Épéso 6

Ya palna-u sa manga mangayseꞌ aw mangkatikadeng

1Kamu na manga mangayseꞌ, asuntu na nyakasambuk da kamu kan Kristu, pagka͡agadan mayu ya kamayu mangkatikadeng, kay yan saba ya umbaꞌ imo-un. 2“Pagbasa͡an mu ya kanmu ama aw ina.” Yeiy saba ya muna suguꞌ na Tyumanem na awun pakang. Aw ini ya pakang nan: 3“Basa͡an mu silan pada magkadyaw ya kanmu pag-eyaꞌ aw magkadugay ya pag-eyaꞌ mu asini tas na lupaꞌ.”#6:2-3 Mabasa adti Éxudo 20:12 aw Déutéronomiyo 5:16.

4Aw kamu uman na manga ama, diliꞌ mayu pagpasobla͡an ya pagpitul sa kamayu mangayseꞌ taman na kalatan kamu nilan na ginawa, manang dun ni pagpatulin mayu kanilan, palna-uwi mayu baling silan na dalugun nilan si Kristu.

Ya palna-u sa manga allang aw sa manga amu

5Aw kamu na manga allang, pagka͡agadan mayu ya kamayu manga amu asini tas na lupaꞌ. Pagbasa͡an mayu silan aw pagkallekan. Tibulluka mayu ya pagdalug sa pigsuguꞌ nilan kay kun pig-imoꞌ mayu yeiy, kasiling na pigbasa͡an mayu si Kristu. 6Diliꞌ kamu oloꞌ magkaseb sa udas na bantayan kamu na amu mayu pada sayaꞌ kamu nan. Manang asuntu na sugu-anen da kamu ni Kristu, pagbetangan baling adti ginawa mayu ya pag-imoꞌ sa pagkaliman na Tyumanem. 7Yanagaw, imo-a mayu ya kamayu imo-unun na awun kaga͡an na ginawa, liwan na si Kristu ya amu mayu aw bekeꞌ na utaw. 8Kay kya-ede-an da mayu na kun pig-imoꞌ na pangkay singalan ya madyaw na imo-unun, awun madawat nan lekat adti kan Kristu umbaꞌ sa pigpan-imoꞌ nan, pangkay allang sakanan aw bekeꞌ na allang. 9Aw kamu na manga amu, pakadyawa mayu uman ya pagdala sa kamayu manga allang, aw diliꞌ mayu silan pag-alleken. Kay kya-ede-an da mayu na si Kristu na awun ni tas na langit, yan saba ya tengteng tagtun sa kamayu manga allang aw pangkay kamayu. Aw walaꞌ ya pigkibang nan.

Ya manga pagkanaꞌ na un gamiten pada degen si Satanas

10Sa diliꞌ pa ku tigkasen ya sulat ini, yeiy ya paglongun ku kamayu: Saligi mayu ya Tyumanem pada magkabagseg kamu magi sa katulus nan. 11Suta mayu uman ya kadég na pagkanaꞌ na pig-atag na Tyumanem pada mabatug mayu degen ya kapandayan ni Satanas. 12Kay bekeꞌ na utaw ya eped tadun migtanam, manang yan baling ya pigtanam tadun ya manga busaw na diliꞌ pagkita-en aw manga mangkalangkaw dun ni kanilan, aw pangkay ya kadég na migdumala dun ni banwa na kangitngitan aw ya kadég na malatay na awun ni dalem na langit. 13Yeiy ya du-an nan na dala͡en mayu ya kadég na pagkanaꞌ na pig-atag kamayu na Tyumanem pada diliꞌ kamu nilan degen kun dumateng ya allaw na manga pagtandaꞌ. Aw kun matigkas da ya pagtandaꞌ, kenneꞌ mayu mindeg na masalig. 14Yanagaw pagtagilan kamu! Pangelen kamu sa katinawan na lekat adti Tyumanem. Suta mayu ya palangad pagtampeng sa aba na yan ya pagdalug mayu sa bet na Tyumanem na walaꞌ ya salaꞌ. 15Aw suta mayu ya palangad sapatus na yan ya pagpaka-edeꞌ mayu sa Madyaw na Ubat-ubat sa kalinaw na Tyumanem. 16Aw maynan uman, tagilana ya kalasag na yan ya pagpangintu-u mayu kan Kristu pada mabatug kapatayan ya atulun na awun ni tuktuk na papanaꞌ na busaw. 17Aw sangkuban adti ulu mayu ya palangad sasangkub na yan ya pagpaka-edeꞌ na pigpaluwaꞌ da kamu ni Kristu. Aw tagnusa ya kampilan na pig-atag kamayu na Ispiritu, na yan ya tingeg na Tyumanem. 18Gayed kamu panawagtawag adti Tyumanem magi sa tabang na Ispiritu Santo. Pagpakatanaw kamu aw padelega mayu ya panawagtawag, aw pagsekat kamu kanan na tabangan nan ya kadég na manga mangintu-uway. 19Aw panawagtawagi aku mayu uman adti Tyumanem na atag nan kanak ya manga tingeg na umbaꞌ ku paglongun adti manga Héntil. Pagsekat kamu na walaꞌ ya kakallekan ku maglong sa Madyaw na Ubat-ubat na pigtaguꞌ asini muna. 20Kay yeiy saba ya du-an na pigpadala aku na Tyumanem, aw yeiy uman ya du-an na ini aku ni kalabusuwanan. Yanagaw panawagtawagi aku mayu adti Tyumanem na diliꞌ aku mallek mag-ubat-ubat, asuntu na yan ya umbaꞌ ku imo-un.

Ya katigkasan na sulat ni Pablo

21Na, kaliman ku na ka-ede-an mayu ya pagpakabetang ku asini Roma aw kun unu ya manga pigpan-imoꞌ ku, aw si Tikiko da ya magpa-edeꞌ sa kadég adti kamayu. Inulug tadun sakanan na pigginawa͡an aw kasaligan na sugu-anen na Tyumanem. 22Yeiy ya du-an na pigpakadtu ku sakanan dun ni kamayu, aw yan ya magpa-edeꞌ kamayu kun unu ya pagpakabetang nami adi pada magkabagseg ya ginawa mayu.

23Kay manga inulug, ayin pa aku galu na awun gayed ni kamayu ya kalinaw aw ya paggaginawa͡ay aw ya pagpangintu-u na lyumekat adti Tyumanem na yan ya Ama aw kan Jisu-Kristu na kanaten Matas na Pangulu. 24Ayin pa aku galu uman na ya grasya na Tyumanem awun ni kadég na manga utaw na gayed gyuminawa sa kanaten Matas na Pangulu na si Jisu-Kristu.

Currently Selected:

Épéso 6: klgv

Highlight

Copy

Compare