1 Juan 5
5
Ya pagdeg na mangintu-uway sa malatay
1Pangkay singalan ya nyangintu-u na si Jisus yan ya Kristu, nya-imoꞌ da silan mangayseꞌ na Tyumanem. Aw ya kadég na gyuminawa sa ama, gyuminawa uman sa mangayseꞌ nan. 2Yanagaw kun pigginawa͡an tadun ya Tyumanem aw kun pigdalug tadun ya manga suguꞌ nan, dun da ka-ede-i na pigginawa͡an tadun ya mangayseꞌ na Tyumanem. 3Kay ya pagginawa tadun sa Tyumanem, yan ya pagdalug tadun sa manga suguꞌ nan. Aw diliꞌ to-o malug dalugun ya kanan manga suguꞌ. 4Kay mabatug da tadun degen ya malatay asini tas na lupaꞌ asuntu na iseꞌ da kitadun na Tyumanem. Aw ya pagdeg tadun sa kadég na malatay, magi saba oloꞌ sa pagpangintu-u tadun kan Jisu-Kristu. 5Yanagaw singalan kaꞌ ya makadeg sa malatay na asini tas na lupaꞌ? Oloꞌ saba utaw na nyangintu-u na si Jisus ya Iseꞌ na Tyumanem.
Ya migmatinaw na si Jisus ya Iseꞌ na Tyumanem
6Si Jisu-Kristu saba ya nyadi magi sa tubig dun ni pagba͡utismu kanan, aw magi uman sa duguꞌ dun ni pagkamatay nan adti krus. Bekeꞌ oloꞌ na tubig, manang magi uman sa duguꞌ. Aw ya Ispiritu Santo, yan ya migmatinaw sa kadég yeiy kay alag matinaw ya pigpa-edeꞌ nan. 7Awun saba tulu ya migmatinaw na si Jisus ya Iseꞌ na Tyumanem: 8ya Ispiritu Santo, aw ya tubig, aw ya duguꞌ. Ya tulu yeiy migkasambuk migmatinaw kun singalan sakanan. 9Kun pyangintu-uwan tadun ya pagmatinaw na manga utaw, to-o pa dun kasaligan ya pagmatinaw na Tyumanem aw umbaꞌ pangintu-uwan. Aw pigmatinaw da saba na Tyumanem na si Jisus ya Iseꞌ nan. 10Ya utaw na nyangintu-u sa Iseꞌ na Tyumanem, pigbetang da nan adti kanan anenganeng ya pagmatinaw na Tyumanem. Manang ya utaw na walaꞌ pangintu-u sa Iseꞌ na Tyumanem, pig-imoꞌ nan baling galu-un ya Tyumanem, kay walaꞌ nan pangintu-uwi ya pagmatinaw nan kun singalan ya kanan Iseꞌ. 11Aw ini ya pigmatinaw nan: Pig-atagan da kitadun na Tyumanem na ginawa na walaꞌ ya katigkasan, aw ya lyekatan sa ginawa yeiy, yan saba ya kanan Iseꞌ. 12Ya utaw na dyumawat sa Iseꞌ na Tyumanem, nyatagtun da nan ya ginawa na walaꞌ ya katigkasan. Manang ya utaw na walaꞌ dawat sa Iseꞌ na Tyumanem, walaꞌ nan katagtun ya ginawa na walaꞌ ya katigkasan.
13Pigsulat ku ya kadég yeiy adti kamayu na nyangintu-u sa ngalan na Iseꞌ na Tyumanem pada maka-edeꞌ kamu na nyatagtun da mayu ya ginawa na walaꞌ ya katigkasan. 14Aw walaꞌ da ya kakallekan tadun magpalapit adti Tyumanem. Kun magsekat kitadun magi sa kanan pagbayaꞌ, pakanyegan nan kitadun. 15Aw asuntu na kya-ede-an tadun na pigpakanyegan nan ya pangkay unu na pigsekat tadun kanan, kya-ede-an tadun uman na pigtubag da nan ya kanaten pigsekat.
16Yanagaw kun awun sambuk kamayu na kumitaꞌ sa eped nan na mangintu-uway na nyaka-imoꞌ sa salaꞌ manang ya salaꞌ na pig-imoꞌ nan diliꞌ makapa-elet kanan adti Tyumanem, panawagtawagan nan ya utaw yan pada magselsel sakanan, aw atag na Tyumanem ya pigsekat nan. Manang awun salaꞌ na magpaka-elet sa utaw lekat adti Tyumanem, aw walaꞌ aku paglong na panawagtawagan mayu ya utaw na mig-imoꞌ sa maynan.#5:16 Ya salaꞌ na makapa-elet sa utaw adti Tyumanem, kun diliꞌ sakanan mangintu-u kan Jisu-Kristu. 17Ya kadég na pag-imoꞌ sa malatay, salaꞌ saba, manang diliꞌ ya kadég na salaꞌ makapa-elet sa utaw adti Tyumanem na walaꞌ ya tyamanan.
18Kya-ede-an tadun na ya utaw na nya-imoꞌ da iseꞌ na Tyumanem, diliꞌ da sakanan magpadeleg magpakasalaꞌ. Kay pigtamengan da saba sakanan ni Jisu-Kristu na Iseꞌ na Tyumanem, aw diliꞌ da kitadun ni Satanas mabatug dumala͡an. 19Aw kya-ede-an tadun uman na ya Tyumanem yan da ya tagtun kanaten pangkay pigdumala͡an ni Satanas ya kadakulaꞌ na banwa. 20Aw nyaka-edeꞌ kitadun na nyadi la ya Iseꞌ na Tyumanem aw pig-atag nan kanaten ya pagpakalabet sa tengteng Tyumanem. Aw nyakasambuk kitadun kanan magi sa Iseꞌ nan na si Jisu-Kristu, kay Tyumanem saba sakanan aw yan ya lyekatan sa ginawa na walaꞌ ya katigkasan.
21Kamu na pigsiling ku na kanak mangayseꞌ, pagpakawat kamu lekat adti manga tyumanem na galuꞌ.
Currently Selected:
1 Juan 5: klgv
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc. All rights reserved.
