Roma 1
1
Salamu
1:1-7
1Minaaka i Paul, bhatuana Isa Al Masi, motokembana to momembalina rasulu tee mopadhana ipili to mopakoleleakana Lele Malapena Aulataʼala. 2Lele Malape sumai padhamo ajanjiakea Aulataʼala minaaka i zamani i piamo itu alaloi manga nabiina tee padhamo atoburi i nuncana manga Kitabi Momangkilo. 3Lele Malape sumai apogauaka Anana Aulataʼala,#1:3 Anana Aulataʼala: Saro incia sii atopake to asarongiaka Al Masi, roonamo Incia dhaangia tee pokaiana mohususu tee Aulataʼala. Kamatea o kaburi, "Anana Aulataʼala" i talikuna boku incia sii. siitumo o Ana ipalaahiri momembalina samia maanusia molaloina siwuluna Raja Daud,#1:3 siwuluna Raja Daud: Abhari o rajana Israel tee Yudea motosarongina 'siwuluna Raja Daud'. Sainamo i nuncana Pojanjia Bhaau, 'siwuluna Raja Daud' atomaʼanai uka amembali saro mosagaanana to 'Al Masi' atawa 'Rajana Kasalaamati Ijanjiakana'. 4tee i nuncana Rohi imangkiloaka atopatotapuaka amembali Anana Aulataʼala mokokuasana alaloi dhadhiana pendua minaaka i tanga-tangana mia mate. Incia satotuuna o Isa Al Masi Oputa Momalanga. 5Alaloi Isa, ingkami tatarima rahumati to tamembaliaka rasulu tee tabhawa bhari-bharia suku inda motolentuna miana Yahudi i kataʼatina iimani mamudhaakana o sarona atomuliangi. 6Ingkomiu uka upesua i nuncana mia inda motolentuna miana Yahudi momembalina pewauana Isa Al Masi. 7E bhari-bharikomiu momboorena i Kota Roma imaasiakana Aulataʼala tee ikembana to amembali mia momangkilo: Rahumati tee dhadhi malape minaaka i Aulataʼala o Amata tee minaaka i Isa Al Masi Oputa Momalanga apoose tee ingkomiu.
Paul Aemani Sukuru tee Gauna Alingka i Roma
1:8-15
8Bhaa-bhaana iaku kuemani sukuru i Aulataʼalaku alaloi Isa Al Masi to bhari-bharikomiu, roonamo abhari mia i saangua dunia arangomea ande ingkomiu uparacaea tee Isa Al Masi. 9Aulataʼala amembali sakusiiku, ande iaku inda kuunto-unto kuudhanikomiu i nuncana doʼaku. Incia kulaiania tee kampuu-mpuuna incaku wakutuuna kupakoleleaka Lele Malapena Anana Aulataʼala. 10Iaku uka kudoʼa tee kuemani mpuu i Aulataʼala mamudhaakana sii-sii adhawuaku kalalesa to kuleongikomiu. 11Roonamo iaku gauku mpuu kupokawa tee ingkomiu mamudhaakana kubage-bageakakomiu rahumati minaaka i Rohina Aulataʼala sabutuna amatangka o iimanimiu. 12Maʼanana, mamudhaakana ingkita tapokanakana tatopekatangka rampaakanamo iimanita samia-samia, siitumo iimanimiu tee iimaniku. 13#Tul. 19:21.E manga witinai, iaku gauku ingkomiu umataua, ande amenturumo kuhaejati to kuumbatikomiu, maka sakawana sii-sii indapo tee kalalesaku roonamo dhaangiapo tee tampalesuku. Iaku gauku opea ikarajaaku sii dhaangia tee hasilina to ingkomiu, apokana mboomo wakutuuna kudhaangia i tanga-tangana lipu mosagaanana inda motolentuna miana Yahudi. 14Roonamo kuwaajibu to kulaiani bhari-bharia mia inda motolentuna miana Yahudi, malape miana Yunani mokeniakana adati atawa o mia dhaga inda mokeniakana adati, malape o mia momalapena budina atawa o mia mokabhongo-bhongo. 15Rampaakanamo sumai iaku gauku mpuu kupakawaaka Lele Malape to ingkomiu momboorena i Kota Roma.
Lele Malape sumai o Kuasana Aulataʼala to Mopasalaamatina Maanusia
1:16-17
16 #
Mrk. 8:38. Iaku inda kumaea rampaakanamo Lele Malape sumai, roonamo Lele Malape sumai o kuasana Aulataʼala to mopasalaamatina bhari-bharia mia moparacaeana tee Incia, bhaa-bhaana to miana Yahudi, kasiimpo to mia inda motolentuna miana Yahudi. 17#Hab. 2:4.Tee Lele Malape sumai, Aulataʼala asusuakea tuaapa o kabanarana pokaiana maanusia tee Aulataʼala apomalape, carana siitumo tee taparacaea tee Aulataʼala minaaka i auwalina sakawana i kapadhaana.#1:17 minaaka i auwalina sakawana i kapadhaana: I nuncana pogau Yunani, pogau incia sii atoburi, "Minaaka i iimani to iimani," tee kabilanga mboomo 1) ibarati momembalina mokomaʼana ande o iimani ahandamo ajulu, 2) Aulataʼala satotuuna o minaana iimanina samia maanusia, atawa 3) mosusuakana ande o Lele Malape atopakoleleaka minaaka i mia moparacaeana tee Aulataʼala to mia mosagaanana mamudhaakana manga incia aparacaeaia. Giu incia sumai apokana mboomo mopadhana motoburina i nuncana Kitabi Momangkilo, "Mia mobanara bheadhadhi alaloi iimanina."
Kahukumuna Aulataʼala to Mia Mokodosa tee Kadhakina Maanusia
1:18-32
18Minaaka i sorogaa o Aulataʼala apatokamata pamuruna to bhari-bharia kadhaki ipewauna maanusia. Manga incia inda ahoromati Aulataʼala tee apopasala-sala podho-podho manga incia. Kadhakina manga incia amembali giu mojoli-jolina kabanarana Aulataʼala to imatauta. 19Opea imatauna maanusia to Aulataʼala atinda mpuu i nuncana ngangarandana manga incia, sababuna o Aulataʼala mopakawaakana giu incia sumai to maanusia. 20Roonamo pepuu minaaka o alamu atopadhaangia, bhari-bharia sifatuna Aulataʼala inda motokamatana, siitumo kuasana mobakaa tee o maanusia amataua ande Incia atotuu-totuu Aulataʼala, atindamo i fikirina maanusia alaloi bhari-bharia giu mopadhana ipadhaangiana Aulataʼala. Tee mboo sumai, manga incia indamo tee alasana to apabanara karona. 21#Ef. 4:17-18.Roonamo garaaka manga incia amataumea ande o Aulataʼala sumai adhaangia, maka manga incia inda amuliangia mboomo laengana Aulataʼala atawa inda asukuru tee Incia, sampe manga incia soo afikiriaka manga giu mosia-sia tee o ngangarandana manga incia amalalanda. 22Manga incia aabhi karona mboomo mia momalapena budina, garaaka manga incia akabhongo-bhongo. 23#Kap. 4:16-18.Manga incia inda amuliangi Aulataʼala mobakaa, maka asomba manga patu moposiingina tee manga mahaluku momembalina momate, siitumo maanusia, manu-manu, binata mokoaena patambali tee binata mopondele.
24Rampaakanamo sumai o Aulataʼala ataroaka manga incia akuasaia kapeeluana ngangarandana mobukeakana karombu, sabutuna manga incia apewau manga giu mopanaajisina badana karona samia-samia. 25Manga incia apapobholosi kabanarana Aulataʼala tee kagau-gau, tee mencuana Mopadhaangiaia isombana, maka manga incia asomba tee alaiani manga giu mopadhana ipadhaangiana maanusia, garaaka o Aulataʼala sumai molaengana ipuji saʼumurua! Aamin. 26Rampaakanamo sumai manga incia ataroakea Aulataʼala to akuasaiaka nawusuuna karona. Tee uka manga bhawine modhaangiana iwe sumai amendeumo akole tee umane mboomo laengana, maka manga incia alabhimo apili akole podho-podho bhawine. 27Mencuana tangkanamo bhawine, maka o umane uka akole podho-podho umane. Manga incia indamo akole tee bhawine, tee o birahina manga incia tangkanamo podho-podho umane, sabutuna manga incia apewau giu imaeaaka tee apotibhaaka kahukumu mopokana tee giu madhaki mopadhana ipewauna manga incia. 28Jadi mboomo tuaapa manga incia amendeu apomatau tee Aulataʼala, sumaimo Aulataʼala ataroakea o fikirina manga incia asia-sia, sabutuna manga incia apewau giu inda molaengana to ipewauna maanusia. 29Ngangarandana manga incia abukeaka tee sagala giuna kadhaki, giu inda mobanara; kasoʼo, giu marombu, gigibulu, pekamateana mia, pogera-gera, pekatipu, pacilakaana mia, tee pande humbu-humbuna mia. 30Manga incia o pande fitanaa, pande bancina Aulataʼala, inda mokoʼadatina, mosombona, mopekalangana karona, mohaejatiakana kadhaki, modorohakana tee mancuanana, 31inda mokoʼakalana budina, inda momembalina motoparacaea, inda tee kaasina incana, tee inda momaasiakana maanusia rangana. 32Manga incia amataua o tuturana hukumuna Aulataʼala, siitumo ande o mia mopewauna giu incia sumai tabeana atohukumu mate, maka moomini mboo sumai manga incia asadhaadhaa apewaua tee asatujui manga mia mosagaanana to apewau giu incia sumai.
Currently Selected:
Roma 1: KMW
Highlight
Copy
Compare
Share
Want to have your highlights saved across all your devices? Sign up or sign in
Ongoing © Wycliffe Bible Translators, Inc
