1 Timotiyo 6
6
1Awun uman palna-u ku sa manga allang na nyangintu-u. To-o nilan basa͡an ya tagtun kanilan, pada walaꞌ ya mapaglong na eped na utaw na malatay adti ngalan na Tyumanem aw adti palna-u tadun. 2Aw kun ya allang aw ya tagtun kanan alag silan mangintu-uway, bekeꞌ yeiy na indeganan na diliꞌ na allang basa͡an ya tagtun kanan. Ka-ilangan baling na to-o pa nan pagka͡agadan ya tagtun kanan aw kaseban ya imo-unun nan. Kay mangintu-uway saba ya ka-untungan sa talabahu nan aw alag silan pigginawa͡an na Tyumanem. Palna-u mu yeiy adti manga utaw aw pakabagsega ya ginawa nilan na dalugun ya palna-u yeiy.
Ya palna-u na galuꞌ aw ya pagginawa sa kuwalta
3Pagaw awun manga utaw na magpalna-u sa sangkamuluꞌ na walaꞌ pag-unawa sa matinaw na palna-u na kanaten Matas na Pangulu na si Jisu-Kristu, aw ya palna-u sa pagdalug sa bet na Tyumanem. 4Ya manga utaw yeiy migpalibantug oloꞌ sa pagka-utawun nilan, manang walaꞌ ya kyalabetan nilan. Kaliman nilan oloꞌ ya pagbalawbalaw sa walaꞌ ya guna aw ya pag-ayil sa kakawasan na manga tingeg. Aw yan ya lyekatan sa pag-inga-inga-ay aw diliꞌ pagkasambuk na anenganeng, aw ya pagkalat sa dengeg na manga eped, aw malat na pagbabintangay. 5Aw walaꞌ ya katantanan na ayil na manga utaw kay nyabaluk da ya anenganeng nilan aw nyalagak da adti kanilan ya matinaw na palna-u. Mig-anenganeng silan na kun dalugun nilan ya bet na Tyumanem dakulaꞌ ya makuwalta nilan dun. 6Manang bekeꞌ na maynan! Dakulaꞌ saba ya ma-untung tadun adti pagdalug sa bet na Tyumanem kun awun pagleya pangkay unu ya kanaten nyatagtun. 7Kay walaꞌ ya dyala tadun asini tas na lupaꞌ, aw walaꞌ uman ya madala tadun adti kanaten pagkamatay. 8Yanagaw kun awun pagkanen tadun aw awun pagkadégkadég, magleya kitadun sa kanaten nyatagtun.
9Ya manga utaw na kaliman nilan ma-imoꞌ mayaman, mabuyu silan baling adti pag-imoꞌ sa malatay, aw kalitagan dun ni imo-unun na walaꞌ ya guna. Aw dalugun nilan ya pagkaliman na pagka-utawun nilan na yan ya makapagkalat kanilan aw yeiy ya dumala kanilan adti kalatayan. 10Kay ya pagginawa sa kuwalta, yan ya lyekatan sa kadég na punganan na malatay. Awun eped saba na manga utaw na gayed nyanguwalta aw yan ya nyakapasuway kanilan adti pagpangintu-u, aw yan ya du-an na awun kakalatan na ginawa nilan.
Ya palna-u ni Pablo kan Timotiyo
11Manang ikaw kay Timotiyo, asuntu na pigtaliguwan da kaw na Tyumanem sa imo-unun nan, pagpakawat kaw sa maynan na manga imo-unun na malatay. Aw yan baling ya tibagsegi ya pagdalug sa pagkaliman na Tyumanem aw sa kanan bet. Aw pakasaliga ya kanmu pagpangintu-u kanan. Ginawa͡an mu ya Tyumanem aw ya eped na utaw, aw pagpadeleg kaw pangkay unu ya dumateng na manga kalugan, aw pakadyawa ya kadég na utaw. 12Kasiling kaw na utaw na mig-abay nyalaguy. Tibulluka ya anenganeng mu adti kanmu pagpangintu-u, aw to-o awidi ya nyadawat mu adti Tyumanem na yan ya ginawa na walaꞌ ya katigkasan. Kay pigtawag kaw nan, aw madég ya utaw na migmatinaw sa kanmu pag-ubat-ubat sa pagpangintu-u mu kan Kristu.
13Awun paglongun ku kanmu magi dun ni ngalan na Tyumanem na nyatag sa ginawa adti kadég, aw dun uman ni ngalan ni Kristu Jisus na migmatinaw adti asdangan ni Ponsyo Pilato kun singalan sakanan. 14Tumana ya kadég na pigsuguꞌ ku kanmu aw tibagsegi na madalug yeiy na walaꞌ ya magsalaꞌ kanmu, mendaꞌ na dumateng ya kanaten Matas na Pangulu na si Jisu-Kristu. 15Kay un sakanan bukasan na Tyumanem dun ni allaw na pigpamalliꞌ da nan dadan. Aw ya Tyumanem yan ya to-o deyen aw yan oloꞌ ya magdumala sa kadég. Yan ya Hariꞌ sa kadég na manga hariꞌ aw yan ya Matas na Pangulu sa kadég na manga pangulu. 16Yan oloꞌ ya walaꞌ ya lyekatan aw walaꞌ ya pagkamatay. Aw nyeyaꞌ sakanan dun ni kalalamdag aw diliꞌ mabatug na utaw palapitan. Walaꞌ ya kyumitaꞌ kanan kay diliꞌ sakanan pagkita-en, aw yan ya umbaꞌ basa͡an, aw yan oloꞌ ya magdumala na walaꞌ ya tyamanan. Amén.
Ya palna-u adti manga mangintu-uway na mayaman
17Na, palna-uwi ya manga mayaman na diliꞌ silan magpatastas aw diliꞌ silan magsalig sa kanilan kuwalta aw manga ka-unan, kay diliꞌ nilan imanmanen na malagak ya kadég yeiy. Manang yan baling ya saligan nilan ya Tyumanem kay yan ya magsambat sa kadég pada magleya kitadun. 18Aw palna-uwi silan na gayed mag-imoꞌ sa madyaw pada magkadég ya imo-unun nilan na madyaw, aw palna-uwi uman na tumabang silan sa eped na utaw, aw magkanimbet silan aw diliꞌ magdemet sa kuwalta nilan. 19Kun maynan ya imo-un nilan, kasiling na migluduk silan sa ka-unan adti tas na langit, aw matagtun nilan ya tengteng ginawa na walaꞌ ya katigkasan.
Ya moli na palna-u ni Pablo kan Timotiyo
20Kay Timotiyo, pakatanawi ya kadég na pigtaligu kanmu na Tyumanem. Diliꞌ kaw magsambuk sa balawbalaw na walaꞌ ya un ma-untung kay ya piglong nilan walaꞌ saba lekat adti Tyumanem. Aw diliꞌ kaw magpa-iyeped sa manga utaw na mig-anenganeng na awun katadeng nilan manang mig-ampang baling sa matinaw na palna-u. 21Awun saba eped na manga utaw na nyakasuway lekat adti pagpangintu-u kan Kristu asuntu sa pagdalug sa maynan na katadeng.
Ayin pa aku galu na awun ni kadég mayu ya grasya na kanaten Matas na Pangulu.
Currently Selected:
1 Timotiyo 6: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
