Roma 3

Kalabhiana Miana Yahudi tee o Aulataʼala Sadia Amembali Atoparacaea

3:1-8

1Ande mboo sumai, opea o kalabhiana miana Yahudi? Tee opea o faʼedana tandakia sumai? 2Atantumo abhari mpuu o faʼedana. Mobhaa-bhaana, roonamo Aulataʼala apaparacaeaaka firimanina to miana Yahudi. 3Inciamo atotuu, sagaa minaaka i manga incia inda akeniaka janjina tee Aulataʼala. Buaka o giu incia sumai bheakomaʼana ande o Aulataʼala inda akeniaka janjina? 4#Zab. 51:6.Atantumo inda! Aulataʼala bheatorotorosu akeniaka janjina, moomini o maanusia inda akeniaka janjina, mboomo motoburina i nuncana Kitabi Momangkilo,#3:4 motoburina i nuncana Kitabi Momangkilo: Raja Daud aperna aburi mboo sii i nuncana Zaburu, "To Ingkoo, tangkanamo tee Ingkoo kukodosa tee kupewau giu madhaki. Sabutuna abanara o firimanimu wakutuuna kupewau kasalaha tee uʼadili wakutuuna uhukumuaku." Maʼanana, Raja Daud afikiri tee atoba minaaka i dosana karona tee asatuju ande o Aulataʼala sadia abanara wakutuuna abhoasaka firimanina.

"Mamudhaakana akobukutii ande Ingkoo ubanara minaaka i bhari-bharia ifirimaniakamu,

tee Ingkoo ukana wakutuuna utohaakimu."

5Maka ande o pewauta inda mobanarana sumai amembali apatinda kabanarana Aulataʼala, opea bheipogauakata? Buaka o Aulataʼala inda aʼadili wakutuuna mangahukumu? (Pogau incia sii tangkanamo adhaangia i nuncana fikirina maanusiamea.) 6Atantumo inda! Roonamo ande Aulataʼala inda adili, tantumo Incia inda amembali ahaakimu dunia. 7Maka ande roonamo kagau-gauku imembaliakana kabanarana Aulataʼala ahanda atokamata tee ajulu atomuliangi, apokia iaku dhaangiapo uka kutohaakimu mboomo mia mokodosa? 8Apokia ingkita inda tapogau, "Maimo tapewauaka kadhaki mamudhaakana aumba o giu momalape"? Inciamo ingkami tee mangafitanaana tee mangapogauakana ande ingkami padhamo tapogau mboo sumai, garaaka inda. Manga mia momangafitanaana mboo sumai alaenga apotibhaaka kahukumuna Aulataʼala!

Bhari-bharia Maanusia Akodosa

3:9-20

9Jadi tuaapa? Buaka alabhi amalape ingkami tee mia inda motolentuna miana Yahudi? Inda! Roonamo ingkami padhamo tapogau tee bhari-bharia mia, malape i miana Yahudi atawa i miana Yunani, ande bhari-bharia manga incia akodosa, 10#Zab. 14:1-3; 53:2-4.mboomo mopadhana motoburina i nuncana Kitabi Momangkilo,

"Inda dhaangia o mia mobanarana dhadhina.

11Inda dhaangia o mia momembalina modhadhina tee kalapena budina,

tee inda dhaangia o mia mototuu-totuuna mopeelona Aulataʼala.

12Bhari-bharia mia apekaridho karona minaaka i Aulataʼala,

tee bhari-bharia manga incia inda tee gunana.

Inda samia uka o mia mopewauna kalape,

moomini samia uka."

13 # Zab. 5:10; 140:4. "Goncona manga incia mboomo koburu moponganga.

Dhelana manga incia apekatipu.

Bhiwina manga incia apekafitanaa mboomo ulo mokobisa."

14 # Zab. 10:7. "Muncuna manga incia abukeaka katunda tee kabancia."

15 # Yes. 59:7-8. "Bhengkalana manga incia amadhei ande bheasikisaa tee apekamate mia.

16Iapaipo uka o lingkaana manga incia, modhaangiana tangkanamo kahancuru tee kanarakaa,

17tee manga incia inda amatau dhalana dhadhi momalape."

18 # Zab. 36:2. "Manga incia inda amaeka tee Aulataʼala."

19Sii-sii tamataua ande bhari-bharia giu motoburina i nuncana Kitabi Taurati adhawuakea to manga mia moosena Hukumuna Taurati, mamudhaakana o muncuna bhari-bharia mia atosoncongi, tee saangua dunia adhaangia i tambena kahaakimuna Aulataʼala. 20Roonamo inda samia uka o maanusia motoabhina mobanara i aroana Aulataʼala rampaakanamo aose kaadharina Hukumuna Taurati, maka o Hukumuna Tauratimo sumai isadaraakata minaaka i dosata.

Maanusia Apabanarea Aulataʼala Roonamo Kaparacaeana

3:21-31

21Maka sii-sii o Aulataʼala padhamo asusuaka dhalana to maanusia mamudhaakana atopabanara i aroana. Giu incia sii mencuana rampaakanamo ingkita taose Hukumuna Taurati, moomini o Kitabi Taurati tee kitabina manga nabii padhamo adhawuaka kasakusiina to giu incia sumai. 22#Gal. 2:16.Kitabi Momangkilo aadhariaka ande maanusia amembali atoabhi abanara i aroana Aulataʼala minaaka i kaparacaeana tee Isa Al Masi. Giu incia sii apewaua Aulataʼala to bhari-bharia mia moparacaeana tee Isa Al Masi, tee inda apaposala-sala miana Yahudi tee mia inda motolentuna miana Yahudi. 23Roonamo bhari-bharia mia akodosamo tee amaridhomo minaaka i kamuliangina Aulataʼala. 24Maka roonamo rahumatina Aulataʼala, maanusia atoabhi abanara i aroana Aulataʼala alaloi katolosina minaaka i Isa Al Masi. 25-26Aulataʼala padhamo apatotapuaka Isa Al Masi to apamembalia kurubanina poʼamania alaloi matena to manga mia moparacaeaia. Giu incia sumai to asusuaka kabanarana. Roonamo i nuncana kasabarana, Incia padhamo ataroaka dosa-dosana maanusia minaaka i piamo itu maka o Aulataʼala aʼadili, jadi Incia tabeana ahukumu mia mopewauna dosa. Maʼanana giu incia sumai mamudhaakana o Aulataʼala asusuaka kabanarana to manga mia i zamani sii-sii, tee cara incia sumai o Aulataʼala amembali asusuaka karona ande Incia abanara, tee uka aabhi manga mia moparacaeana tee Isa abanara.

27Ande mboo sumai opea o alasana maanusia to abanggaaka karona? Inda tee alasana! Buaka o maanusia amembali apomalape tee Aulataʼala rampaakanamo aose Hukumuna Taurati? Inda amembali! Maka momembalina mopapomalapena pokaiana maanusia tee Aulataʼala tangkanamo moparacaeana tee Isa Al Masi. 28Roonamo ingkami tayaakini, ande o maanusia atoabhi abanara i aroana Aulataʼala roonamo soo aparacaea tee Isa Al Masi tee mencuana rampaakanamo aose Hukumuna Taurati. 29Buaka o Aulataʼala sumai tangkanamo Aulataʼalana miana Yahudi, atawa Incia uka o Aulataʼalana mia inda motolentuna miana Yahudi? Atantumo Incia o Aulataʼalana bhari-bharia mia. 30#Kap. 6:4; Gal. 3:20.Roonamo Aulataʼala sumai sakaro-karona, sumaimo Incia bheaabhi manga mia abanara rampaakanamo iimanina tee Isa, malape o mia mototandaki atawa o mia inda mototandaki.

31Ande mboo sumai, buaka rampaakanamo iimanimami tee Isa Al Masi mbakana tamembali tapanainda Hukumuna Taurati? Atantumo inda! Maka tee iimanimami sumai, ingkami tahanda taharagaangi Hukumuna Taurati sumai.

Currently Selected:

Roma 3: KMW

Highlight

Copy

Compare