Romans 8
8
Tsija tungkang o chammal eq tong aa
1Eshirangma thanga bara Khristo Jesu na, ning ma aja ta shing moq. 2Chammatakoi Khristo Jesu tungkang o rollung kottey Tsija thong shey nim sha ngarey nia utik thong wang taqhap taphin. 3Bari jaksom raa hanngam tungkang o anung ang eq thong sha jin som moq angta, eshi jaksom sha Shkewa som ta. Usa may tha ngarey hanngam mal ang eq ngarey pinthong ang rangma takat eq hanngam o ngarey aja ta shingta. 4Irimal ang eq hiqtang o bara hanngam mal tong moq ang eq, Tsija mal tong aa, thong shimal ang ching sha hiqtang o tahom ang aa. 5Hanngam tin nuk o tongtey miqtang shey hanngam tinthin sho ning ni ning thung atal sha shing aa. Etharin Tsija tin nuk o tongtey miqtang shey Tsija tinthin o ning ni ning thung atal sha shing aa. 6Hanngam thung atal kot sha utik, etharin Tsija o thung atal kot sha rollung nia nungmay. 7Hanngam o thung atal kottey sha Shkewa ralwa chammatakoi ning aa Shkewa thong tat moq etho jin ang moq hun. 8Barey hanngam raaq sha tat aa, ning aa Shkewa sha jin tasungrang moq.
9Etharin nim hanngam o tong min; Shkewa Tsija nim o tong ajo nim Tsija na tong nin. Barima Khristo Tsija ahung ang ajo ning sha Khristo miq ang moq. 10Etharin Khristo nim o tong ajo ngarey tungkang o nim hanphung sha utik angma ta etha otho asing tungkang o Tsija shey nim ma rollung kot aa. 11Barey Jesu sha amáng wang wey thajey ta, eshi Shkewa Tsija sha nim o tong aa ta ang ajo, Khristo sha utik wang thaluntey shey nim o tong aa Tsija tungkang o nim utik phan hanphung ma rollung kot na.
12Eshirangma i no nia pho tang, hanngam raaq tat eq hiqtang tong ching ta ang moq. 13Chammatakoi nim hanngam raaq tat eq tong inn jo utik ang nin; etharin Tsija wang hanphung ngarey jaksom sha tatik inn jo nim atharang tong nin. 14Barey Shkewa Tsija ji sha phan aa, ning sha Shkewa susa tang. 15Shkewa nim ma kot ta Tsija shey nim sha qha ma shing moq etho nim sha tacho tey ang moq, etha otho Tsija shey nim sha Shkewa sa tang ma hun aa etho Tsija tarong wang hiqtang aa Abba, Iwa ta raaq eq hal i. 16Hiqtang Shkewa susa tang ta Asang Tsija piq ni piq atho hiqtang tsija jamoq miikkhi kot aa. 17Thanga hiqtang usa tang ang ijo hiqtang raa sa may; etho hiqtang Khristo jamoq Shkewa phun amun sa may ang i. Etharin hiqtang phun amun sa may ang ijo piq tsamnang jamoq tho atha ang ching.
Inapja rollung phun amun
18Hiqtang o bara phun amun takhi ma ta aa, eshi relna thaneynap tsamnang raa chamtho ang moq ta nga tathin ang. 19Phanghun eq rapney tungmang wang Shkewa susa tang takhi rangma ban chey aa. 20Phanghun eq umongtham wang ang moq ang eq Shkewa tin nuk mongtham wang manthun mong na angta. Etharin tungmang ang eq, 21phanghun sha tho uthun qha wang aqhap ang eq, Shkewa susa tang phun amun aqhap sha kap na. 22Thaji phanghun thanga náng thula sa chang ma taksa aa thimal takho takhang sha hiqtang aa usam eq i. 23Phanghun chen ang moq, hiqtang tho bari relna Tsija phang tingo, thanga hun tinmong na qhap eq ringrak i; Shkewa hiqtang sha usa ta shing ma etho hiqtang thaji hanphung sha taqhap rangma ban eq qhap chey i. 24Iri tungmang tungkang o hiqtang aa lunwan kapti; etharin bari tungmang sha jin khi eq i, esha asing tungmang tho ang moq. Hiqtang aa khi phan shima utang eq tungmang na? 25Etharin hiqtang aa bara khi mi esha tungmang ijo esha tin thanan eq ban ni.
26Eshimal Tsija eq tho hiqtang anung o nong phi. Romtam chamal eq chuk ching ta hiqtang aa sammi etharin Tsija hun jin bat mi raaq tang wang hiqtang rangma tin thanin eq romtam chu aa. 27Tin siintey Tsija tinthin chamlang aa sha usam eq aa. Chammatakoi Tsija eq Shkewa miqtang rangma utin mongtham mal romtam chu aa.
28Shkewa ma tinmat tey etho utin mongtham wang haltey rangma thaji raaq sha jaqhal ang aa ta, hiqtang aa usam eq i. 29Shkewa jakho wang tal ta miqtang sha usa Miqwasa mal angma piq aa adak eq shing ta, irimal ang eq daqhan sapho na tang jaktung wang piq sha phokho sa angna. 30Bara piq aa adak eq shing ta ning tha piq aa halta; bara piq aa halta ning sha asing miq angma shingta; bara asing miq angma shingta ning ma uphun amun sha kot ta.
Shkewa thun moq phan tinmat
31Hiqtang iri tung aa raaq chamlang ta raaq ni? Shkewa hiqtang ching kona ang ajo utang eq hiqtang sha jin miiksuk phani? 32Piq aa usa Miqwasa tha hiqtang ma kot hunga shing moq angta, etharin hiqtang ma piq sha kot chakta. Irimal ang ajo piq jamoq hiqtang ma thaji sha kotmoq angna i? 33Shkewa talchol tey tang shima utang eq aja ta raaq na? Shkewa hun ning sha asing miq ta shing aa. 34Ning sha utang eq aja ta shing na? Khristo Jesu bara utik angta, amáng wang weyjey angta etho Shkewa jakqha kona - piq aa hiqtang rangma romtam chu aa. 35Khristo tinmat wang utang eq hiqtang sha jin phal pha ni? Tsamnang, tia tintashit tia tahikham, tia shong aa cham, tia chamlal junglal, tia ucho upan ang ching tia jantong thaji shey hiqtang sha jin phal eq phani i? 36Asang likwit na thawit aa,
“Ba rangma í salwet utik relna ang i;
Í tikwat eq ma som kat aa kelwut mal.”
37Hiqtang ma tinmat tey tungkang o iri thaji raaq tang na ujintey wang tho ajong. 38Chammatakoi Shkewa tinmat wang hiqtang sha cham eq tho jin phal phami ta nga usam eq ang. Utik tia rollung, rangkamwa tang tia thangwa tang, thaney nap rollung tia inapja rollung, tia jaktáng o shingtey, 39aluk tia anim tia thaji phanghun wang chamlang tangwang sha Shkewa tinmat bara hiqtang Teyhungwa Jesu Khristo tungkang o hiqtang ràng, eshiwang hiqtang sha jin phal phami.
Currently Selected:
Romans 8: Muklom
Highlight
Share
Compare
Copy
Want to have your highlights saved across all your devices? Sign up or sign in
CC BY-NC-ND 4.0
