Pigpan-imo' 26

Ya pagtameng ni Pablo sa kanan pagka-utawun adti asdangan na hariꞌ

1Pagkatigkas yan, miglong si Agripa kan Pablo, “Pigtumbay da ku kanmu ya paglong na tamengan mu ya kanmu pagka-utawun.” Yanagaw pigpatas ni Pablo ya kanan bekten aw miglong:

2“Kay Hariꞌ Agripa, migleya aku na ikaw ya un magpakanyeg sa tubag ku sa kadég na limanda kanak na manga Judiyu, 3kay ikaw ya to-o nya-edeꞌ sa kadég na katanem na manga Judiyu aw ya manga pigpan-ayilan nilan. Yanagaw nyanginayuꞌ aku na pakanyegan aku mu.

4“Na, kya-ede-an da na kadég na Judiyu ya manga pigpan-imoꞌ ku lekat pa na kanak pagka-iseꞌ adti banwa ku aw adti Jérusalim. 5Yanagaw madugay da nilan kya-ede-an na to-o ku pigdalug ya manga katanem nami na manga Judiyu asuntu na sakup aku na manga Parisiyo. Silan galu ya magmatinaw sa piglong ku yeiy. 6Aw adun, ini aku ni asdangan mu pig-usayan asuntu oloꞌ na pigtagadan ku ya pigpakang na Tyumanem adti kanami manga tyugbulan. 7Aw maynan uman, ya kadég na buwadbuwad ni Isra-él, alag nilan pig-iman ya pigpakang yeiy. Yanagaw nyatibulluk ya kanilan anenganeng nyanimba sa Tyumanem kada allaw aw kada gabi. Maynan uman ya kanak pig-iman. Aw asuntu seiy, kay Hariꞌ, piglimanda aku baling na manga eped ku na Judiyu. 8Aw kamu, anangaꞌ malug dun ni anenganeng mayu ya pagpangintu-u na mabatug na Tyumanem ya pagmataw sa manga nyangkamatay?

9“Idtu muna, mig-anenganeng aku na ka-ilangan ku imo-un ya madég na maka-ampang sa ubat-ubat sa ngalan ni Jisus na taga Nazarit. 10Yeiy saba ya pig-imoꞌ ku adti Jérusalim: Kyadtuwan ku ya manga mangkatas na magdadugsu-ay na manga Judiyu aw pig-atag nilan kanak ya katundanan sa pagkalabusu sa manga mangintu-uway kan Jisus. Aw madég silan ya pigpakalabusu ku. Aw sa pag-ukum da na manga Judiyu na patayen silan, sambuk aku na tyumandeꞌ na patayen silan. 11Malikit ku pyangkadtuwan ya manga sinagoga aw pigpaninaw ku ya manga mangintu-uway kan Jisus. Pigpamulayaman ku silan aw pigpapaglong sa malatay adti kanan. Asuntu sa kabulut ku kanilan, pigdalug ku silan, pangkay adti mawat na manga lunsud aw dun ku silan pamulayami.

12“Aw maynan ya tud ku idtu muna sa pagpanaw ku adti syudad na Damasko. Dyumala aku sa manga sulat na lekat adti mangkatas na magdadugsu-ay na palangad katundanan ku mamulayam sa manga mangintu-uway kan Jisus. 13Kay Hariꞌ, talana ku nyanaw pasinan adti Damasko na manga alas dosi la, biglaꞌ awun pigkitaꞌ ku na dakulaꞌ na kalalamdag na lekat adti tas na langit. To-o pa malalamdag dun ni sega, aw nyakapalibed kanak dala ya manga eped ku. 14Aw nyangkatuwad ya kadég nami dun ni lupaꞌ, aw awun dyengeg ku na tingeg na Hibriyu, law nan kanak, ‘We Saulo! We Saulo, anangaꞌ aku mu gayed pamulayaman? Liwan na pigpa-emel-emel mu ya kanmu pagka-utawun.’ 15Aw nyusip aku, ‘Singalan kaw kay Sir?’ Aw tyumubag sakanan, ‘Aku saba si Jisus na gayed mu pigpamulayaman. 16Manang pagbangun kaw aw dayaw kaw indeg! Migpakitaꞌ aku kanmu kay pigpamalliꞌ ta kaw na ma-imoꞌ kanak sugu-anen pada magmatinaw sa kyinitaꞌ da mu aw ya un pa ku pakitaꞌ kanmu. 17Tamengan ta kaw lekat adti manga utaw na un mamulayam kanmu, pangkay Judiyu aw pangkay Héntil. Manang padala ta kaw saba adti manga utaw na Héntil 18pada mabekaꞌ ya kanilan mata, aw indegan nilan ya kangitngit aw katulus ni Satanas, aw mabatug da nilan ya dumulud sa kalalamdag na Tyumanem. Kay kun mangintu-u silan kanak, lanasen ku ya manga salaꞌ nilan, aw maka-akup silan sa manga utaw na dadan da pigtani.’

19“Yanagaw, kay Hariꞌ Agripa, kya͡agadan ku ya migpakitaꞌ kanak lekat adti tas na langit. 20Pigpalekat ku adti Damasko ya pag-ubat-ubat sa manga utaw aw adtu uman ni Jérusalim aw ya kadakulaꞌ na probinsiya na Judiya. Aw tigkas yan, pigkadtuwan ku uman ya manga Héntil, aw piglongan ku silan na magselsel sa kanilan manga salaꞌ aw mangintu-u sa Tyumanem aw mag-imoꞌ sa mangkadyaw na imo-unun na yan ya magmatinaw na tengteng silan migselsel. 21Aw yeiy ya du-an na pigdakep aku na manga Judiyu adti pamanag na Témplo kay un aku nilan patayen. 22Manang pigtabangan aku na Tyumanem taman adun na allaw yeiy, yanagaw ini aku ni asdangan mayu. Aw piglong ku kamayu ya matinaw, pangkay dengganen kamu aw pangkay tagituꞌ na utaw. Aw walaꞌ ku dugangi ya pigsulat na manga propita aw ni Moysis sa un ma-imoꞌ: 23na ya Misiyas un saba magti-is aw matay, aw yan ya muna mataw lekat adti nyangkamatay pada ka-ilawan nan ya anenganeng na manga utaw pangkay Judiyu aw pangkay manga Héntil.”

24Aw sa kenneꞌ pa ni Pablo miglong, pyamuligsa-an ni Fésto, law nan, “We Pablo, migkameneng da kaw! Kyasobla͡an ya katadeng mu, aw yan ya nyakapameneng kanmu!” 25Manang tyumubag si Pablo kanan, law nan, “Walaꞌ aku pagkameneng, kay Gubirnador Fésto. Ya kadég na piglong ku alag saba matinaw. 26Kyalabetan da na hariꞌ ya kadég na piglong ku kakayna, aw yan ya du-an nan na piglongan ku sakanan. Kya-ede-an ku na kyataga͡an da nan ya kadég yeiy na nya-imoꞌ idtu muna, kay walaꞌ saba kataguꞌ. 27Yanagaw kay Hariꞌ Agripa, usipen ta kaw: Pyangintu-uwan mu ya pigsulat na manga propita? Nya-edeꞌ aku na nyangintu-u kaw sa piglong nilan.”

28Aw tyumubag si Agripa kan Pablo, law nan, “Yan gya ya kaliman mu na maksay aku mu magagad mangintu-u kan Kristu!” 29Aw miglong si Pablo kanan, “Pangkay maksay aw madugay, ya kanak pigsekat adti Tyumanem na ikaw aw ya kadég na migpakanyeg kanak adun na allaw yeiy, mangintu-u uman kasiling ku, manang diliꞌ aku malim na masiling kamu kanak na pigsangkali-an.”

30Pagkatigkas ni Pablo maglong, nyindeg ya hariꞌ aw ya gubirnador aw si Bérnicé aw ya kadég na eped nilan, 31aw lyumuwaꞌ silan lekat adti usayanan. Aw migpambalawbalaw silan, law nilan, “Walaꞌ ya salaꞌ na utaw iyan na umbaꞌ kalabusuwun aw patayen.” 32Aw piglongan ni Agripa si Fésto, “Kun walaꞌ pa nan sekata na usayan ni César, makaluwaꞌ da galu sakanan.”

Currently Selected:

Pigpan-imo' 26: klgv

Highlight

Compare

Copy