1 Juan 4

Ya pagka-edeꞌ sa matinaw na palna-u

1Kamu na kanak pigginawa͡an, diliꞌ kamu maksay magpangintu-u sa manga utaw na maglong, “Ya palna-u nami lekat adti Ispiritu Santo.” Una͡a mayu sadsadi ya pigpalna-u nilan, kun lekat yeiy adti Tyumanem aw kun diliꞌ. Kay madég da ya sallong kunu propita na miglegeb adti kadég na banwa asini tas na lupaꞌ. 2Maynini ya pagka-edeꞌ mayu kun singalan ya migpalna-u sa lekat adti Ispiritu na Tyumanem: Kun maglong silan na si Jisu-Kristu ya pigpadala na Tyumanem aw nya-imoꞌ utaw, dun da mayu ka-ede-i na tengteng lekat adti Ispiritu na Tyumanem ya piglong nilan. 3Manang kun maglong silan na si Jisus walaꞌ padala͡an na Tyumanem, na, bekeꞌ silan na kana Tyumanem, aw ya piglong nilan, yan baling ya lekat adti po-on ni Kristu. Dyengeg da mayu na awun dumateng na maynan, aw asini la saba silan.

4Kamu na pigsiling ku na kanak manga mangayseꞌ, kana Tyumanem da kamu, aw dyeg da mayu ya manga utaw na nyatu kanan. Kay ya Ispiritu Santo na awun ni kamayu, to-o pa matulus kan Satanas na migdumala sa manga utaw asini tas na lupaꞌ. 5Ya manga sallong kunu propita yeiy, kana asini tas na lupaꞌ silan, yanagaw ya anenganeng nilan lekat oloꞌ asini, aw pigpakanyegan silan na manga utaw na walaꞌ pangintu-u sa Tyumanem. 6Manang kanaten, kitadun saba ya mangayseꞌ na Tyumanem. Aw pangkay singalan ya malim maka-edeꞌ sa Tyumanem, magpakanyeg silan sa palna-u tadun. Aw ya utaw na walaꞌ pagpakanyeg sa palna-u yeiy, bekeꞌ sakanan na kana Tyumanem.

Yanagaw magi sa kadég yeiy, ka-ede-an tadun kun singalan ya migpalna-u sa matinaw na lekat adti Ispiritu Santo aw kun singalan uman ya migpalna-u sa galuꞌ na lekat adti kan Satanas.

Ya Tyumanem yan ya lyekatan sa paggaginawa͡ay

7Kay manga inulug ku na pigginawa͡an, maggaginawa͡ay kitadun, kay ya paggaginawa͡ay lekat saba adti Tyumanem. Pangkay singalan ya gyuminawa sa eped nan, yeiy ya magmatinaw na iseꞌ da sakanan na Tyumanem aw tengteng nan kya-ede-an ya Tyumanem. 8Manang ya utaw na walaꞌ ya pagginawa sa eped nan, yan ya magmatinaw na walaꞌ nan ka-ede-i ya Tyumanem. Kay ya bet na Tyumanem gayed nan pagginawa͡an ya utaw. 9Aw maynini ya pagpakitaꞌ na Tyumanem sa kadakulaꞌ na pagginawa nan kanaten: Pigpadala nan asini tas na lupaꞌ ya kanan Iseꞌ na tamisa pada magi kanan makatagtun kitadun sa ginawa na walaꞌ ya katigkasan. 10Aw yeiy ya pagginawa na walaꞌ ya maka-unawa. Walaꞌ tadun una ginawayi ya Tyumanem manang yan ya nyuna gyuminawa kanaten. Aw pigpadala nan ya kanan Iseꞌ na un ma-imoꞌ dugsuꞌ kalyu kanaten, pada makamang ya pagpa-emel-emel kanaten na Tyumanem aw malanas ya manga salaꞌ tadun.

11Yanagaw, kay manga inulug na kanak pigginawa͡an, kun maynan ya pagginawa na Tyumanem kanaten, ka-ilangan uman na maggaginawa͡ay kitadun. 12Walaꞌ ya utaw na kyumitaꞌ sa Tyumanem. Manang magi sa paggaginawa͡ay tadun, dun kita-a na awun sakanan ni seled tadun, aw nyalingeb asini kanaten ya kadakulaꞌ na pagginawa na Tyumanem. 13Pig-atag nan adti tagsambuksambuk kanaten ya kanan Ispiritu, aw yeiy ya puliba na nyakasambuk da kitadun sa Tyumanem aw awun uman sakanan ni kanaten.

14Kyinitaꞌ nami si Jisu-Kristu aw makamatinaw kami na pigpadala na Ama ya kanan Iseꞌ na yan ya Magpaluwa-ay sa kadég na manga utaw. 15Pangkay singalan ya maglong adti asdangan na manga utaw na si Jisus ya Iseꞌ na Tyumanem, na, kya-ede-an tadun na ya utaw yan nyakasambuk da sakanan adti Tyumanem aw awun saba uman ya Tyumanem ni kanan. 16Aw kya-ede-an da tadun aw pyangintu-uwan tadun na to-o kitadun nan pigginawa͡an.

Ya bet saba na Tyumanem gayed nan pagginawa͡an ya utaw. Yanagaw pangkay singalan utawa ya gayed gyuminawa sa manga eped nan, dun da ka-ede-i na nyakasambuk da sakanan adti Tyumanem aw awun uman ya Tyumanem ni kanan. 17Aw ya pagginawa na Tyumanem piglingeb adi kanaten pada walaꞌ da ya kakallekan tadun dun ni allaw na pag-ukum, kay pigsilingan tadun ya pagginawa ni Jisu-Kristu sa manga utaw asini tas na lupaꞌ. 18Ya pagkallek aw ya pagginawa diliꞌ silan magkadengan, manang ya tengteng pagginawa na utaw sa Tyumanem aw sa eped nan, yan baling ya mag-alilin sa kakallekan. Kay ya pagpa-emel-emel, yan saba ya to-o pagkallekan. Yanagaw, kun kenneꞌ pa tadun nyallek sa pa-emel-emel, yan ya magmatinaw na walaꞌ pa kalingeb ya kanaten pagginawa kanilan.

19Pigginawa͡an tadun ya Tyumanem kay sakanan ya nyuna gyuminawa kanaten. 20Kun awun utaw na maglong, “Pigginawa͡an ku ya Tyumanem,” manang kun kenneꞌ pa nan pigkalatan na ginawa ya kanan eped, galu-un saba ya utaw yan. Kay kun walaꞌ nan ginawayi ya eped nan na pigkitaꞌ nan, na, unun nan ya pagginawa sa Tyumanem na walaꞌ nan kita-a? 21Aw ini ya suguꞌ ni Kristu kanaten na manga mangintu-uway: Pangkay singalan ya maglong na pigginawa͡an nan ya Tyumanem, ka-ilangan na ginawa͡an nan uman ya eped nan.

Currently Selected:

1 Juan 4: klgv

Highlight

Copy

Compare