2 Timotiyo 1

1Kay Timotiyo, aku si Pablo ya migsulat adti kanmu. Nya-imoꞌ aku apostol ni Kristu Jisus magi sa pagbayaꞌ na Tyumanem aw pigpadala aku nan na un magpa-edeꞌ adti manga utaw sa ginawa na walaꞌ ya katigkasan. Yeiy ya ginawa na pigpakang nan dadan adti kadég na utaw na nyangintu-u kan Kristu Jisus.

2Pigsulatan ta kaw na kanak pigginawa͡an aw pigsiling ku na kanak iseꞌ.

Padatengen galu adti kanmu ya grasya aw kallat aw kalinaw na lyumekat adti Tyumanem na yan ya Ama aw adti kan Kristu Jisus na kanaten Matas na Pangulu.

Ya pagpasalamat adti Tyumanem aw ya pagpa-anenganeng ni Pablo kan Timotiyo

3Dakulaꞌ to-o ya pagpasalamat ku adti Tyumanem na pigsimba na kanaten manga tyugbulan aw yan uman ya pigsimba ku lekat adti malinis na anenganeng. Gabi aw allaw gayed ta kaw kya-anenganengan dun ni kanak pagpanawagtawag adti Tyumanem. 4Kun pagka-anenganengan ku ya pagsugaw mu idtu na pagsuway nateꞌ, kaliman ku to-o na magkakita͡ay pa kita salut. Kun mabatug yan, magleya aku to-o. 5Walaꞌ ku kalingawi ya kanmu tengteng na pagpangintu-u na pigsilingan mu adti kanmu buyag na si Loyda aw adti ina mu na si Yunis. Nya-edeꞌ aku uman na maynan ya kanmu pagpangintu-u. 6Aw yeiy ya du-an na pigpa-anenganeng ku kanmu ya katadeng na pig-atag da kanmu na Tyumanem magi sa pagpandung ku sa kanak palad adti kanmu aw pagpanawagtawag adti Tyumanem. Yanagaw, gamita ya katadeng yeiy. 7Kay ya Ispiritu Santo na pigpa-eyaꞌ adti seled tadun, walaꞌ pag-imoꞌ kanaten matalaw. Manang pig-atag nan baling kanaten ya kabagseg na anenganeng aw ya pagginawa sa manga utaw aw ya katadeng magtagen sa pagkaliman na pagka-utawun tadun.

8Yanagaw diliꞌ kaw magkamulamula maglong adti manga eped na utaw na dyumalug kaw kan Kristu Jisus na kanaten Matas na Pangulu. Aw diliꞌ kaw magkamulamula na nyakalabusu aku asuntu sa pagdalug ku kanan. Manang agad kaw baling dun ni pagti-is pada pa-edeꞌ ya Madyaw na Ubat-ubat kan Kristu. Aw pakabagsegen kita na Tyumanem magi sa kanan katulus. 9Kay ya Tyumanem, yan ya migpaluwaꞌ da kanaten. Pigtawag kitadun nan aw nya-imoꞌ kanan manga utaw. Aw ya pagpaluwaꞌ aw ya pagtawag nan kanateꞌ bekeꞌ saba na tandan sa pig-imoꞌ tadun na madyaw, manang yan baling ya kanan kallat na walaꞌ ya bayad. Kay yan ya pigpalpa nan dadan asini pa na muna na un nan padala kanaten si Kristu Jisus. 10Aw adun, pigbukasan da nan magi dun ni kan Kristu Jisus na kanaten Magpaluwa-ay, kay pigdeg da ni Jisus ya katulus na kamatayen, aw kun mangintu-u ya manga utaw sa Madyaw na Ubat-ubat kan Kristu, matagtun nilan ya ginawa na walaꞌ ya katigkasan. 11Aw pigpamalliꞌ aku na Tyumanem na ma-imoꞌ apostol aw magpalna-uway na magpa-edeꞌ sa Madyaw na Ubat-ubat yeiy. 12Yanagaw migti-is aku adun, manang walaꞌ ku kamulamulayi ya nya-imoꞌ kanak kay kya-ede-an ku saba na si Kristu Jisus ya pigsaligan ku, aw walaꞌ aku pagduwaduwa na ya kadég na pigtaligu nan kanak mabatug nan pakatanawan mendaꞌ sa allaw na paglikuꞌ nan.

13Daluga ya tengteng matinaw na palna-u na pigdengeg mu adi kanak. Aw padelega ya pagpangintu-u sa Tyumanem aw ya pagginawa mu sa kadég na utaw, kay yeiy saba ya umbaꞌ tadun imo-un asuntu na nyakasambuk da kitadun kan Kristu Jisus. 14Aw magi sa Ispiritu Santo na nyeyaꞌ dun ni seled tadun, pakatanawi ya Madyaw na Ubat-ubat na pigtaligu nan kanmu.

15Na, kya-ede-an da mu na pig-ayawan da aku na kadég na manga mangintu-uway na awun ni probinsiya na Asia, dala si Pigélo aw si Hérmogénés. 16Manang kallatan galu na Tyumanem ya ka-epedanan ni Onésiporo dun ni balay nan, kay malikit aku nan pagtanawun aw pigpakabagseg nan ya kanak ginawa. Aw walaꞌ sakanan kamulamula pangkay pigsangkali-an ya taklayan ku, 17manang sa pagdateng nan asini Roma, maksay aku nan pigpaninaw mendaꞌ na kyinitaꞌ aku nan. 18Aw kya-ede-an mu uman na dakulaꞌ ya tabang nan kanak talana pa ku dun ni Épéso. Yanagaw kagaya dun ni allaw na pag-ukum madawat nan galu ya kallat na kanaten Matas na Pangulu.

Currently Selected:

2 Timotiyo 1: klgv

Highlight

Copy

Compare