Roma 4
4
Nabii Ibrahim Atopabanara roonamo Aparacaea tee Aulataʼala
4:1-12
1Jadi opea bheipogauakata tee dhadhina Nabii Ibrahim opu-opuata sumai? 2Ande o Nabii Ibrahim atoabhi abanara i aroana Aulataʼala roonamo pewauna, sumaimo dhaangia saangu giu momembalina ibanggaakana karona, maka inda mboo sumai i aroana Aulataʼala. 3#Bhaa. 15:6; Gal. 3:6.Roonamo i nuncana Kitabi Momangkilo atoburi, "Nabii Ibrahim aparacaea tee Aulataʼala, tee rampaakanamo giu incia sumai Aulataʼala aabhia amembali mia mobanara." 4Mia mokarajaa atantumo apotibhaaka ponambo, tee o ponambona sumai inda aabhia mboomo hadia, maka aabhia amembali hakuna. 5Sainamo mia inda mokarajaa, maka aparacaea tee Aulataʼala moabhina mia modorohaka abanara, sumaimo Aulataʼala bheatarima mia incia sumai rampaakanamo kaparacaeana. 6Apokana uka mboomo mopadhana iburina Raja Daud to pokaiana mia ipabanarana Aulataʼala mencuana rampaakanamo opea mopadhana ipewauna,
7 #
Zab. 32:1-2. "Akaunde-undemo manga mia
motoʼamponina manga kasalahana
tee itutubhina manga dosana.
8Amasanaamo maanusia,
roonamo dosana inda agagaria Kawasana Opu."
9Buaka o bhoasaka "kaunde-unde" minaaka i Raja Daud sumai tangkanamo apatujuakea to mia mototandakimea? Atawa to mia inda mototandaki? Ingkami padhamo tapogauakea, ande o kaparacaeana Nabii Ibrahim alentua amembali kabanara. 10Naepia o Aulataʼala apepuu alentu giu incia sumai to Nabii Ibrahim, sapadhana atotandaki atawa wakutuuna indapo atotandaki? Wakutuuna indapo atotandaki, mencuana sapadhana atotandaki! 11#Bhaa. 17:10.Ande mboo sumai, tandaki itarimana Nabii Ibrahim soo amembali materaina kabanara rampaakanamo iimanina, siitumo opea ipotibhaakana wakutuuna indapo atotandaki. Tee mboo sumai, Nabii Ibrahim amembalimo amana bhari-bharia mia moparacaeana tee Aulataʼala, atolentu uka to manga mia indapo mototandaki, mamudhaakana o kabanara sumai atolentuaka uka to manga incia. 12Tee incia uka amembali amana bhari-bharia mia mototandaki, tee mencuana soo mototandakinamea, maka moparacaeana uka tee iimanina Nabii Ibrahim opu-opuata i wakutuuna incia indapo atotandaki.
Nabii Ibrahim Atarima Janjina Aulataʼala Rampaakanamo Kaparacaeana tee Aulataʼala
4:13-25
13 #
Bhaa. 17:4-6; 22:17-18; Gal. 3:29. Aulataʼala apojanji tee Nabii Ibrahim tee siwuluna, ande o dunia sii bheamembali pewauana manga incia. Aulataʼala apojanji mboo sumai mencuana rampaakanamo Nabii Ibrahim ataʼati tee Hukumuna Taurati, maka roonamo incia aparacaea tee Aulataʼala, sabutuna o Nabii Ibrahim atarimaia Aulataʼala amembali mia mobanara. 14#Gal. 3:18.Roonamo ande tangkanamo soo mia motaʼatina tee Hukumuna Tauratimea bhemotarimana opea ijanjiakana Aulataʼala, sumaimo bheasia-siamo kaparacaeata tee Aulataʼala, tee o janjina Aulataʼala uka abatalamo. 15Rampaakanamo sumai o Hukumuna Taurati aumbaaka pamuruna Aulataʼala, maka ande i saangu tampa inda tee Hukumuna Taurati, sumaimo inda dhaangia uka o kasalaha.
16 #
Gal. 3:7. Jadi o janjina Aulataʼala sumai aminaaka i kaparacaeata tee Incia, mamudhaakana aincana ande o janji sumai aminaaka i rahumati, sabutuna o janji sumai akawa to bhari-bharia siwuluna Nabii Ibrahim. Jadi mencuana tangkanamo to manga incia moosena Hukumuna Tauratimea, maka to manga incia moosena iimanina Nabii Ibrahim uka, roonamo Nabii Ibrahim opu-opuata bhari-bharikita. 17#Bhaa. 17:5.Giu incia sumai mboomo mopadhana motoburina i nuncana Kitabi Momangkilo to Nabii Ibrahim, "Iaku padhamo kuangkako to umembaliaka opu-opuana lipu mobhari." Nabii Ibrahim aparacaea tee pogauna Aulataʼala sumai, roonamo amataua ande o Aulataʼala amembali apadhadhi mia mate, tee o parintana amembali apadhaangia manga giu indapo modhaangia amembali adhaangia. 18#Bhaa. 15:5.Nabii Ibrahim atorotorosu aharapu tee aparacaea moomini indamo dhaangia momembalina iharapu, sabutuna incia amembali opu-opuana lipu mobhari apokana tee opea mopadhana motoburina i nuncana Kitabi Momangkilo, "Siwulumu bheabhari mpuu naile itu." 19#Bhaa. 17:17.Kaparacaeana Nabii Ibrahim asadhaadhaa moomini o umuruna kera-kera saatu taomo tee amataua ande o badana amalutemo mboomo mia mate, tee o Sarah bhawinena uka akomba. 20Maka incia asadhaadhaa aparacaea tee inda ameri wakutuuna audhani janjina Aulataʼala tee o iimanina ahanda amatangka, tee incia amuliangi Aulataʼala. 21Incia ayaakini mpuu ande o Aulataʼala amembali apewau opea mopadhana ijanjiakana. 22Rampaakanamo sumai, Aulataʼala aabhi Nabii Ibrahim mboomo samia o mia mobanara. 23Bhoasaka, "Atarimaia Aulataʼala amembali mia mobanara," mencuana tangkanamo soo atoburiaka to Nabii Ibrahim, 24maka atoburiaka uka to ingkita. Jadi o giu incia sumai bhealentua Aulataʼala roonamo taparacaea tee Incia mopadhana mopadhadhina pendua Isa Oputa Momalanga minaaka i mate. 25#Yes. 53:4-5.Isa padhamo atopasaraakaaka to atopekamate roonamo manga dosata, tee Incia atopadhadhi pendua minaaka i mate mamudhaakana ingkita tamembali tatopabanara i aroana Aulataʼala.
Currently Selected:
Roma 4: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
