Épéso 5

Ya imo-unun na manga utaw na awun da ni kalalamdag

1Yanagaw, asuntu na manga mangayseꞌ da kamu na Tyumanem na kanan pigginawa͡an, silingi mayu ya bet nan. 2Aw gayed mayu ginawayi ya manga eped mayu, kasiling na pagginawa ni Kristu kanaten aw pigpakitaꞌ nan yeiy magi dun ni pag-atag nan sa kanan pagka-utawun pada kanaten. Sakanan ya dugsuꞌ na nyakatutuk sa Tyumanem.

3Aw asuntu na mangayseꞌ da kamu na Tyumanem, diliꞌ madyaw na kasampetan kamu na migkasala-enen aw mig-imoꞌ sa malatay aw nyaybeg sa pangkay unu na kamayu pagkaliman. Kay diliꞌ yeiy umbaꞌ adti manga mangintu-uway. 4Diliꞌ da kamu maglong sa tingeg na makamulamula͡ay, aw manga kasampetanen na walaꞌ ya guna, aw tingeg na diliꞌ madyaw pagpakanyegan. Yan baling ya umbaꞌ mayu paglongun ya magpasalamat sa Tyumanem. 5Kay kya-ede-an da mayu saba na pangkay singalan utawa ya magkasala-enen aw mag-imoꞌ sa malatay, diliꞌ maka-akup dun ni Kasakupan na Pighari-an ni Kristu aw Tyumanem. Aw maynan uman ya utaw na magkaybeg sa pangkay unu ya pagkaliman nan, kay yeiy baling ya nya-imoꞌ palangad manga tyumanem nan. 6Diliꞌ mayu pagtumbay na gagaden kamu na manga utaw na maglong na diliꞌ salaꞌ ya kanilan pig-imoꞌ, kay yan ya tingeg na walaꞌ ya ma-untung. Asuntu saba sa manga maynan na manga imo-unun, dumateng saba ya kadaman na Tyumanem adti manga utaw na gayed lyumakad sa manga suguꞌ nan. 7Yanagaw diliꞌ kamu magpa-iyeped kanilan. 8Pangkay idtu muna awun kamu ni kangitngitan, manang adun kya-ilawan da ya anenganeng mayu kay nyakasambuk da kamu kan Kristu. Yanagaw, daluga mayu ya bet na umbaꞌ sa mangayseꞌ na Tyumanem na awun da ni kalalamdag. 9Kay kun awun da kamu ni kalalamdag, kita-en ya imo-unun mayu na madyaw aw matulid aw matinaw. 10Aw tibagsegi na dayaw mayu ka-ede-an kun unu ya makatutuk sa Tyumanem. 11Diliꞌ kamu magsambuk dun ni imo-unun na walaꞌ ya guna na pigpan-imoꞌ na manga utaw na awun ni kangitngitan. Manang pakitaꞌ mayu baling kanilan na diliꞌ madyaw ya kanilan pig-imoꞌ. 12Kay ya manga imo-unun nilan na tagu-taguꞌ, makamulamula yeiy, pangkay oloꞌ balawbalawan. 13Manang kun ka-ilawan na kalalamdag ya manga imo-unun nilan, dun da kita-a na malatay kadiꞌ ya kanilan pig-imoꞌ. 14Yanagaw maynini ya piglong idtu muna:

“Pagmata la kaw, ikaw na nyakatulug,

aw pagbangun da kaw lekat adti nyangkamatay,

aw si Kristu ya kalalamdag na mag-ilaw kanmu.”

15Yanagaw magpakatadeng kamu sa kamayu bet. Diliꞌ mayu pagsilingan ya manga utaw na walaꞌ ya kya-ede-an, manang silingi mayu baling ya manga utaw na awun katadeng. 16Diliꞌ mayu pagsapadan ya selat mayu kada allaw, manang selatan mayu baling ya pag-imoꞌ sa madyaw, kay adun na manga allaw yeiy madég ya mig-imoꞌ sa malatay. 17Yanagaw diliꞌ mayu pagsilingan ya manga utaw na walaꞌ ya kya-ede-an. Manang tibagsegi na dayaw mayu ka-ede-an kun unu ya pagkaliman ni Kristu.

18Aw diliꞌ kamu mag-inem sa bino mendaꞌ na to-o kamu malangulangu kay yan ya makapagkalat sa kamayu pag-eyaꞌ. Manang tumbayan baling na ya Ispiritu Santo yan ya magdumala kamayu. 19Gayed mag-ubat-ubatay ya kadég mayu magi sa manga salmo, aw manga eped pa na dalangan na pig-imoꞌ lekat adti tingeg na Tyumanem, aw manga eped na dalangan na alag nyatibulluk ya kamayu anenganeng magdeyen kan Kristu. 20Gayed mayu pasalamatan ya Tyumanem na yan ya Ama, magi sa ngalan ni Jisu-Kristu na kanaten Matas na Pangulu, asuntu sa kadég na nyadawat mayu. 21Aw ya tagsambuksambuk kamayu magpadalem adti kanmu manga eped asuntu na pigbasa͡an mayu si Kristu.

Ya palna-u sa mangugnanay

22Kamu na manga ka͡ubayan, magpasakup kamu sa kamayu manga eseg kasiling na pagpasakup mayu kan Kristu. 23Kay ya eseg, yan ya palangad ulu na ka͡ubayan nan kasiling ni Kristu na palangad ulu na kadég na manga mangintu-uway na yan ya kanan lawas. Aw si Kristu uman ya Magpaluwa-ay kanilan. 24Ya pagpasakup na kadég na manga mangintu-uway kan Kristu, maynan uman ya pagpasakup na manga ka͡ubayan adti manga eseg nilan.

25Kamu na manga eseg, ginawayi ya kamayu manga ka͡ubayan kasiling na pagginawa ni Kristu sa manga mangintu-uway. Aw asuntu sa pagginawa nan kanaten, pigtumbay nan ya kanan pagka-utawun na ma-imoꞌ dugsuꞌ dun ni pagkamatay, 26pada matani kitadun aw kalinisan magi sa pagba͡utismu kanaten aw sa tingeg na Tyumanem. 27Pig-imoꞌ nan yeiy pada ya kadég tadun na mangintu-uway mabatug nan pa-indegen dun ni kanan asdangan na walaꞌ ya pagsalaꞌ aw taniyen na un ma-imoꞌ kanan manga utaw, kasiling na dalaga na pig-atag da adti kanan tawas. To-o sakanan manenggeya, walaꞌ ya taping aw walaꞌ ya se-ey. 28Maynan uman, kamu na manga eseg, to-o mayu ginawayi ya kamayu manga ka͡ubayan kasiling na pagginawa mayu sa kamayu pagka-utawun. Kay ya mangugnanay sambuk da silan. Aw kun pigginawa͡an mu ya kanmu ka͡ubayan, pigginawa͡an mu uman ya kanmu pagka-utawun. 29Kay walaꞌ saba ya utaw na magpakalat sa lawas nan. Yan baling ya imo-un nan ya pakanen aw ipaten. Aw maynan uman si Kristu adti kadég tadun na manga mangintu-uway kanan, 30kay ya tagsambuksambuk kanaten nyakasambuk da dun ni kanan lawas. 31Pigpasulat saba na Tyumanem asini muna, “Yeiy ya du-an na indegan na eseg ya kanan ama aw ina, aw pa-egketen da silan ya ka͡ubayan nan, aw ya duwa silan ma-imoꞌ da sambuk.”#5:31 Mabasa adti Génésis 2:24. 32Ya pigpa-edeꞌ yeiy na pigbukasan da, to-o malalem ya kakawasan, aw yan ya pyalabet ku si Kristu aw ya manga nyangintu-u kanan. 33Manang salutun ku uman ya kanak palna-u na ka-ilangan ya tagsambuksambuk na eseg ginawa͡an nan ya kanan ka͡ubayan kasiling na pagginawa nan sa kanan pagka-utawun. Aw ya ka͡ubayan, ka-ilangan na basa͡an nan uman ya kanan eseg.

Currently Selected:

Épéso 5: klgv

Highlight

Copy

Compare