1 Juan 3

Ya mangayseꞌ na Tyumanem

1Anenganenga mayu na to-o dakulaꞌ ya pagginawa kanaten na Ama na yan ya Tyumanem, kay pigtawag kitadun nan na kanan mangayseꞌ. Aw matinaw saba yeiy! Manang ya manga utaw na walaꞌ pangintu-u sa Tyumanem, walaꞌ nilan ka-ede-i na mangayseꞌ kitadun nan asuntu na walaꞌ nilan ka-ede-i sakanan. 2Kamu na kanak pigginawa͡an, nya-imoꞌ da kitadun iseꞌ na Tyumanem. Walaꞌ pa kabangal kun unu kitadun kagaya moli na allaw, manang ini ya kya-ede-an da tadun: Sa paglikuꞌ ni Jisu-Kristu, masiling da kitadun kanan kay kita-en tadun kun unu sakanan. 3Ya kadég na awun pag-iman seiy, ayawan da nilan ya manga imo-unun na malatay pada masiling silan ni Jisu-Kristu na walaꞌ ya salaꞌ.

4Pangkay singalan ya gayed migpakasalaꞌ, piglakadan nan ya manga suguꞌ na Tyumanem. Kay ya pag-imoꞌ gayed sa salaꞌ, yan ya paglakad sa manga suguꞌ nan. 5Aw kya-ede-an da mayu na nyadi si Jisu-Kristu asini tas na lupaꞌ pada lanasen ya manga salaꞌ tadun. Walaꞌ ya salaꞌ dun ni kanan, 6yanagaw kun singalan ya awun da ni kan Kristu, diliꞌ da sakanan magpakasalaꞌ. Manang pangkay singalan ya magpadeleg mag-imoꞌ sa salaꞌ, tengteng na walaꞌ nan ka-ede-i kun singalan si Jisu-Kristu.

7Kamu na kasiling na kanak mangayseꞌ, magpakatadeng kamu pagaw pasuwayen kamu magi sa palna-u na galuꞌ. Ya utaw na walaꞌ ya pagsalaꞌ, diliꞌ sakanan magpakasalaꞌ kay kaliman nan silingan si Jisu-Kristu na walaꞌ ya salaꞌ dun ni kanan. 8Manang ya utaw na migpadeleg mig-imoꞌ sa salaꞌ, si Satanas ya tagtun kanan, kay yan ya gayed migpakasalaꞌ lekat pa asini muna sa pag-atu nan sa Tyumanem. Aw yan ya du-an na nyadi ya Iseꞌ na Tyumanem pada kalaten ya imo-unun ni Satanas.

9Ya kadég tadun na nya-imoꞌ da iseꞌ na Tyumanem, diliꞌ da magpadeleg sa pag-imoꞌ sa salaꞌ. Kay ya bet na Tyumanem awun da ni kanaten. Aw asuntu na pigbagu la kitadun na Tyumanem, yanagaw diliꞌ da mabatug na magpadeleg kitadun mag-imoꞌ sa salaꞌ. 10Yanagaw dun da ka-ede-i kun singalan ya mangayseꞌ na Tyumanem aw singalan uman ya mangayseꞌ ni Satanas kay ka-ede-an alag magi sa kanilan manga imo-unun. Pangkay singalan ya walaꞌ pag-imoꞌ sa makatutuk sa Tyumanem, aw walaꞌ ya pagginawa nan sa kanan inulug na nyangintu-u, yeiy alag ya magmatinaw na bekeꞌ sakanan na iseꞌ na Tyumanem.

Ya paggaginawa͡ay na mangayseꞌ na Tyumanem

11Ini saba ya palna-u na dyengeg mayu lekat pa na bagu kamu nyangintu-u kan Kristu: Ka-ilangan na maggaginawa͡ay kitadun. 12Diliꞌ kitadun magsiling kan Cain kay migpasakup sakanan kan Satanas aw pigpatay nan ya kanan mangud. Aw anangaꞌ ni Cain yan patayen? Kay malatay ya manga pigpan-imoꞌ nan, manang pig-imoꞌ na mangud nan ya pagkaliman na Tyumanem.

13Kay manga inulug ku, diliꞌ kamu magkabelengbeleng kun dumutan kamu na manga utaw na walaꞌ pangintu-u sa Tyumanem. 14Ya pagginawa tadun sa kanaten manga eped na nyangintu-u la, yeiy ya puliba na diliꞌ da kitadun kasiling na nyatay adti mata na Tyumanem manang nyatagtun da tadun ya ginawa na walaꞌ ya katigkasan. Manang ya utaw na walaꞌ ya pagginawa sa eped nan, yeiy uman ya puliba na kasiling pa sakanan na nyatay adti mata na Tyumanem. 15Ya utaw na migdumut sa eped nan, kasiling sakanan na migpatay sa utaw. Aw nya-edeꞌ kitadun na ya utaw na migpatay sa eped na utaw, walaꞌ dun ni kanan ya ginawa na walaꞌ ya katigkasan.

16Maynini ya pagka-edeꞌ tadun sa tengteng na pagginawa: Migpakamatay si Jisu-Kristu asuntu sa manga salaꞌ tadun. Aw yeiy ya du-an na tumabang kitadun sa kanaten manga inulug pangkay pa adti pagkamatay. 17Pangkay singalan kanaten ya madyaw na pagpakabetang manang walaꞌ nan kallati ya kanan inulug na to-o migkapelek, na, kun maynan, diliꞌ sakanan makapaglong na pigginawa͡an nan ya Tyumanem.

18Kamu na pigsiling ku na kanak mangayseꞌ, pakitaꞌ tadun na tengteng kitadun miggaginawa͡ay magi sa imo-unun tadun na madyaw, aw bekeꞌ oloꞌ na taman dun ni egeng tadun. 19Aw kun maynan ya kanaten paggaginawa͡ay, dun da naten ka-ede-i na pigdalug tadun ya matinaw na palna-u aw makapalapit da kitadun adti Tyumanem na walaꞌ ya kakallekan. 20Pangkay piglinggal kitadun na kanaten anenganeng asuntu sa salaꞌ na nya-imoꞌ tadun, manang ya Tyumanem to-o pa matas kay sa kanaten anenganeng, aw nya-edeꞌ sakanan sa kadég. 21Yanagaw, kamu na kanak pigginawa͡an, kun walaꞌ da ya salaꞌ na nyakalinggal sa kanaten anenganeng, diliꞌ da kitadun mabekenbeken magpalapit adti Tyumanem. 22Aw pangkay unu ya sekaten tadun, un nan saba atag kay pigdalug tadun ya manga suguꞌ nan aw pig-imoꞌ tadun ya pagkaliman nan. 23Aw ini ya kanan suguꞌ: Pangintu-uwan tadun ya kanan Iseꞌ na si Jisu-Kristu, aw maggaginawa͡ay ya kadég tadun, kay yeiy uman ya pigsuguꞌ nan kanaten. 24Aw ya utaw na dyumalug sa manga suguꞌ nan, yeiy ya utaw na nyakasambuk da adti Tyumanem, aw ya Tyumanem awun uman ni kanan. Aw magi sa Ispiritu Santo na pig-atag nan kanaten, dun da ka-ede-i na ya Tyumanem awun ni kanaten.

Currently Selected:

1 Juan 3: klgv

Highlight

Copy

Compare