Pigpan-imo' 21

Ya pagpasinan ni Pablo adti Jérusalim

1Aw pig-indegan da nami silan aw lyumakted ya kanami pigsakayan adti puluꞌ na Kos. Aw pagkasalut na allaw nyadtu kami ni puluꞌ na Rodas, aw lekat dun syumakay kami pasinan adti pantalan na lunsud na Patara. 2Dun ni Patara, awun pigkitaꞌ nami na barko na un magpasinan adti Ponisiya, yanagaw syumakay kami. 3Pigkitaꞌ nami ya puluꞌ na Cipré apit adti kawala, aw migpadeleg kami pasinan adti probinsiya na Sirya. Nyanog kami adti pantalan na Tiro kay dun awasa ya dakulaꞌ na kalga nilan. 4Aw pyaninaw nami ya manga mangintu-uway adti Tiro, aw adtu kami bantuk ni tampid nilan seled na pitungallaw. Aw pig-ubatan nilan si Pablo na diliꞌ sakanan lumos adti Jérusalim kay yan ya pigpa-edeꞌ kanilan na Ispiritu Santo. 5Manang pagkatigkas da na pitungallaw, nyindeg kami si Pablo aw pig-ated kami na kadég na manga mangintu-uway taman adti luwaꞌ na syudad. Nyagad ya kanilan manga ka͡ubayan aw ya manga mangayseꞌ nilan. Aw migpansiluhud kami dun ni baklayan aw nyanawagtawag adti Tyumanem. 6Aw nyanabi kami kanilan aw tigkas yan nyanik da uman kami sa barko. Aw nyan-uliꞌ da ya manga mangintu-uway.

7Migpadeleg ya pagsakay nami lekat adti Tiro aw dyumateng kami adti pantalan na Tolémayis. Pagpanog nami, nyadtu kami ni manga mangintu-uway aw mig-eyaꞌ pa kami dun seled na sangallaw. 8Pagkamaselem da, migpadeleg ya panaw nami. Pagdateng nami adti Césariya, dun kami bantuk ni balay ni Pilipi na yan ya sambuk na mag-ubat-ubatay kan Kristu. Aw sambuk uman sakanan na nyakasakup sa pitu ya eseg na pigpamalliꞌ na manga apostolés idtu muna.#21:8 Mabasa adti kapitulu 6:5-6. 9Aw ya upat ya iseꞌ nan na dalaga awun katadeng nilan na lekat adti Tyumanem na mag-ubat-ubat sa un nan pa-edeꞌ kanilan. 10Talana nami adti balay nilan seled na pilangallaw, awun dyumateng na propita lekat adti Judiya na si Agabo. 11Aw nyawun sakanan adti sayid nami. Aw pigkamang nan ya elen ni Pablo aw banggeti nan ya kanan siki aw bekten, aw law nan, “Ini ya piglong na Ispiritu Santo: ‘Kasiling na maynini, un banggetan uman na manga Judiyu adti Jérusalim ya tagtun sa elen ini aw atag nilan adti manga Héntil.’ ” 12Ya piglong ni Agabo, dyengeg na kadég nami dala ya manga ka-epedanan dun, aw to-o kami nyanginayuꞌ kan Pablo na diliꞌ da nan padelegen ya kanan palpa na madtu ni Jérusalim. 13Manang miglong si Pablo, “Anangaꞌ kamu magsugaw kanaken? Anangaꞌ mayu pakalumayen ya kanak anenganeng? Nyatagilan da ya kanak ginawa sa unu ya un dumateng kanaken, pangkay kalabusuwun aku na manga utaw, aw pangkay patayen aku nilan adti Jérusalim asuntu sa ngalan na Matas na Pangulu tadun na si Jisus.” 14Aw pagka-edeꞌ nami na diliꞌ mabatug tagenan si Pablo, walaꞌ da nami sakanan tageni. Yan oloꞌ ya piglong nami, “Ma-imoꞌ galu ya pagkaliman na Tyumanem.”

15Pagkatigkas na manga allaw yan, migtagilan kami na un magpasinan adti Jérusalim. 16Aw awun nyagad kanami na manga mangintu-uway na lekat adti Césariya, aw pig-ated kami nilan taman adti balay ni Manason kay yan ya un nami bantukan. Na, idtu muna taga Cipré si Manason aw yan ya sambuk na utaw na nyaka-una nyangintu-u kan Jisus.

Ya pagkakita͡ay ni Pablo aw ni Santiago

17Pagdateng nami adti Jérusalim, ya manga inulug dun na mangintu-uway migleya silan dyumawat kanami. 18Aw sa pagkamaselem da, nyadtu kami si Pablo adti kan Santiago, aw dun da kami pagkakita͡ay ya kadég na manga maggagaday sa manga mangintu-uway. 19Pagkatigkas ni Pablo mangumusta kanilan, pigdandan nan ya kadég na pigpan-imoꞌ na Tyumanem adti manga Héntil magi sa pag-ubat-ubat nan.

20Pagdengeg nilan sa piglong nan, alag silan migsideyen sa Tyumanem. Aw tigkas yan, piglongan nilan si Pablo, law nilan, “Kya-ede-an mu, kay inulug, na matag pilammalalan ya Judiyu na nyangintu-u la kan Kristu. Aw ya kadég nilan alag nyatibulluk ya kanilan anenganeng dyumalug sa Uldin tadun. 21Na, dyengeg nilan na pigpalna-uwan mu ya kadég na manga Judiyu na nyeyaꞌ adti manga banwa na manga Héntil. Aw yan kunu ya palna-u mu kanilan, na diliꞌ da dalugun ya Uldin na pig-atag kanaten na Tyumanem magi kan Moysis, labi la ya suguꞌ na pantuli-en ya mangayseꞌ, aw diliꞌ da nilan dalugun ya manga katanem tadun na manga Judiyu. 22Na, unu ya un tadun imo-un pada ka-ede-an nilan na bekeꞌ na maynan ya palna-u mu? Kay dengegen saba nilan na dyumateng da kaw asini. 23Yanagaw ini ya madyaw mu imo-un: Awun upat ya eseg asini na mig-imoꞌ sa sapaꞌ adti Tyumanem. 24Agad kaw kanilan adti Témplo aw ka͡agadan mu ya manga katanem na manga Judiyu dun ni un nilan imo-un sa paglinis sa kanilan pagka-utawun. Aw ikaw ya magbayad pada umbaꞌ silan buluwun, kay nyalingeb da ya sapaꞌ nilan adti Tyumanem. Kun matuman mu ya kadég yeiy, ka-ede-an na kadég na utaw na bekeꞌ na matinaw ya pigdengeg nilan kanmu. Ka-ede-an nilan na kenneꞌ pa mu dyalug ya Uldin na manga Judiyu. 25Na, pigsulatan da nami ya manga Héntil na nyangintu-u la, aw yan oloꞌ ya pigpa-edeꞌ nami kanilan: Diliꞌ nilan pagkanen ya unud na pigdugsuꞌ da adti tyumanem na galuꞌ. Aw diliꞌ silan magkan sa duguꞌ, aw diliꞌ silan uman magkan sa unud na ayep na walaꞌ pakaluwaꞌ ya duguꞌ nan. Aw diliꞌ silan magkasala-enen.”

26Yanagaw pagkasalut na allaw pigpa-agad ni Pablo ya upat ya eseg aw migdengan silan sa pigpan-imoꞌ nilan na un linisan ya kanilan pagka-utawun. Pagkatigkas nilan imo-un, nyadtu silan ni Témplo, aw migpa-edeꞌ si Pablo adti manga magdadugsu-ay kun kinunu ya pagkalingeb na sapaꞌ na tagsambuksambuk kanilan adti Tyumanem. Aw dun nilan ka-ede-i kun kinunu silan pag-atag sa kanilan dugsuꞌ adti Tyumanem.

Ya nya-imoꞌ kan Pablo adti pamanag na Témplo

27Sa agpet da malingeb ya pitungallaw na paglinis kanilan, si Pablo kyinitaꞌ na manga Judiyu na taga Asia adti Témplo. Yanagaw pigsutsutan nilan ya manga eped nilan na Judiyu pada kadamanan si Pablo. Aw pigdulus nilan sakanan, 28aw miglong silan sa mabagseg na tingeg, “Tabangi kami! Kadég mayu na utaw na Isra-él! Ya utaw ini, pangkay ayin sakanan kadtu gayed maglong sa malatay adti kanaten na manga Judiyu, dala ya kanaten Uldin aw ya kanaten Témplo! Aw bekeꞌ na yan oloꞌ, manang pig-alladan nan uman ya manga utaw na Grigo asini pamanag na Témplo na diliꞌ nilan umbaꞌ seledan!#21:28 Ya eped na manga pamanag na Témplo, kun sumeled ya utaw na bekeꞌ na Judiyu, patayen sakanan, kay piglipa-an nan ya kadakulaꞌ na pamanag dala ya Témplo. Piglipa-an nan ya Témplo!” 29Yan ya du-an nan na maynan ya piglong nilan, kay kyinitaꞌ nilan idtu muna si Tropimo na taga Épéso na eped ni Pablo dun ni Jérusalim, aw iman nilan aw pigpa-agad sakanan ni Pablo adti pamanag na Témplo. 30Walaꞌ kadugay nyagubut ya kadég na utaw dun ni Jérusalim, aw migkagallat silan nyalaguy pasinan adti pamanag na Témplo. Aw pig-awidan nilan si Pablo aw pigpaluwaꞌ nilan. Aw pigtakepan nilan ya manga suwangan na Témplo.#21:30 Yan ya pigtakepan nilan ya manga suwangan adti inalad na nyaka-elet sa duwa ya pamanag. 31Sa un da nilan galu patayen si Pablo, pig-ubatan ya komandér na manga sundalu na Romanen na nyagubut ya kadég na utaw dun ni Jérusalim.#21:31 Dun ni inalad na Témplo, malapit dun ya kampu na Antoniya na yan ya bantukanan na manga sundalu na Romanen. 32Yanagaw, migpa-agad sakanan sa manga kapitan aw manga sundalu nilan aw maksay nyalaguy pasinan adti kadég na manga utaw na migkalingkagaꞌ. Pagkitaꞌ na manga utaw sa komandér aw manga sundalu, pigbotonan nilan ya pagpanumbag kan Pablo. 33Aw dyumulud ya komandér kan Pablo aw pigdakep nan. Aw migsuguꞌ na pusasan si Pablo na duwa ya sangkaliꞌ. Tigkas yan, pig-usip na komandér ya manga utaw, “Singalan utawa yeiy? Unu kaꞌ ya salaꞌ nan?” 34Manang walaꞌ nan kabangal ya tubag asuntu sa kasélék na kadég na utaw. Aw walaꞌ na komandér ka-ede-i kun unu ya diklamu nilan, yanagaw pigsuguꞌ nan ya manga sundalu na ated si Pablo adti seled na kampu. 35Aw pagdateng nilan adti dalem na agdan na kampu, pigpa-ingkud sakanan adti abaga na duwa ya sundalu asuntu sa kabulut na manga utaw, 36kay pigdalug nilan si Pablo aw mig-iyak-iyak silan na maglong, “Pataya sakanan!”

Ya piglong ni Pablo adti manga utaw na nyadaman kanan

37Sa un da si Pablo dala͡en adti seled na kampu, nyakaselat sakanan miglong sa komandér, law nan, “Kay Sir, awun paglongun ku galu kanmu.” Aw tyumubag ya komandér, “Matadeng kaw kadiꞌ sa tingeg na Grigo! 38Iman ku aw ikaw ya Ihiptuwanen na nyatu sa gubirnu adun na bagu aw miggagad sa upatemmalalan (4,000) ya ribildi adti kaligbinan.” 39Aw tyumubag si Pablo kanan, law nan, “Bekeꞌ aku na utaw yan. Judiyu aku na taga Tarso, probinsiya na Ciliciya, aw matas ya dengeg na syudad yan. Manginayuꞌ aku beg kanmu na tumbay mu kanak ya paglong adti manga utaw.”

40Aw pigtumbay na komandér kanan ya paglong, yanagaw nyindeg si Pablo dun ni tas na agdan, aw migpulingen adti manga utaw na matinep silan. Aw sa pagkatinep da nilan, migpalekat si Pablo miglong kanilan sa tingeg na Hibriyu na kyalabetan na kadég nilan, law nan:

Currently Selected:

Pigpan-imo' 21: klgv

Highlight

Compare

Copy