1 Juan 2

1Kamu na pigsiling ku na kanak mangayseꞌ, pigsulatan ta kamu pada diliꞌ kamu magpakasalaꞌ. Manang kun awun makasalaꞌ, awun mag-apitay kanaten adti Ama, aw yeiy si Jisu-Kristu na walaꞌ ya salaꞌ. 2Nya-imoꞌ sakanan dugsuꞌ kalyu kanaten, pada makamang ya pagpa-emel-emel kanaten na Tyumanem aw malanas ya manga salaꞌ tadun. Aw bekeꞌ oloꞌ na kanaten manga salaꞌ manang dala uman ya salaꞌ na kadég na manga utaw. 3Aw kun gayed tadun dalugun ya manga suguꞌ na Tyumanem, dun da tadun ka-ede-i na kyataga͡an tadun sakanan. 4Kun awun utaw na maglong “Kyataga͡an ku ya Tyumanem” manang walaꞌ nan daluga ya manga suguꞌ nan, na, galu-un ya utaw yan aw walaꞌ saba ya katinawan dun ni kanan. 5Manang kun singalan ya dumalug sa tingeg na Tyumanem, nyalingeb da ya pagginawa nan sa Tyumanem. Aw maynini ya pagka-edeꞌ tadun na nyakasambuk kitadun kanan: 6Kun singalan ya maglong, “Nyakasambuk da aku sa Tyumanem,” ka-ilangan nan silingan ya bet ni Jisu-Kristu.

Ya bagu na suguꞌ

7Kay manga inulug ku na kanak pigginawa͡an, pigsulat ku kamayu ya suguꞌ ini: Maggaginawa͡ay kitadun. Bekeꞌ yeiy na bagu na suguꞌ kay madugay da mayu dyengeg aw kya-ede-an da mayu lekat pa idtu na bagu pa kamu nyangintu-u. 8Manang ya suguꞌ yeiy na pigpa-edeꞌ ku asini sulat ini, yan saba ya bagu na suguꞌ. Kay nyatuman da ya suguꞌ ini dun ni pigpan-imoꞌ ni Jisu-Kristu, aw ya paggaginawa͡ay pagkita-en uman dun ni kamayu. Kay ya mangitngit maya-mayaꞌ kyasayuwan na tengteng kalalamdag na to-o syumiga. 9Yanagaw pangkay singalan ya miglong na kya-ilawan da ya anenganeng nan na kalalamdag, manang kun pigkalatan nan na ginawa ya eped na mangintu-uway, ya tengteng matinaw, kenneꞌ pa nan dun ni kangitngitan. 10Pangkay singalan ya gyuminawa sa eped nan na mangintu-uway, dun da ka-ede-i na awun sakanan ni kalalamdag, aw walaꞌ ya makasungkul adti pagpakasalaꞌ asuntu kanan. 11Manang ya utaw na migdumut sa kanan eped, kenneꞌ pa nan nyeyaꞌ adti kangitngitan. Aw kasiling sakanan na nyanaw na walaꞌ nan ka-ede-i kun ayin sakanan pasinan, asuntu sa kangitngit na nyakatampeng sa mata nan.

12Kadég mayu na pigsiling ku na kanak mangayseꞌ, pigsulatan ta kamu asuntu na piglanas da na Tyumanem ya manga salaꞌ mayu magi kan Kristu.

13Kamu na manga unud da ya pagpangintu-u, migsulat aku kamayu kay madugay da mayu kya-ede-an kun singalan si Jisu-Kristu lekat na allaw na bagu pa kamu nyangintu-u kanan.

Aw kamu uman na bagu nyangintu-u, migsulat aku kamayu kay dyeg da mayu si Satanas.

Pigsulatan ta kamu na kasiling na mangayseꞌ ku kay kya-ede-an da mayu ya Ama na yan ya Tyumanem.

14Aw ini ya du-an na migsulat aku kamayu na manga unud da ya pagpangintu-u, kay kya-ede-an da mayu kun singalan si Jisu-Kristu lekat pa na allaw na bagu kamu dyumengeg kanan. Aw migsulat aku uman kamayu na manga bagu nyangintu-u asuntu na masalig da ya pagpangintu-u mayu aw awun da ni anenganeng mayu ya palna-u na Tyumanem, aw pigdeg da mayu si Satanas.

15Diliꞌ mayu pagginawa͡an ya manga asini tas na lupaꞌ na walaꞌ kalimi na Tyumanem. Pangkay singalan utawa ya gyuminawa sa asini tas na lupaꞌ, walaꞌ nan ginawayi ya Ama. 16Kay ya kadég na asini tas na lupaꞌ, dala ya malatay na pagkaliman na pagka-utawun, aw ya manga magpakabuyu sa mata, aw ya pagpalibantug sa kadég na pigtagtun na utaw, alag yeiy walaꞌ lekat adti Ama manang lekat baling adti manga utaw na asini tas na lupaꞌ. 17Aw walaꞌ ya ma-untung adti kadég na pigkaybegan na manga utaw kay alag saba yeiy malanas. Manang ya utaw na dyumalug sa pagkaliman na Tyumanem, awun da ginawa nan na walaꞌ ya katigkasan.

Ya po-on ni Kristu

18Kamu na kasiling na kanak mangayseꞌ, yeiy da ya pagpalekat na kamoliyan na manga allaw. Dyengeg mayu na madi ya sambuk na po-on ni Kristu na un mag-ampang sa Madyaw na Ubat-ubat. Aw pangkay adun, madég da ya manga utaw na maynan na asini la. Yanagaw kya-ede-an da tadun na malapit da saba ya kamoliyan na allaw. 19Na, ya manga utaw yeiy, pangkay syumambuk silan kanaten idtu muna manang pig-indegan kitadun nilan. Kun matinaw pa na eped tadun silan, diliꞌ galu kitadun nilan indegan. Manang pig-ayawan baling kitadun nilan, yanagaw kya-ede-an tadun na bekeꞌ silan na kanaten manga eped dun ni pagpangintu-u.

20Manang kamu bekeꞌ na maynan, kay ya Ispiritu Santo pig-atag da kamayu. Yanagaw nyaka-edeꞌ da ya kadég mayu kun unu ya matinaw. 21Aw ya pagsulat ku kamayu bekeꞌ na asuntu na walaꞌ mayu ka-ede-i ya katinawan manang asuntu na kya-ede-an da mayu, aw nyaka-edeꞌ kamu uman na ya palna-u na galuꞌ walaꞌ saba lekat adti katinawan.

22Yanagaw singalan ya tengteng galu-un? Ya galu-un, yan ya utaw na miglong na si Jisus bekeꞌ na Kristu. Yeiy saba ya po-on ni Kristu, kay gayed nan pagbalyaw ya Ama aw ya Iseꞌ. 23Aw pangkay singalan ya migbalyaw sa Iseꞌ walaꞌ pakasambuk adti Ama. Manang ya utaw na maglong na si Jisus ya Iseꞌ na Tyumanem, nyakasambuk da sakanan adti Ama.

24Yanagaw padelega mayu ya pagdalug sa palna-u na dyengeg mayu na lekat pa idtu na bagu kamu nyangintu-u. Kun padelegen mayu yeiy, magpadeleg ya pagkasambuk mayu adti Ama aw Iseꞌ. 25Aw ya pigpakang kanaten ni Jisu-Kristu, yan ya ginawa na walaꞌ ya katigkasan.

26Pigsulat ku yeiy kamayu pagaw pasuwayen kamu na eped na utaw adti palna-u na galuꞌ. 27Manang kya-ede-an ku na awun ni kamayu ya Ispiritu Santo na nyadawat mayu lekat adti kan Jisu-Kristu. Yanagaw, diliꞌ da mayu ka-ilangan ya eped na magpalna-uway. Kay ya Ispiritu Santo, yan ya gayed migpalna-u kamayu sa kadég na un mayu ka-ede-an, aw alag matinaw ya pigpalna-u nan aw bekeꞌ na galuꞌ. Yanagaw katingen kamu adti kan Kristu, kay yan ya pigpalna-u nan kamayu.

28Kamu na kasiling na kanak mangayseꞌ, katingen kamu dun ni kan Kristu pada dun ni allaw na magpakitaꞌ sakanan diliꞌ kamu mamulamula, aw diliꞌ mabekenbeken magpalapit adti kanan. 29Asuntu na kya-ede-an da mayu na alag matinaw ya pig-imoꞌ nan, yanagaw ka-ede-an mayu uman na pangkay singalan ya mig-imoꞌ sa matinaw nya-imoꞌ da iseꞌ na Tyumanem.

Currently Selected:

1 Juan 2: klgv

Highlight

Copy

Compare