Romans 9
9
Shkewa nia umiq tang
1Nga Khristo o asing bat phang, alik bat pha mong etho itin eq tho Asang Tsija o iri raaq ma miikkhi kot aa. 2Itin na ahan tinthin ang aa etho itin salwet tak aa. 3I no tang rangma bara hanngam wang imiqtang, ning rangma nga manthun cham kap ang etho nga Khristo wang cham taphal ang ta nga tathin ang. 4Ning Israel miqtang; Shkewa usa tang angma piq aa ning sha hunta etho piq aa uphun amun ning khom o takhi ta; piq aa uraaqkhak tha ning jamoq shing ta etho uthong sha ning ma kot ta; ning rangma asing shumnuk ang aa; ning aa Shkewa rangtum kapta. 5Ajong Tey aa wa tang sha ning ràng; etho Khristo sha tho hanphung o ning wang angta, bara thaji sha jaktang o shingtey Shkewa, piq shi salwet cham tasapsey aa. Amen!
6Shkewa rangtum tha tahom moq angta ta ang moq; chammatakoi Israel phi aa lí tang thaji sha Israel miqtang ang moq; 7etho Abraham phi aa lí tang thaji sha Abraham sa tang ang moq. Chammatakoi Asang likwit na thawit ang aa, “Isaac wang hun ba phi aa lí tang ta thamiing na.” 8Adak raaq na Abraham ma hanphung o kapta sa tang sha Shkewa sa tang ang moq, etharin rangtum susa tang sha Abraham phi aa lí ta wet ta. 9Chammatakoi Shkewa iri raaq o rangtum ta, “Nga khakla rangham o wey kapha náng etho Sarah ma miqwasa angna.”
10Ira chen ang moq, Rebecca tho hiqtang tey aa wa Isaac sa khangpit holta. 11-12Etharin khangpit sa changwey moq jakho na etho ning aa jaqhal tia jashit som wey moq jakho Shkewa Rebecca ma batta, “Phokho wa sha nijang wa jaktáng o angna.” Shkewa tal aa sha utin mal ang aa ta esha takhi aa, Shkewa bara halta sha piq jaksom tungkang o ang moq. 13Asang likwit na thawit aa, “Nga Jacob ma tinmat táng, etharin Esau ma nuk mong ang táng.”
14Irimal ang ajo hiqtang chamta raaq ni? Shkewa jaqhal eq phung moq i? Baluk otho ang moq! 15Piq aa Moses ma bat aa, “Nga barima tinshit ma nuk ang, piq ma tinshit náng, etho barima tinmat ma nuk ang, piq ma tinmat náng.” 16Eshirangma ira miqtang tin nuk nia jaksom wang ang moq, etharin Shkewa tinshit wang ang aa. 17Asang likwit na Pharaoh ma batta, “Thaji mingkang na nang o itarong takhima etho imiing sha phanchan ma nga nang sha lungwang ang eq thalang taphang.” 18Eshirangma Shkewa itin wang chamtey tey ma tinshit takhi aa, utin wang chamtey tey tinchet ma shingta.
Shkewa tinqhat nia tinshit
19Nim wang chamtey eq mòk bat phanin, “Irimal ang ajo Shkewa miqtang shi chamma jashit ta shing aa? Utang eq piq mongtham sha jin táng na?” 20Inokwa, Shkewa raaq dantey nang utang aa? Uhun phan shey uhuntey miq ma irimal upit eq aa i? “Nang aa nga ri irimal cham aa hun taphu?” 21Buk wang ashey haqchik sha tachumrang ma etho ashey haqchik sha salwet som rangma chik huntey shey jin hun moq i?
22Shkewa chamlang somlo ta eshina tho iri raaq raa khakla. Piq ahan tinqhak takhi rangma etho utarong sha tasam tol rangma piq nuk aa. Etharin utang o piq qhak aa, etho piq sha uthun angma shing aa, piq rangma thanan eq Shkewa ban aa. 23Hiqtang raa utinshit kaptey tang etho uphun amun kap rangma Shkewa hiqtang raa jakho wang hun kacha shing taphi etho piq thangchan phun amun sha hiqtang ma takhi rangma piq nuk aa. 24Piq aa Jehudi tang chen ang moq Gentile tang wang tho uhal eq tey tang jaktung na hiqtang raa tho atha. 25Hosea likdap na bat aa;
“Bara imiqtang ang moq, ning tha nga imiqtang ta hal náng,
Barima nga tinmat mong ang táng, ning ma nga itinmat tang ta hal náng;
26Nim imiqtang ang min ta bari katáng na raaq táng,
Eshi katáng na ning sha atharang Shkewa susa tang ta thamiing na.”
27Isaiah aa Israel tung aa raaq ring eq batta,
“Israel miqtang sha jungku phangsa mal daqhan ang ajo tho
eshiwang aney hun lunna.
28Chammatakoi Teyhungwa uraaq mingkang ro tahom eq
asing wang kalo tasang na.”
29Isaiah aa jakho tho bat eq ta,
“Ajong Teyhungwa hiqtang rangma phi aa lí shing chak moq angta jo,
hiqtang Sodom mal ang wang ti,
etho Gomorrah mal ang wang ti.”
Israel nia tungtang qhal
30Irimal ang ajo hiqtang chamlang ta raaq i? Gentile tang bara asing bi moq angta ning aa asing sha kapta, eshi asing sha kam wang. 31Etharin Israel, barey thong tungkang o asing sha bita ning aa esha kap moq angta. 32Chamma kap moq aa? Chammatakoi ning aa kam wang ang moq ang eq ning jaksom tungkang o esha bita. Ning sha thabot ching long sho thabot angta. 33Asang likwit na thawit aa,
“Siin inn, nga Zion na ashey thabot ang ching long shing ang,
esha miqtang taqhat ching ajan long,
Etharin utang eq piq o han aa, piq rakri moq angna.”
Currently Selected:
Romans 9: Muklom
Highlight
Share
Compare
Copy
Want to have your highlights saved across all your devices? Sign up or sign in
CC BY-NC-ND 4.0
