Pigpan-imo' 22

1“Kay manga inulug ku aw manga mangkatikadeng, pakanyegi mayu ya tingeg ku na yan ya un magtameng kanak.” 2Pagdengeg nilan sa tingeg na Hibriyu na piglong nan, to-o pa silan nyatinep. Yanagaw migpadeleg si Pablo miglong: 3“Judiyu aku uman na nya͡utaw adti Tarso, sakup na Ciliciya, manang asini aku ni Jérusalim tulin. Si Gamalyél ya migpalna-u kanak, aw dayaw aku nan pigpalna-uwan sa kadég na awun ni Uldin na kanaten tyugbulan. Nyatibulluk ya anenganeng ku dyumalug sa Tyumanem kasiling mayu adun. 4Aw ya manga dyumalug sa palna-u ni Jisus, pigpamulayaman ku silan mendaꞌ adti pagkamatay nilan. Pigdakep ku silan aw pigpagapus pangkay eseg aw ka͡ubayan, aw pigpakalabusu ku silan. 5Usipa mayu ya pangulu na manga magdadugsu-ay aw manga magdadumala͡ay. Silan ya magmatinaw na ya kanak piglong adun alag saba matinaw. Kay lekat adti kanilan dyawat ku ya manga sulat na un ku pakitaꞌ adti manga kadégan ku na Judiyu adti manga sinagoga na awun ni Damasko. Ya manga sulat yeiy, palangad pagtumbay kanak sa pagdakep sa manga utaw na dyumalug sa palna-u ni Jisus, pada gapusun silan aw pa-agad asini Jérusalim na un pa-emel-emelen. Yanagaw nyanaw aku adti Damasko na un magdakep kanilan.

6“Sa malapit da aku adti Damasko na manga alas dosi la, biglaꞌ awun kalalamdag na to-o masilang na lekat adti tas na langit na nyakapalibed kanak, 7aw dayaw aku nyatuwad dun ni lupaꞌ, aw awun tingeg na dyengeg ku, ‘We Saulo! We Saulo! Anangaꞌ aku mu gayed pamulayaman?’ 8Aw nyusip aku kanan, ‘Singalan kaw kay Sir?’ Aw tyumubag sakanan, ‘Aku saba si Jisus na taga Nazarit na gayed mu pigpamulayaman.’ 9Na, ya manga eped ku, kyinitaꞌ nilan ya kalalamdag manang walaꞌ nilan kalabeti ya tingeg na miglong kanak. 10Aw nyusip aku salut kanan, ‘Kay Sir, unu ya madyaw ku imo-un?’ Aw miglong si Jisus kanak, ‘Pagbangun kaw aw kadtu kaw ni Damasko, aw dun da pa-ede-an kanmu ya kadég na pigpalpa ku dadan kun unu ya un mu imo-un.’ 11Manang walaꞌ da aku kitaꞌ asuntu sa kasilang na kalalamdag, yanagaw pig-agak aku na kanak manga eped aw pig-ated aku nilan adti Damasko.

12“Na, awun eseg dun ni Damasko na pigngalanan na Ananiyas. Nyatibulluk ya anenganeng nan dyumalug sa Uldin tadun aw pigsayaꞌ sakanan na kadég na manga Judiyu na nyeyaꞌ dun. 13Aw dyumulud si Ananiyas kanak aw nyindeg adti tampid ku, law nan, ‘Kay inulug Saulo, kumitaꞌ da kaw!’ Aw dayaw aku kyumitaꞌ salut aw kyinitaꞌ da ku sakanan. 14Aw piglongan aku nan, ‘Ya Tyumanem na pigsimba na kanaten tyugbulan asini muna, yan ya nyamalliꞌ kanmu pada ka-ede-an mu ya kanan pagkaliman aw kita-en mu si Jisus na yan ya walaꞌ ya salaꞌ aw dengegen mu ya kanan tingeg. 15Kay ikaw ya magmatinaw kanan adti kadég na manga utaw aw pa-edeꞌ mu kanilan ya kyinitaꞌ mu aw ya kanmu pigdengeg. 16Na, unu pa ya tyagadan mu adun? Pagbangun da kaw aw pagpaba͡utismu la kaw, aw tawaga ya ngalan nan pada kalinisan kaw sa kanmu manga salaꞌ.’

17“Pagkatigkas yan, lyumikuꞌ aku asini Jérusalim, aw talana ku nyanawagtawag dun ni Témplo, awun pigkitaꞌ ku na kasiling na tagaynep. 18Kyinitaꞌ ku si Jisus na miglong kanak, ‘Maksay indegi ya Jérusalim adun! Panamal da kaw! Kay ya manga utaw asini, diliꞌ silan dumawat sa pag-ubat-ubat mu na magmatinaw kanak.’ 19Aw tyumubag aku kanan, ‘Kay Matas na Pangulu, kya-ede-an da nilan ya pigpan-imoꞌ ku idtu muna. Kyatpedan ku ya manga sinagoga pigdakepan sa manga utaw na nyangintu-u kanmu, aw pigpakalabusu ku silan aw byadasan ku pyamunalan. 20Kya-ede-an da nilan uman na tyumandeꞌ aku sa pagpatay kan Éstéban kay yan ya sambuk na migmatinaw kanmu. Aku saba ya pigtaliguwan sa manga sa-ul na manga utaw na migpatay kanan.’ 21Manang miglong pa si Jisus kanak, ‘Panaw da kaw. Kay un ta kaw padala adti manga Héntil na nyeyaꞌ adti mawat!’ ”

22Dun da taman ya pagpakanyeg na manga utaw sa tingeg ni Pablo, kay to-o silan nyadaman asuntu sa moli na piglong nan. Aw migpan-iyak-iyak silan na maglong, “Pataya mayu sakanan! Ya-i la mayu pagmatawa ya utaw iyan!” 23Aw migpadeleg silan mig-iyak-iyak kay to-o nyadaman. Aw pigluwas nilan ya kanilan manga sa-ul aw kyumamang sa kutu na lupaꞌ aw pigsabug nilan adti tas. 24Yanagaw migsuguꞌ ya komandér na pa-agad si Pablo adti seled na kampu. Pagkatigkas yan, pigpalabet nan kanilan si Pablo mendaꞌ na ubat-ubat nan kun unu ya du-an na nyadaman kanan ya manga Judiyu. 25Manang sa talana nilan piglagket si Pablo adti aligi na un labeten, piglongan nan ya kapitan na nyindeg dun ni tampid nan, law nan, “Unu, pigtumbay na bala-ud mayu ya paglabet sa utaw na Romanen pangkay walaꞌ pa sakanan usayi?” 26Pagdengeg na kapitan sa usip ni Pablo, kyadtuwan nan ya komandér aw piglongan nan, “Magpakatanaw kita sa un ta imo-un sa utaw yeiy kay Romanen kadiꞌ sakanan!” 27Yanagaw kyadtuwan uman na komandér si Pablo aw pig-usip nan, law nan, “Ubatan kanak, Romanen kaw?” Aw tyumubag si Pablo, “E-e.” 28Aw miglong ya komandér, “Dakulaꞌ ya pigbayad ku sa kanaken pagka Romanen.” Aw tyumubag uman si Pablo, law nan, “Romanen aku lekat pa adti kanak pagka͡utaw.” 29Yanagaw, maksay si Pablo pig-ubadan na manga sundalu aw walaꞌ da nilan labeta. Aw nyallek uman ya komandér kay kya-ede-an nan na Romanen kadiꞌ ya utaw na pigpagapus nan.

Ya pag-usay kan Pablo adti matas na usayanan na manga Judiyu

30Manang kaliman pa na komandér ka-ede-an kun unu ya tengteng na du-an na piglimanda na manga Judiyu si Pablo. Yanagaw pagkasalut na allaw, pigpatawag nan ya manga mangkatas na magdadugsu-ay aw ya kadég na manga mag-usayay. Aw pigsuguꞌ nan na pa-agad si Pablo adti asdangan nilan na un usayan.

Currently Selected:

Pigpan-imo' 22: klgv

Highlight

Compare

Copy