Pigpan-imo' 27

Ya pagsakay ni Pablo sa barko pasinan adti Roma

1Pagdateng da na allaw na un da kami sumakay sa barko pasinan adti Italiya, pigtumbay adti kan Julio si Pablo aw ya manga eped na nyakalabusu. Na, si Julio sambuk sakanan na kapitan na manga sundalu na pigngalanan na Batalyun ni Agusto. 2Aw nyagad kanami uman si Aristarko na taga Tésalonika, probinsiya na Macédoniya. Aw nyanik kami sa barko na lyumekat pa adti Adramitiyo kay un da suminan adti manga pantalan na probinsiya na Asia. 3Pagkasalut na allaw, dyumungguꞌ kami adti Sidon. Aw nyallat si Julio kan Pablo aw pigpapanog nan lekat adti barko na un madtu ni manga ubaybay nan dun ni syudad pada makatabang silan kanan sa manga kapelekan nan. 4Pagkatigkas yan, syumakay da kami uman, manang gayed pigsalumpak na pigsakayan nami ya mabandes na samet. Yanagaw pig-aking ya barko adti puluꞌ na Cipré kay yan ya salibenanan sa samet. 5Aw migpaligad ya syakayan nami dun ni manga probinsiya na Ciliciya aw Pampilya aw dyumungguꞌ adti lunsud na Mira probinsiya na Liciya. 6Aw dun ni Mira, awun kyinitaꞌ ni Kapitan Julio na dakulaꞌ na barko na lekat adti syudad na Aléksandriya na un da manaw pasinan adti banwa na Italiya. Yanagaw adtu kami nan alina.

7Na, seled na madég na allaw malumbanat ya palaguy na barko kay gayed syumungsung kanami ya mabandes na samet. Aw walaꞌ kami paka-apit adti lunsud na Cinido asuntu sa samet, yanagaw piglabayan nami. Aw pig-aking ya barko adti kawala pada kasalibenan kami na puluꞌ na Krita. Aw piglabayan nami ya séngéꞌ na lupaꞌ na banwa na Salmon. 8Aw migpaligad kami sa Krita, aw pangkay to-o malug ya pagpanaw nami, manang dyumateng kami adti tagu-anan na malapit adti lunsud na Lasiya. Aw yan ya ngalan na tagu-anan yan: Madyaw na Ebenganan.

9Na, nyasapad ya madég na allaw, aw dyumateng da ya manga bulan na diliꞌ madyaw agiyan ya tas na dagat.#27:9 Paglabay da na bulan na Séptimbri aw migtengaꞌ da ya Oktobri, aw pagkatigkas uman na Allaw na Pagpuwasa na manga utaw na Judiyu, yan da ya manga allaw na to-o masamet. Yanagaw piglongan ni Pablo ya kapitan sa barko aw ya manga eped nan, 10law nan, “Kay Sir, kun padelegen tadun ya pagpanaw, pagaw awun ma-imoꞌ kanaten na malatay, aw bekeꞌ oloꞌ na barko aw kanaten manga dala ya masapad manang mabus pa kitadun mapnas.” 11-12Manang walaꞌ nilan pakanyegi ya piglong ni Pablo, kay adti anenganeng na kapitan aw ka-epedanan nan, ya pigka-eya-an nilan diliꞌ umbaꞌ ebengan seled na manga bulan na to-o mabagseg ya samet. Yanagaw migkasambuk ya eped kanilan na padelegen ya pagpanaw na un pa galu datengen ya ebenganan na Fénisé dun ni puluꞌ na Krita, kay yan ya madyaw na pasalibenanan sa samet. Aw yan ya pagbayaꞌ ni Kapitan Julio na dalugun ya pagkaliman na kapitan sa barko aw ya tagtun.

Ya bagyuꞌ

13Na, pagtambel da na tagbiꞌ na samet lekat adti balabagan apit adti kawala, adti anenganeng na kapitan aw manga eped nan, mabatug da nilan ya pagpadeleg. Yanagaw pigbeklas nilan ya angkla aw migpaligad silan dun ni puluꞌ na Krita. 14Manang walaꞌ kadugay, to-o tyumambel ya mabandes na samet lekat adti lupaꞌ na apit adti kalintu. 15Aw kyasaban ya pigsakayan nami aw diliꞌ mabatug salumpaken ya samet, yanagaw pigdaladala gayed na samet ya barko. 16Aw nyakapanaliben kami adti tagbiꞌ na puluꞌ na Ca͡uda. Aw pangkay migkalug kami, manang nyabatug nami pigbeklas ya tagbiꞌ na balangay#27:16 Ya tud na tagbiꞌ na balangay yeiy, yan ya pagsakayan kun magkalat ya barko. 17aw pigtibagsegan nilan pig-engat adti tas. Tigkas yan, pigbanggetan nilan ya lawas na barko pada diliꞌ magkalat. Aw to-o silan nyallek pagaw danggay silan adti manga kapantadan na Sirté na malapit adti ligad na Libya, yanagaw piglulun nilan ya dakulaꞌ na kayab, aw nyabatug da pigtulud na samet. 18Pagkasalut na allaw, asuntu na to-o pa migkabandes ya samet, pigpalekat nilan pyan-agbel adti dagat ya eped na manga dala pada magkaga͡an ya barko. 19Aw pagkatlu na allaw, pigpan-agbel nilan ya manga pagkanaꞌ na barko. 20Aw seled na madég na allaw, walaꞌ nami kita-a ya sega aw manga bitun, aw walaꞌ tangkeꞌ ya bagyuꞌ. Aw walaꞌ da kami iman na mataw pa kami.

21Na, seled na pilangallaw walaꞌ ya manga utaw kan. Yanagaw dyumulud si Pablo adti kapitan sa barko aw manga eped nan aw miglong sakanan kanilan, “Kay manga ubaybay, kun migpakanyeg pa kamu galu kanak idtu na walaꞌ pa kitadun indeg adti Krita, diliꞌ tadun galu kagamakan ya maynini na kalugan aw diliꞌ galu malagak ya manga dala tadun. 22Manang sekaten ku adun na pakabagsega ya ginawa mayu, kay walaꞌ ya sambuk na un matay kamayu. Yan oloꞌ ya magkalat ya barko. 23Kya-ede-an da ku yeiy kay kumanggabi awun nyadi tampid ku na anghil na pigsuguꞌ na Tyumanem na yan ya tagtun kanak na pigsimba ku. 24Aw piglongan aku nan, ‘Kay Pablo, diliꞌ kaw magkallek. Asuntu sa kallat na Tyumanem kamayu, walaꞌ ya matay sa kadég mayu asini seled na barko. Ka-ilangan pa kaw usayan adti asdangan ni César.’ 25Maynan ya pigpa-edeꞌ kanak na Tyumanem. Yanagaw, pakabagsega ya ginawa mayu, kay dakulaꞌ ya pagsalig ku sa Tyumanem na tumanen nan ya kanan piglong kanak! 26Manang ka-ilangan danggay kitadun adti sambuk na puluꞌ.”

Ya pagkalat na barko

27Na, pagdateng da na sampuluꞌ tag-upat (14) ya gabi, gayed pa pigtulud na samet ya barko na pigsakayan nami aw nyakatalipag sa Dagat na Adra. Pagkatenga-tengaꞌ da na gabi, adti anenganeng na manga magtalabahuway dun ni barko, malapit da silan makadanggay adti ligad. 28Yanagaw pigtandaꞌ nilan ya kalalem na dagat, aw manga kaluwa͡an (20) ka depa ya kalalem. Walaꞌ kadugay, uman da nilan pigtandaꞌ aw dakman sampuluꞌ tag lima (15) ka depa. 29Aw nyallek silan pagaw makaladgad ya aba na barko adti batu. Yanagaw pig-ulug nilan ya upat ya angkla apit adti moli na barko, aw pigtagadan nilan na maksay galu mallaw. 30Manang ya manga magtalabahuway, kaliman nilan ayawan da ya barko aw pabaya-an ya eped na manga utaw, yanagaw pigtonton nilan ya balangay adti dagat sallong kunu mig-ulug silan sa manga angkla apit adti ma-una na barko. 31Pagkitaꞌ ni Pablo sa pig-imoꞌ nilan, piglongan nan si Kapitan Julio aw ya kanan manga sundalu, law nan, “Ya manga utaw yan, kun diliꞌ silan matingen asini barko, diliꞌ kamu mangkataw!” 32Yanagaw pig-utud na manga sundalu ya manga lubid na pig-eket sa balangay aw pigpabaya-an da nilan na manud.

33Pagkapakallawunun da, nyanginayuꞌ si Pablo sa kadég na manga utaw na kuman da galu silan, law nan, “Walaꞌ kamu kan seled na sampuluꞌ pa tag upat ya gabi kay gayed kamu migtagad kun kinunu teneng ya bagyuꞌ ini. 34Na, kan da kamu adun, pada magkabagseg ya lawas mayu. Kay mataw pa kamu saba, aw piglongan ta kamu na pangkay sambulus ya lugay mayu diliꞌ makamang.” 35Pagkatigkas ni Pablo maglong seiy, kyumamang sakanan sa pan, aw migpasalamat adti Tyumanem dun ni asdangan na kadég. Tigkas yan, pigtenga-tengaꞌ nan ya pan aw kyuman sakanan. 36Pagkitaꞌ nilan kan Pablo na kyuman, migkabagseg ya ginawa na kadég nilan aw kyuman silan uman. 37Na, ya kadég nami dun ni seled na barko, duwanggatus aw kapituwan tag-enem (276). 38Aw sa nyangkabiyag da silan, pyan-ulug nilan ya trigu adti dagat pada magkaga͡an ya barko.

39Na, pagkalalamdag da, walaꞌ nilan ka-ede-i kun unu ya banwa na dyatengan nami, manang awun kyinitaꞌ nilan na ligad na dagat na awun baklayan. Aw kaliman nilan na makadanggay ya barko dun ni baklayan yan. 40Yanagaw pyan-utud nilan ya manga lubid na pig-eket sa manga angkla. Aw pig-ubad nilan uman ya manga pig-eket sa duwa ya begsay na palangad pag-aking-aking sa barko, aw pig-ulad nilan ya tagbiꞌ na kayab apit adti ma-una na barko. Aw migpasinan ya barko adti baklayan. 41Manang nyakaladgad ya aba na barko dun ni kababawan yanagaw walaꞌ da paka-esen. Aw asuntu na gayed pigdaplakan na baled ya lawas na barko, maya-mayaꞌ migkalat ya apit adti moli.

42Na, un da galu pamatayen na manga sundalu ya manga utaw na nyakalabusu pagaw awun mangkapay kanilan aw makapalaguy. 43Manang pigtagenan silan ni Kapitan Julio kay kaliman nan tamengan si Pablo. Aw pigsuguꞌ nan ya kadég na matadeng magkapay, law nan, “Kawas da kamu adti dagat aw kapay kamu taman adti ligad.” 44Aw piglongan nan ya nyasamaꞌ, “Dalug kamu kanilan aw pan-awid kamu sa manga tabla na lekat adti barko.” Aw yanagaw ya kadég nami alag nyakadateng adti ligad.

Currently Selected:

Pigpan-imo' 27: klgv

Highlight

Compare

Copy