2 Timotiyo 2
2
Ya madyaw na sundalu ni Kristu
1Yanagaw, kay Timotiyo na pigsiling ku na kanak iseꞌ, pakabagsega ya kanmu ginawa magi sa kallat na Tyumanem na pig-atag nan kanmu asuntu na nyakasambuk kaw kan Kristu Jisus. 2Aw ya pigpalna-u ku adti madég na utaw na dyengeg mu, taligu mu yeiy adti manga utaw na kasaligan na un nilan uman palna-u adti manga eped.
3Agad kaw dun ni pagti-is, kasiling na madyaw na sundalu ni Kristu Jisus. 4Kay ya sundalu diliꞌ nan pagsagunutun ya anenganeng nan dun ni manga imo-unun na sibilyan, manang tibullukun nan baling ya kanan anenganeng adti pagka sundalu nan pada katutukan ya migdumala kanan. 5Maynan uman ya utaw na mig-abay nyalaguy. Kun diliꞌ nan dalugun ya bala-ud sa pag-abay, walaꞌ ya imanen nan na tandan. 6Aw maynan uman ya utaw na migpawaꞌ, yan galu ya muna kuman sa bunga na kyapagudan nan. 7Pagbetangan sa ginawa ya piglong ku yeiy kanmu, aw tabangan kaw na Tyumanem na kalabetan mu ya kadakulaꞌ.
8Diliꞌ mu pagkalingawan ya Madyaw na Ubat-ubat kan Jisu-Kristu na pigpalna-u ku. Buwadbuwad sakanan ni Hariꞌ Dabid aw nyataw sakanan lekat adti pagkamatay. 9Aw asuntu sa pag-ubat-ubat ku yeiy, yan ya du-an na pigpati-is aku aw pig-eketan na sangkaliꞌ. Pigsiling aku nilan na utaw na gayed lyumakad sa bala-ud. Manang ya tingeg na Tyumanem diliꞌ saba ka-eketan. 10Yanagaw pigti-is ku ya kadég yeiy pada makasambuk kan Kristu Jisus ya manga utaw na pigpamalliꞌ da dadan na Tyumanem, aw makaluwaꞌ silan, aw apeten nilan ya kanan kadyawan na walaꞌ ya tyamanan.
11Matinaw saba ya paglongun ini:
“Kun nyaka-agad da kitadun dun ni pagkamatay ni Kristu,
makasambuk kitadun uman kanan adti tas na langit.
12Kun magpadeleg kitadun dun ni pagpangintu-u pangkay awun manga kalugan,
maghariꞌ kitadun uman eped nan.
Kun balyaw tadun sakanan,
balyaw kitadun nan uman.
13Kun diliꞌ kitadun kasaligan,
kenneꞌ saba sakanan kasaligan,
kay diliꞌ nan mabatug balyaw ya kanan pagka-utawun.”
Ya kasaligan na sugu-anen ni Kristu
14Ya palna-u yeiy, gayed pa-anenganengan adti manga utaw na miggagad sa manga mangintu-uway. Aw magi dun ni ngalan na Tyumanem, to-o silan palna-uwi na diliꞌ nilan pag-ayilan ya kakawasan na manga tingeg. Kay walaꞌ ya un ma-untung dun, aw yan baling ya makapagkalat sa pagpangintu-u na utaw na magpakanyeg. 15Tibagsegi na katutukan kanmu ya Tyumanem, kasiling na magtalabahuway na walaꞌ ya pagkamulamula sa kanan imo-unun adti amu nan. Pakadyawa ya pagsadsad aw pagpalna-u sa tingeg na Tyumanem kay yan ya palna-u na tengteng matinaw. 16Pagpakawat kaw sa manga balawbalaw na walaꞌ ya guna kay walaꞌ yan lekat adti Tyumanem manang yan baling ya magpasuway sa manga utaw lekat adti Tyumanem. 17Ya balawbalaw na maynan kasiling na ibung na magkalintapun adti kadakulaꞌ na lawas. Maynan uman ya pigpalna-u ni Himéniyo aw ni Piléto, 18kay nyakasuway silan lekat adti matinaw na palna-u. Pigpalna-u nilan na abus da kunu ya pagkataw na manga utaw lekat adti pagkamatay. Aw asuntu sa tingeg nilan, migduwaduwa ya anenganeng na manga mangintu-uway aw dun da nilan kalata ya pagpangintu-u na eped. 19Manang ya matinaw na palna-u na lekat adti Tyumanem, yan ya to-o masalig na tullukanan. Aw awun dun pangilala na pigsulat na maglong: “Kya-ede-an na Tyumanem kun singalan ya kanan manga utaw.”#2:19 Mabasa adti Numiros 16:5. Aw “Pangkay singalan ya miglong, ‘Nyangintu-u aku sa Tyumanem,’ ka-ilangan nan talikudan ya kadég na malatay.”
20Na, adti seled na dakulaꞌ na balay, awun madég na betanganan. Ya betanganan na pig-imoꞌ lekat adti bulawan aw lekat adti bulawan na maputiꞌ, paggamiten yan adti dengganen na katipun. Aw ya pig-imoꞌ lekat adti kawuy aw lekat adti lupaꞌ, paggamiten dun ni balay kada allaw. 21Maynan uman ya utaw. Kun linisan nan ya kanan pagka-utawun lekat adti malatay, masiling sakanan na betanganan na paggamiten dun ni dengganen na katipun, aw dun da sakanan taniya na Tyumanem na un mag-imoꞌ sa manga imo-unun na madyaw.
22Yanagaw, kay Timotiyo, pagpakawat kaw adti malatay na pagkaliman pag-imo-un na manga utaw na bagu pa ya ginawa. Aw daluga baling ya pagkaliman na Tyumanem. Pakasaliga ya kanmu pagpangintu-u, aw pagginawa͡an mu ya manga eped, aw tibagsegi na awun kalinaw adti kadég na manga mangintu-uway na nyanawagtawag sa Tyumanem lekat adti malinis na anenganeng. 23Pagpakawat kaw uman sa balawbalaw na walaꞌ ya ma-untung. Kay nya-edeꞌ da kaw saba na yan ya paglekatan sa ayil. 24Aw ya utaw na nya-imoꞌ sugu-anen ni Kristu, diliꞌ sakanan matitanam manang madyaw ya bet nan adti kadég na manga utaw. Matadeng sakanan magpalna-u aw matas ya pasinsiya nan sa manga utaw na pigpalna-uwan nan. 25Aw kun awun manga utaw na baluk ya anenganeng na mag-ampang sa palna-u nan, pakadyawun nan ya pagtulid kanilan magi sa madyaw na tingeg. Pagaw tumbay pa kanilan na Tyumanem ya pagselsel aw ka-ede-an da nilan ya tengteng na matinaw 26aw makaluwaꞌ silan lekat adti litag ni Satanas na mig-eket kanilan na dalugun ya kanan pagkaliman.
Currently Selected:
2 Timotiyo 2: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
