakang na Tyumanem. Aw ya eped kanilan walaꞌ kana na manga liyon kay pigtikem na Tyumanem ya manga bakaꞌ nilan.#11:33 Mabasa adti Danyél 6:17-23. 34Awun uman eped kanilan na pig-agbel adti atulun na miglagablab, manang walaꞌ silan kasunug.#11:34 Mabasa adti Danyél 3:1-30. Aw ya eped kanilan pigpatay galu na manga po-on nilan manang nyakapalaguy silan. Aw ya eped uman, pangkay to-o la migpangkalumay manang pigpakabagseg silan na Tyumanem. Aw awun eped kanilan na pyakabulut na Tyumanem adti tanam pada mampamalaguy ya manga sundalu na syumulung sa kanilan banwa. 35Aw awun uman manga ka͡ubayan na kyamatayan sa iseꞌ nilan na nyataw uman.#11:35 Mabasa adti 1 Hariꞌ 17:17-24 aw 2 Hariꞌ 4:25-37.

Awun uman manga eped na nyangintu-u sa Tyumanem na to-o pigpati-is mendaꞌ na nyatay silan. Pigkaliman nilan baling ya magti-is kay sa ayawan nilan ya kanilan pagpangintu-u. Kay kya-ede-an nilan na dumateng pa ya allaw na matawun silan na Tyumanem aw atagan na ginawa na walaꞌ ya katigkasan. 36Aw awun pa uman manga eped kanilan na pig-odoy-odoy aw byadasan na lalabet manang nyati-is nilan ya kadég. Aw ya manga eped pyan-eketan na sangkaliꞌ aw pigpangkalabusu. 37Ya manga eped pigpatay magi sa babintu. Aw ya eped uman pyanggabas ya lawas nilan. Aw ya manga eped pigpatay na kampilan. Aw awun manga eped na pyangkalugnasan aw syumut dakman silan sa kindal na karniro aw kambing. To-o silan migpangkapelek aw pigpati-is aw to-o pigpamulayaman. 38Nyangkaleges silan migpataguꞌ adti kaligbinan aw kabuntudan, aw oloꞌ ilib aw gawang na lupaꞌ ya pig-eya-an nilan. Ya tengteng matinaw, ya manga utaw asini tas na lupaꞌ diliꞌ umbaꞌ pa-iyeped kanilan.

39Ya kadég nilan na pigkasampetan, kyatutukan ya Tyumanem sa kanilan pagpangintu-u. Manang walaꞌ pa nilan kadawat ya pigpakang nan kanilan. 40Kay awun pa to-o madyaw na pigtagilan kanaten na Tyumanem, pada maka-iyeped da ya kadég tadun kanilan dun ni kamoliyan na allaw na lingeben da na Tyumanem ya pigpalpa nan kanaten.

Currently Selected:

Hibriyu 11: klgv

Highlight

Copy

Compare