Roma 2
2
Kahukumuna Aulataʼala to Bhari-bharia Mia
2:1-16
1 #
Mat. 7:1; Luk. 6:37. E manga witinaiku, incema buaka ingkomiu mbakana uhaakimu mia mosagaanana? Karomiu samia uka inda bheulapa minaaka i kasalaha wakutuuna uhaakimu mia mosagaanana, tee o giu incia sumai soo apokanamo tee uhukumu karomiu samia, roonamo opea ipewaumiu sumai apokana uka tee opea ipewauna manga incia. 2Ingkita tamataua ande o kahukumuna Aulataʼala to manga mia mopewauna mboo sumai aʼadili. 3Maka ingkomiu uhaakimu manga mia mopewauna giu madhaki, sainamo karomiu uka upewau mboo sumai. E manga witinaiku, bholi ufikiri umembali ulapa minaaka i kahukumuna Aulataʼala! 4Bholi upandaʼente kalapena incana, kakatena totona incana tee kaogena kasabarana Aulataʼala, roonamo ingkomiu dhaanamo umataua ande o Aulataʼala sumai asusuaka kalapena incana to ingkomiu mamudhaakana utoba minaaka i dosa-dosamiu. 5Maka rampaakanamo umentagali tee umendeu utoba, ingkomiu soo apokanamo tangasaana upajulu pamuruna Aulataʼala to karomiu samia sakawana o wakutuuna pamuru tee kahukumuna moʼadili sumai apatiumbaakakomiu. 6#Zab. 62:13; Aar. 24:12.Roonamo Aulataʼala bheabalasi bhari-bharia pewauna mia apokana tee opea mopadhana ipewauna. 7Aulataʼala bheadhawuakea dhadhi mobakaa to manga incia inda mounto-untona mopewauna kalape, mopeelona kamuliangi, mopeelona kahoromati, tee mopeelona dhadhi inda momembalina mobinasa. 8Maka o Aulataʼala bheaʼamara tee apamuru mpuu tee manga mia molabhiakana karona, inda motaʼatina tee kabanara, tee moosena dhala momadhaki. 9Karasai tee kanarakaa bheakangkanai bhari-bharia mia mopewauna kadhaki i nuncana dhadhina, tee mobhaa-bhaana ikangkanai o miana Yahudi, tee uka manga mia mominaakana i lipu mosagaanana. 10Maka o kamuliangi, kahoromati tee dhadhi malape bheatarimaia mia mopewauna kalape, bhaa-bhaana motarimaia o miana Yahudi, tee uka manga mia mominaakana i lipu mosagaanana. 11#Kap. 10:17.Roonamo Aulataʼala inda apaposala-sala mia.
12Bhari-bharia mia mokodosa inda momatauna Hukumuna Taurati, siitumo hukumu modhaangiana i nuncana Kitabi Taurati, bheatoʼadili moomini inda atohukumuaka tee Hukumuna Taurati. Sainamo bhari-bharia mia mokodosa momatauna Hukumuna Taurati, bheatoʼadili aose hukumu modhaangiana i nuncana Hukumuna Taurati sumai. 13Roonamo mia mobanara i aroana Aulataʼala inda soo aperangoi Hukumuna Taurati, maka o mia bhemotoabhina mobanara i aroana Aulataʼala sumai satotuuna o mia moosena hukumu modhaangiana i nuncana Hukumuna Taurati sumai. 14Manga mia inda motolentuna miana Yahudi, maka ande aose Hukumuna Taurati rampaakanamo fikirina karona, sumaimo ngangarandana manga incia bhemomembalina hukumu to karona, moomini manga incia inda tee katauna tee hukumuna agamana Yahudi sumai. 15Roonamo tee giu incia sumai manga incia padhamo asusuaka karona ande o Hukumuna Taurati atoburi i nuncana ngangarandana manga incia, tee o baatinina manga incia amembali sakusii ande sadia apasalea atawa apabanarea fikirina karona. 16Bhari-bharia giu incia sumai bheatokamata ande akawamo wakutuuna, siitumo wakutuuna bhari-bharia rahasiana maanusia bheahaakimua Aulataʼala alaloi Al Masi, siitumo o Isa, apokana tee opea modhaangiana i nuncana Lele Malape ipakoleleakaku.
Hukumuna Taurati Inda Amembali Apasalaamati Miana Yahudi
2:17-29
17Maka ingkomiu uabhi karomiu o miana Yahudi tee uose Hukumuna Taurati, tee ubanggaaka kaogesana Aulataʼala. 18Ingkomiu umataua opea o kapeeluana Aulataʼala tee umembali upili opea molabhina kalapena, roonamo ingkomiu padhamo aadhariakakomiu Hukumuna Taurati, 19tee uyaakini ande ingkomiu bhemotondana mia momawilo tee umembali kainawa to manga mia modhaangiana i nuncana kalalanda, 20moadharina mia mokabhongo-bhongo, tee umembali guruna anaana maidhiidhii, roonamo ingkomiu padhamo upotibhaaka ilimuu tee kabanara minaaka i Hukumuna Taurati. 21Ande mboo sumai, apokia ingkomiu uadhari mia mosagaanana, maka inda uadhari karomiu? Ingkomiu mopajelasiakana mia mamudhaakana inda amanako, maka garaaka o karomiu momanakona! 22Ingkomiu mopogauna, bholi uzina, garaaka o karomiu mopewauna zinaa. Ingkomiu mobancina barahala, maka garaaka o karomiu momanakona manga bara i tampana barahala! 23E ingkomiu mobanggaakana Hukumuna Taurati, apokia ingkomiu uhina Aulataʼala wakutuuna indapo uose Hukumuna Taurati sumai? 24#Yes. 52:5.Tee mboomo motoburina i nuncana Kitabi Momangkilo, "Rampaakanamo ingkomiu, sarona Aulataʼala ahinaia manga mia mominaakana i lipu mosagaanana inda motolentuna miana Yahudi."
25 Ingkita tamataua ande bhari-bharia umane mokoʼagamana Yahudi padhamo atotandaki. Inciamo tandaki sumai akoguna ande ingkomiu uose Hukumuna Taurati, maka ande inda uose Hukumuna Taurati, sumaimo tandakimiu indamo tee gunana. 26Ande dhaangia o mia inda mototandakina maka aose tuturana Hukumuna Taurati, sumaimo incia tabeana atoabhi mboomo mia mopadhana mototandaki. 27Tee manga mia inda mototandakina sumai bheapasalakomiu, roonamo ingkomiu dhaangia tee Kitabi Mangkilomiu tee utotandaki, maka inda uose Hukumuna Taurati. Sainamo manga incia inda atotandaki, maka manga incia ataʼati Hukumuna Taurati. 28Roonamo miana Yahudi asilii mencuana tangkanamo atokamata minaaka i sambalina karona, tee o maʼanana tandaki mototuu-totuuna sumai mencuana soo tanda modhaangiana i badatamea. 29#Kap. 30:6.Maka isarongiaka miana Yahudi asilii, siitumo o mia moosena Hukumuna Taurati i nuncana baatinina, tee isarongiaka tandaki mototuu-totuuna, siitumo tandaki modhaangiana i nuncana ngangaranda ikarajaana Rohina Aulataʼala, tee mencuana giu motoburi mboomo iparintaakana i nuncana hukumu. Mia mboo sumai bheapotibhaaka kapujia mencuana minaaka i maanusia maka minaaka i Aulataʼala.
Currently Selected:
Roma 2: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
