Pigpan-imo' 23

1Aw pigtengtengan to-o ni Pablo ya manga mag-usayay aw law nan, “Kay manga inulug ku, sa kadég na pigpan-imoꞌ ku taman adun, kyinitaꞌ na Tyumanem na malinis ya kanaken anenganeng aw walaꞌ ya un pagsalaꞌ kanak.” 2Na, si Ananiyas ya pangulu na manga magdadugsu-ay. Aw sa pagdengeg nan sa piglong ni Pablo, pigsuguꞌ nan ya utaw na malapit kan Pablo na sampalen ya bakaꞌ nan. 3Aw miglong si Pablo kan Ananiyas, “Sampalen kaw uman na Tyumanem! Kay migtallalingu kaw! Nyingkud kaw adti ingkudanan na pag-ukum aw iman mu aw madalug mu ya Uldin tadun na manga Judiyu adti pag-usay kanak, manang dun ni pagpasampal mu kanak, kyalakadan mu ya kanaten Uldin.” 4Aw miglong ya manga utaw na migbantay, “Pigsupla mu ya pangulu na manga magdadugsu-ay na Tyumanem!” 5Aw miglong si Pablo, “Kay manga inulug ku, walaꞌ ku ka-ede-i na yan kadiꞌ ya pangulu na manga magdadugsu-ay, kay kun kya-ede-an pa ku, walaꞌ aku san paglong. Kay yan ya pigpasulat na Tyumanem asini muna, ‘Diliꞌ kamu maglong sa malatay adti manga migdumala kamayu.’ ”#23:5 Mabasa adti Éxudo 22:28.

6Na, sa pagkitaꞌ ni Pablo na awun manga Sadusiyo aw manga Parisiyo dun ni katipun, yanagaw miglong sakanan sa mabagseg na tingeg dun ni matas na usayanan, “Kay manga inulug ku, sambuk aku na Parisiyo, aw ya tyugbulan ku Parisiyo uman. Manang yan ya du-an nan na pig-usayan aku kay awun pig-iman ku na matawun uman salut na Tyumanem ya nyangkamatay.”

7Paglong ni Pablo seiy, ya manga Parisiyo aw ya manga Sadusiyo nya-imoꞌ ya dakulaꞌ na ayil, aw yan ya syampetan nan, nyatengaꞌ ya katipun dun ni usayanan. 8Na, yan ya lyekatan na ayil kay ya manga Sadusiyo walaꞌ silan pangintu-u na awun pagkataw na utaw na lekat adti pagkamatay, aw walaꞌ uman silan pangintu-u sa manga diliꞌ pagkita-en pangkay manga anghil aw ispiritu. Manang ya manga Parisiyo nyangintu-u sa kadég yeiy. 9Yanagaw, mig-ipasuꞌ pa ya kanilan ayil, aw nyan-indeg ya manga magpalna-uway sa Uldin na nyaka-akup dadan sa manga Parisiyo, aw to-o silan syumelseg miglong, “Walaꞌ ya malatay na kyinitaꞌ nami na pig-imoꞌ na utaw yeiy! Basi awun diliꞌ pagkita-en na miglong kanan, aw kun bekeꞌ na ispiritu, basi anghil ya miglong kanan.”

10Aw tantanan nilan mag-ayil nyagubut ya katipun nilan. Aw nyallek ya komandér pagaw kabentadan nilan si Pablo, yanagaw pigsuguꞌ nan ya manga sundalu na kamangen si Pablo lekat adti usayanan aw pa-agad adti kampu.

11Pagkagabi yan, migpakitaꞌ si Jisus kan Pablo aw miglong kanan, “Diliꞌ kaw magkallek! Pigmatinaw da aku mu asini Jérusalim. Aw ka-ilangan matinawun aku mu uman adti syudad na Roma.”

Ya pagbantak na manga Judiyu na patayen si Pablo

12Pagkamaselem yan, awun manga Judiyu na migkatipun aw byantakan nilan si Pablo. Migsasapa-ay silan na diliꞌ silan kuman aw diliꞌ uman minem mendaꞌ na mapatay nilan si Pablo. 13Sobla silan kapatan (40) ya migbantak. 14Pagkatigkas yan, nyadtu silan ni asdangan na manga mangkatas na magdadugsu-ay aw manga magdadumala͡ay sa manga Judiyu, aw law nilan, “Migsasapa-ay kami na diliꞌ kami kuman aw diliꞌ uman minem kun diliꞌ nami una mapatay si Pablo. 15Yanagaw madyaw kun kamu aw ya manga eped mayu na mag-usayay ya magsekat adti komandér na paliku-un si Pablo asini kamayu pada sadsadan pa ya limanda kanan. Aw sa diliꞌ pa silan dumateng adi, banganan nami aw patayen sakanan.”

16Manang ya bantak nilan dyengeg na anak ni Pablo na eseg na iseꞌ na bubay nan. Yanagaw nyadtu sakanan ni kampu aw syumeled aw pig-ubatan nan si Pablo sa dyengeg nan. 17Pagkatigkas yan, pigtawag ni Pablo ya sambuk na kapitan aw piglongan nan, “Pa-agadan beg kanak adti komandér ya iseꞌ ini kay awun ubat-ubat nan.” 18Yanagaw pya-agad na kapitan ya iseꞌ adti sayid na komandér, aw miglong ya kapitan kanan, “Si Pablo, ya utaw na nyakalabusu, migtawag kanak aw migsekat na pa-agad ku kanmu ya iseꞌ ini kay awun kunu ubat nan kanmu.” 19Aw pig-awidan na komandér ya bekten na iseꞌ, aw pigpa-agad nan adti mawatawat aw pig-usip nan, “Unu kay Toꞌ ya un mu ubat-ubat kanak?” 20Aw tyumubag ya iseꞌ, law nan, “Ya manga utaw na Judiyu migkasambuk ya ginawa nilan na sekaten kanmu na paliku-un mu si Pablo kunallaw adti asdangan na manga mag-usayay na sallong kunu ya tud nilan na sadsadan ya limanda kanan. 21Manang diliꞌ kaw magtandeꞌ kanilan! Kay sobla kapatan (40) ya un mangan kanan. Aw yeiy ya sasapa-ay nilan na diliꞌ silan kuman aw minem kun diliꞌ nilan mapatay si Pablo. Aw yan oloꞌ ya pigtagadan nilan na tumbay mu sakanan paliku-un adti usayanan.” 22Pagdengeg na komandér sa pig-ubat na iseꞌ, piglongan nan, law nan, “Diliꞌ kaw maglong adti pangkay singalan na nyadi kaw aw migpa-edeꞌ kanak sa dyengeg mu.” Tigkas yan, pigpapanaw da nan.

Ya pag-ated kan Pablo adti kan Gubirnador Félix

23Pagkatigkas yan, pigpatawag na komandér ya duwa ya kapitan aw piglongan nan, “Tagilana mayu ya duwanggatus (200) ya sundalu na un mindeg na alas nibi na gabi pasinan adti Césariya, aw dugangan na kapituwan (70) ya sundalu na mangudaꞌ aw duwanggatus (200) pa uman ya sundalu na alag magtagadilek. 24Aw pagtagilan kamu uman sa manga kudaꞌ na un sakayan ni Pablo. Aw to-o mayu sakanan pakatanawi na makadateng sakanan adti kan Gubirnador Félix na walaꞌ ya malat na ma-imoꞌ kanan.” 25Awun uman pigsulat na komandér na un nan padala adti gubirnador, law nan:

26“Kay Gubirnador Félix na pagbasa͡an, aku si Cla͡udiyo Lisiyas. Manu la ya kanmu pag-eyaꞌ? 27Pigpadala͡an ta kaw na sulat asuntu sa utaw na pigpa-ated ku adti kanmu. Ya utaw yeiy pigdakep na manga Judiyu aw un da galu nilan patayen. Manang pagka-edeꞌ ku na Romanen kadiꞌ sakanan, pigtabangan nami, eped ku ya manga sundalu. 28Aw asuntu na kaliman ku kataga͡an kun unu ya limanda nilan kanan, pigpa-agad ku sakanan adti matas na usayanan nilan. 29Aw walaꞌ kadugay kya-ede-an ku na walaꞌ ya nya-imoꞌ nan na malatay na umbaꞌ sakanan kalabusuwun aw patayen. Yan oloꞌ ya limanda nilan kanan na walaꞌ nan kunu daluga ya manga katanem na Uldin nilan. 30Yanagaw sa pagka-edeꞌ ku na pigbantakan sakanan na manga Judiyu na patayen, maksay ku pigpa-ated dun ni kanmu. Aw piglongan ku silan na adtu la nilan padatenga ni kanmu ya kadég na limanda nilan. Aw asini la oloꞌ taman ya sulat ini.”

31Yanagaw pigtuman na manga sundalu ya pigsuguꞌ kanilan. Aw sa pagkagabi yan, pigkamang nilan si Pablo adti seled na kotaꞌ aw pig-ated nilan taman adti Antipatris. 32Pagkamaselem da, ya manga sundalu na nyangudaꞌ lyumos mig-ated kan Pablo adti Césariya, manang ya nyasamaꞌ na manga sundalu lyumikuꞌ da adti kotaꞌ. 33Aw pagdateng da na manga nyangudaꞌ adti Césariya, pig-atag nilan sa gubirnador ya sulat aw pigtumbay nilan kanan si Pablo. 34Pagkatigkas na gubirnador basa͡en ya sulat, pig-usip nan si Pablo, “Ayin kaw lekat na probinsiya?” Aw pagka-edeꞌ nan na taga Ciliciya si Pablo, 35miglong sakanan, “Aku ya mag-usay kamayu, manang tagadan pa tadun oloꞌ ya pagdateng na manga utaw na miglimanda kanmu.” Aw migsuguꞌ sakanan na patunggu-an si Pablo sa manga sundalu adti seled na palasyo na pigpa-imoꞌ ni Hérodés asini muna.

Currently Selected:

Pigpan-imo' 23: klgv

Highlight

Compare

Copy