Épéso 4

Ya pagkasambuk na kadég na nyangintu-u kan Kristu

1Yanagaw, aku na nyakalabusu pa asuntu na pigpalna-u ku si Kristu, pakabagsegen ku ya ginawa na kadég mayu na silingan mayu gayed ya bet na umbaꞌ sa manga utaw na pigtawag da na Tyumanem. 2Maynini ya bet na silingan mayu: Pagpadalem kamu, aw pakadyawa ya eped mayu. Tageni ya kamayu kadaman, aw magtati-isay kamu asuntu na miggaginawa͡ay kamu. 3Tibagsegi mayu to-o na awun kalinaw dun ni kadég mayu pada ma-ilagket ya pagkasambuk na kamayu ginawa na pig-atag na Ispiritu Santo. 4Sambuk da oloꞌ ya lawas na yan ya kadég na manga mangintu-uway. Sambuk da ya Ispiritu Santo na nyeyaꞌ dun ni tagsambuksambuk kanaten. Sambuk da ya pig-iman tadun asuntu na pigtawag da kitadun na Tyumanem. 5Sambuk da oloꞌ ya Matas na Pangulu, sambuk da ya pyangintu-uwan, aw sambuk da oloꞌ ya kakawasan na pagba͡utismu kanaten. 6Sambuk da oloꞌ ya Tyumanem na yan saba ya Ama na kadég tadun. Yan ya migdumala aw migtalabahu dun ni kadég na manga mangintu-uway, aw nyeyaꞌ sakanan adti seled na tagsambuksambuk kanaten.

7Pangkay sambuk da kitadun dun ni lawas ni Kristu, manang magi sa pagbayaꞌ nan, pig-atagan nan ya tagsambuksambuk kanaten na katadeng pada mabatug tadun imo-un ya manga imo-unun na pigtaligu nan kanaten. 8Kasiling na pigpasulat asini muna:

“Pagka-engat da nan adti langit, madég to-o ya nyataban nan,

aw awun pig-atag nan adti manga utaw.”#4:8 Mabasa adti Salmo 68:18.

9Na, unu ya kakawasan na pagka-engat nan? Ya kakawasan yeiy, nyanog una si Kristu asini lupaꞌ. 10Aw ya nyanog, yan uman ya nya-engat adti tas na langit pada dumala͡an nan ya kadakulaꞌ. 11Aw ini ya pig-atag nan kanaten na manga mangintu-uway: Ya eped nya-imoꞌ manga apostolés, ya manga eped nya-imoꞌ propita na Tyumanem, ya manga eped nya-imoꞌ mag-ubat-ubatay sa Madyaw na Ubat-ubat kan Kristu, ya manga eped nya-imoꞌ magdadiyaga͡ay sa manga nyangintu-u, aw ya eped manga magpalna-uway. 12Pig-atag nan yeiy na un matagilan ya manga mangintu-uway sa pag-imoꞌ sa manga imo-unun na Tyumanem aw pada pakasaligen ya kasakupan na palangad lawas ni Kristu. 13Aw ya sampetan yeiy, magkasambuk ya kadég tadun dun ni pagpangintu-u kan Kristu, aw to-o tadun ka-ede-an ya Iseꞌ na Tyumanem, aw magkasalig ya pagpangintu-u tadun, mendaꞌ na masiling ya bet tadun kan Kristu. 14Aw kun ma-imoꞌ yeiy, diliꞌ da kitadun masiling na tagbiꞌ na mangayseꞌ na maksay magka-agad-agad sa pangkay unu na palna-u na manga utaw na galu-un na gayed migbaluk sa katinawan. 15Paglongun tadun baling ya matinaw na palna-u adti kanaten manga eped asuntu na pigginawa͡an tadun silan, pada tumulin pa kitadun mendaꞌ na kasilingan da tadun ya bet ni Kristu na yan ya ulu sa kadég tadun na palangad lawas nan. 16Aw dayaw nan pig-isugpatsugpat ya kadég tadun na manga mangintu-uway, aw mig-atag sakanan sa imo-unun na umbaꞌ sa tagsambuksambuk kanaten. Aw kun pigtalabahu na tagsambuksambuk ya pigtaligu kanan ni Kristu, tumulin pa ya kadég na manga mangintu-uway na yan ya palangad lawas nan aw magkabagseg magi sa paggaginawa͡ay tadun.

Ya bagu na pagka-utawun dun ni kan Kristu

17Yanagaw dun ni ngalan na kanaten Matas na Pangulu, paglongun ta kamu na diliꞌ da mayu pagsilingan ya bet na manga eped na Héntil na walaꞌ pangintu-u sa Tyumanem. Kay ya adti anenganeng nilan alag walaꞌ ya ma-untung. 18Gayed kyangitngitan ya kanilan anenganeng kay mangkategel silan aw diliꞌ silan malim maka-edeꞌ sa Tyumanem. Yan ya du-an na walaꞌ nilan katagtun ya ginawa na pig-atag nan. 19Pyangkebbelan da saba ya kanilan anenganeng sa manga imo-unun nilan na malatay. Yanagaw gayed da nilan pig-atag ya kanilan lawas adti kadég na imo-unun na makamulamula͡ay, aw walaꞌ ya tyamanan na pagkalim nilan mag-imoꞌ sa malatay.

20Manang bekeꞌ na maynan ya kyasilingan mayu sa pagpangintu-u mayu kan Kristu. 21Pigdengeg da mayu saba ya ubat-ubat kanan, aw pigpalna-uwan da kamu sa katinawan na awun ni kan Jisus. 22Yanagaw, luwasa mayu ya dadan na pagka-utawun mayu, kay yeiy ya gayed miggaway kamayu aw yeiy uman ya lyekatan sa madég na malatay na makapagkalat kamayu. 23Pabaguwan mayu baling sa Tyumanem ya kamayu anenganeng. 24Aw suta mayu ya bagu na pagka-utawun na pig-imoꞌ na Tyumanem kasiling na kanan na walaꞌ ya salaꞌ, pada magkalinis ya bet mayu aw kele͡an mayu ya malatay.

25Yanagaw diliꞌ da kamu maglong sa galuꞌ, manang yan baling ya paglongun mayu adti manga eped ya tengteng na matinaw. Kay ya tagsambuksambuk kanaten alag da nyaka-akup adti kasakupan na palangad lawas ni Kristu. 26Kun awun kadaman mayu, magpakatadeng kamu na diliꞌ kamu makasalaꞌ. Maksay kamu pag-iyuliꞌ sa diliꞌ pa sumallep ya sega, 27aw diliꞌ mayu pagtumbay na makaselat si Satanas.

28Ya matakaw, diliꞌ da magtakawunun, manang magtibagseg baling sakanan magtalabahu pada makatabang pa uman sa manga eped na walaꞌ ya pagkamangan.

29Diliꞌ kamu maglong sa malatay adti eped na utaw. Manang yan baling ya ka-ilangan mayu paglongun ya tingeg na awun ma-untung. Paglongan mayu ya umbaꞌ na makatabang sa manga utaw na migpakanyeg. 30Aw diliꞌ kamu mag-imoꞌ sa diliꞌ pagkaliman na Ispiritu Santo, kay sakanan ya pangilala na nyatagtun da kamu na Tyumanem aw yan uman ya magmatinaw na paluwa-en kamu dun ni allaw na pag-ukum.

31Diliꞌ mayu pag-elledan na ginawa ya pangkay singalan. Aw diliꞌ kamu maksay magkadaman, aw diliꞌ kamu magluduk sa kadaman adti seled mayu, aw diliꞌ kamu magpamuligsa-ay. Aw diliꞌ kamu magtanemtanemay sa malat na tingeg adti eped na utaw, aw diliꞌ kamu magpalpa sa malatay adti eped. Alag mayu yeiy kamanga adti kamayu. 32Pakadyawa mayu baling ya kamayu manga eped, aw pagkakallatay kamu, aw magpasinsiya͡ay kamu, kasiling na paglanas na Tyumanem sa manga salaꞌ mayu magi kan Kristu.

Currently Selected:

Épéso 4: klgv

Highlight

Copy

Compare