Popular Bible Verses from Épéso 5

Share

Yanagaw, asuntu na manga mangayseꞌ da kamu na Tyumanem na kanan pigginawa͡an, silingi mayu ya bet nan. Aw gayed mayu ginawayi ya manga eped mayu, kasiling na pagginawa ni Kristu kanaten aw pigpakitaꞌ nan yeiy magi dun ni pag-atag nan sa kanan pagka-utawun pada kanaten. Sakanan ya dugsuꞌ na nyakatutuk sa Tyumanem.

Yanagaw magpakatadeng kamu sa kamayu bet. Diliꞌ mayu pagsilingan ya manga utaw na walaꞌ ya kya-ede-an, manang silingi mayu baling ya manga utaw na awun katadeng. Diliꞌ mayu pagsapadan ya selat mayu kada allaw, manang selatan mayu baling ya pag-imoꞌ sa madyaw, kay adun na manga allaw yeiy madég ya mig-imoꞌ sa malatay.

Aw diliꞌ kamu mag-inem sa bino mendaꞌ na to-o kamu malangulangu kay yan ya makapagkalat sa kamayu pag-eyaꞌ. Manang tumbayan baling na ya Ispiritu Santo yan ya magdumala kamayu. Gayed mag-ubat-ubatay ya kadég mayu magi sa manga salmo, aw manga eped pa na dalangan na pig-imoꞌ lekat adti tingeg na Tyumanem, aw manga eped na dalangan na alag nyatibulluk ya kamayu anenganeng magdeyen kan Kristu. Gayed mayu pasalamatan ya Tyumanem na yan ya Ama, magi sa ngalan ni Jisu-Kristu na kanaten Matas na Pangulu, asuntu sa kadég na nyadawat mayu.

Yanagaw diliꞌ mayu pagsilingan ya manga utaw na walaꞌ ya kya-ede-an. Manang tibagsegi na dayaw mayu ka-ede-an kun unu ya pagkaliman ni Kristu.

Kamu na manga eseg, ginawayi ya kamayu manga ka͡ubayan kasiling na pagginawa ni Kristu sa manga mangintu-uway. Aw asuntu sa pagginawa nan kanaten, pigtumbay nan ya kanan pagka-utawun na ma-imoꞌ dugsuꞌ dun ni pagkamatay

Pangkay idtu muna awun kamu ni kangitngitan, manang adun kya-ilawan da ya anenganeng mayu kay nyakasambuk da kamu kan Kristu. Yanagaw, daluga mayu ya bet na umbaꞌ sa mangayseꞌ na Tyumanem na awun da ni kalalamdag.

Aw ya tagsambuksambuk kamayu magpadalem adti kanmu manga eped asuntu na pigbasa͡an mayu si Kristu.

Kamu na manga ka͡ubayan, magpasakup kamu sa kamayu manga eseg kasiling na pagpasakup mayu kan Kristu.

Manang salutun ku uman ya kanak palna-u na ka-ilangan ya tagsambuksambuk na eseg ginawa͡an nan ya kanan ka͡ubayan kasiling na pagginawa nan sa kanan pagka-utawun. Aw ya ka͡ubayan, ka-ilangan na basa͡an nan uman ya kanan eseg.

Pigpasulat saba na Tyumanem asini muna, “Yeiy ya du-an na indegan na eseg ya kanan ama aw ina, aw pa-egketen da silan ya ka͡ubayan nan, aw ya duwa silan ma-imoꞌ da sambuk.”

Diliꞌ kamu magsambuk dun ni imo-unun na walaꞌ ya guna na pigpan-imoꞌ na manga utaw na awun ni kangitngitan. Manang pakitaꞌ mayu baling kanilan na diliꞌ madyaw ya kanilan pig-imoꞌ.