1 Juan 1

1Asini sulat ini, pa-edeꞌ ku kamayu si Jisu-Kristu. Sa walaꞌ pa ka-imoꞌ ya kadakulaꞌ na banwa, awun da sakanan dadan. Pigkitaꞌ nami sakanan aw dayaw nami pig-awidan, aw dyengeg nami ya pag-ubat-ubat nan. Sakanan saba ya tengteng na Tingeg na yan ya lyekatan sa ginawa na walaꞌ ya katigkasan. 2Lyumekat sakanan adti tampid na Ama, aw migpakitaꞌ sakanan kanami aw nyeyaꞌ asini tas na lupaꞌ. Aw lekat na allaw na bagu kami mig-iyeped kanan, dyengeg nami ya palna-u nan, aw kyinitaꞌ nami ya kanan manga pigpan-imoꞌ. Aw pigmatinaw aw pig-ubat-ubat nami yeiy kamayu kay yan ya nyatag sa ginawa na walaꞌ ya katigkasan.

3Ya kanami pigkitaꞌ aw pigdengeg, yan ya pig-ubat-ubat nami kamayu pada makasambuk kamu kanami. Aw bekeꞌ oloꞌ na maynan, ya kadég tadun makasambuk uman adti Ama na yan ya Tyumanem aw adti kanan Iseꞌ na si Jisu-Kristu. 4Aw pigsulat nami ya kadég yeiy adti kamayu pada malingeb ya kanaten pagleya.

Ya Tyumanem, yan ya kalalamdag

5Ini ya pigdengeg nami lekat adti kan Jisu-Kristu aw pig-ubat-ubat nami kamayu: Ya Tyumanem, yan ya kalalamdag aw dun ni kanan walaꞌ ya kangitngit. 6Yanagaw, kun maglong kitadun na nyakasambuk da adti Tyumanem manang kenneꞌ pa tadun dun ni kangitngitan, na, nyakagaluꞌ baling kitadun, aw walaꞌ tadun daluga ya katinawan. 7Manang kun awun da kitadun ni kalalamdag kasiling na Tyumanem na awun ni kalalamdag, migkasambuk ya kadég tadun na nyangintu-u. Aw magi uman sa duguꞌ na Iseꞌ nan na si Jisus, kyalinisan kitadun sa kadég na manga salaꞌ tadun.

8Kun maglong kitadun na walaꞌ ya salaꞌ tadun, piggalu-an tadun ya kanaten pagka-utawun aw walaꞌ dun ni kanaten ya katinawan. 9Manang kun ubat tadun adti Tyumanem ya kanaten manga salaꞌ, na, lanasen nan saba. Aw linisan nan uman ya kanaten anenganeng sa kadég na malatay, kay kasaligan sakanan aw alag matinaw ya kanan pagbayaꞌ. 10Manang kun maglong kitadun na walaꞌ ya kanaten salaꞌ, pig-imoꞌ tadun baling galu-un ya Tyumanem, aw walaꞌ tadun betangan adti kanaten anenganeng ya tingeg nan.

Currently Selected:

1 Juan 1: klgv

Highlight

Copy

Compare